د افغانستان اسلامي امارت د ریاست الوزرا اداري مرستیال مولوي عبدالسلام حنفي پرون له غرمې مخکې د نوي کابل ښار د لومړي فاز ۲.۶ پارسل (برخې) د پرانیستې په مراسمو کې، چې د ښار او کور جوړولو وزارت او ګولډن سیټي شرکت له لوري جوړ شوي وو، ګډون او وینا وکړه.

په پیل کې د ریاست الوزرا اداري مرستیال د ښار او کور جوړولو وزارت او ګولډن سیټي شرکت له رهبري پلاوي د نوي کابل ښار د لومړي فاز ۲.۶ پارسل (برخې) د پرانیستې په خاطر مننه او قدرداني کړې او ویلي یې دي؛ د خوښۍ ځای دی چې افغانان د خپل ځورېدلي وطن د ابادۍ لپاره بل ګام اخلي.

مولوي عبدالسلام حنفي د نوي کابل ښار پروژې تطبیق یو ستره او ملي پروژه بللې، چې په عملي کولو سره به یې د افغان ټولنې په اجتماعي، اقتصادي او فرهنګي برخو کې لوی بدلون رامنځته شي. دغه راز به افغانستان په سیمه کې د انرژۍ، اوبو، سړک، کرنې او نورو برخو کې د سوداګرۍ او اقتصاد په یوه مرکز بدل شي.

نوموړي زیاته کړې، چې د دې کار عملي کول د نفوسو د ودې، د کورونو د کمبود حل، د زېربناو د ایجاد، هېوادوالو ته د کار پنځونې، د خصوصي سکټور د ملاتړ، اقتصادي ودې، د کورنۍ او بهرنۍ پانګونې د راجلبولو او هېواد ته د پرمختللې ټکنالوژۍ لپاره ځواب ویل او ځانګړی ارزښت لري، چې ۱.۲ میلیون وګړو ته به د کار زمینه برابره کړي.

نوی کابل ښار د کابل بین المللي هوایي ډګر او پروان د بګرام ولسوالۍ ترمنځ موقعیت لري او د کابل ولایت د ده سبز ولسوالۍ ټوله برخه، د شکر درې، استالف، قره باغ او کلکان ولسوالیو ځینې برخې او د پروان ولایت د بګرام ولسوالۍ د باریک اب سیمه رانغاړي.

د ریاست الوزرا د اداري مرستیال په وینا؛ هغه ودانیزې چارې چې تر اوسه په کابل ښار کې ترسره شوې، ډېری یې نامعیاري او د ښاري ماسټر پلان خلاف او زموږ وطنوالو ته یې زیاتې ستونزې رامنځته کړي دي، خو هغه فعالیتونه چې تر دې مهاله د نوي کابل ښار په پروژه کې ترسره شوي پکې د چاپېریال ساتنې ټول مسایل، په پینځو پړاوونو کې په مرحله وار ډول د ښاري ماسټر پلان تطبیق، فازبندي او په اخره مرحله کې د معتبرو ملي او بین المللي شرکتونو له لوري په څو برخو د هر فاز وېشل ترسره شوي دي.

مولوي عبدالسلام حنفي د خپلو خبرو په پای کې په هېواد او ځانګړي ډول کابل ښار کې د اوبو ستونزې ته په اشارې سره ویلي، چې د اوبو کموالی د کابل ښار له اساسي ستونزو څخه دی او اسلامي امارت د دې ستونزې د حل لپاره یوه جامع ستراتېژي ترتیب او د منظورۍ په موخه یې عالیقدر امیرالمؤمین حفظه الله تعالی ته استولې، چې له مخې به یې د پنجشیر سیند اوبه کابل ته راولېږدول شي او په اوسني او نوي کابل ښار کې به د خلکو د اوبو کمبود ستونزه حل شي.

امر بالمعروف او نهی عن‌المنکر وزارت د یوې اعلامیې په خپرولو سره ویلي، چې د انسان د پښتورګو (ګردو) ینه (جګر)، سترګو او وېښتانو پلور او ګټه ورڅخه اخیستل په بشپړ ډول منع او غیرې شرعي کړنه ده.

د امر بالمعروف او نهی عن المنكر قانون د ۱۸ مې مادې اووم بند داسې صراحت لري: “د انسان د اعضاوو لکه پښتورګی (ګرده)، ینه (جگر)، سترګو او وېښتانو له خرڅولو او استعمالولو څخه منع کول.”

په یاده ماده کې محتسبينو ته دنده ورکړل شوې، ترڅو له پورتنیو ذكر شويو ټکو څخه مخنیوی وکړي، دا ځکه چې اسلامي مقدس شریعت د انسان کرامت ته ځانګړی ارزښت ورکړی او دانسان د بدن ټولو برخو ته د درناوي امر کوي.

لکه څرنگه چې الله تعالی په خپل کلام کی ټینگار کوي او فرمايي: “ولقد كرمنا بني آدم” (الاسراء : ۷۰).

ژباړه: په تحقیق سره چې موږ بني آدم ته کرامت ورکړی دی.

په یاده اعلامیه کې راغلي: د انسان بدن د الله تعالى له نعمتونو څخه دی او په هېڅ ډول د سوداګري یا سپکاوي لپاره نه دی جوړ، له همدې امله د انسان د بدن د غرو لکه پښتورګی (ګرده) ینه (جګر)، سترګو او وېښتانو پلور او ګټه اخیستل په بشپړ ډول منع او غير شرعي کړنه ده.

بلخوا فقهاوو په دې ټینګار او اتفاق کړی، چې د انسان د وېښتانو څخه ګټه اخیستل پلورل او استعمالول یې نه دي روا، ځکه انسان ته الله تعالى عزت ورکړی، نو د انسان د بدن هیڅ غړی یا برخه باید سپکه یا بې ارزښته و نه گرځول شي.

همداراز د دارالکتاب اسلامي خپرندويه ټولنې له لوري خپاره شوي، البحر الرائق شرح كنز الدقائق كتاب شپږم ټوک، ۸۸ مه پاڼه کې راغلي، چې د انسان د وېښتانو پلورل او ګټه اخیستل ځکه نه دي روا، چې انسان ته عزت ورکړل شوی او بې عزته کول یې منع دي.

رسول الله ﷺ فرمايلي دي: «لعن الله الواصلة والمستوصلة»

ژباړه: الله تعالى هغه ښځه چې وېښتان لګوي او هغه څوک چې ورته لګوي يې لعنت کړي دي.

پورتني ټکي ته په کتو د انسان وېښتان ځکه نه پلورل کېږي، چې انسان ته عزت ورکړل شوی که هم کافروي.

همداراز د دار الفکر خپرندويه ټولنې له لوري خپاره شوي الفتاوى الهندية كتاب ۵ توک ۳۵۴ مه پاڼه کې علما وو داسې فتوا ورکړې، چې د انسان د بدن د برخو څخه ګټه اخیستل روا نه دي.

ځيني عالمان وايي دا د نجاست له امله دي، خو سم نظر دا دی چې دا د انسان د عزت لپاره ناروا ګڼل شوي.

د يادې پرېکړې بنسټ دا دی، چې د انسان د بدن د غړو او برخو نه پلورل د انساني کرامت او عزت د ساتلو لپاره دي.

د انسان بدن ځانگړی حرمت لري او د هغه د بدن غړي باید په هیچ حالت کی د سوداګری یا ګټې اخیستنې وسیله و نه ګرځول شي، ځکه چې د انسان د عزت او کرامت خلاف کار دی.

د انسان د بدن د غړو پلور یا ترې ګټه اخیستل د انساني کرامت سره په ټکر کې دي او په اسلامي مقدس شریعت کې هېڅ ځای نه لري.

پر همدې بنسټ ټول مسلمانان مکلف دي، چې د اسلامي مقدس شریعت اصول مراعت کړي د انسان بدن ته درناوی وکړي له هغو کړنو ځان وساتي، چې د انسان سپکاوی یا بې عزتي گڼل کېږي او د دې عمل د مخنيوي لپاره د هڅو ترڅنگ د الله تعالى او د هغه د رسول ﷺ لارښوونې په بشپړ ډول پلي کړي.

 د رياست الوزرا د اقتصادي معاونيت د لارښوونې پر بنسټ د ټولګټو وزارت د اوسپنيزې کرښې مرستيال مولوي محمد اسحاق صاحبزاده تر سرپرستۍ لاندې مل پلاوي د حيرتان بندر د تخليې او بارګيرۍ د تسريع په تړاو له سوګدیانا ترانس شرکت له مسولینو سره لیدنه وکړه.

 ياده ليدنه په حيرتان بندر کې ترسره شوه او د دغه بندر څخه د ريلي واګونو د تراکم موضوع د حل کېدو، د اوسپنيزو کرښو د فعاله ساتلو، د سټيشنونو د پوره ظرفيت په کار اچولو او د تخليې او بارګيرۍ چارو د چټکتيا په تړاو مفصل بحثونه ترسره او لازم تصاميم ونيول شول.

 د يادونې وړ ده، چې د ټولګټو وزارت د اوسپنيزې کرښې مرستيال او مل پلاوي د ياد شرکت د مسولينو سره په ګډه د دغه سفر په جريان کې د حيرتان بندر اړوند له اوسپنیزې کرښې، سټيشنونو او ريلي تاسيساتو ځخه هم ليدنه او ارزونه کړې ده.

سوګدیانا ترانس اوزبیکستانی شرکت دی، چې له تيرو څو کلونو راهيسې د ترسره شوي تړون له مخې، د حيرتان بندر له لارې د سوداګريزو توکو د انتقالاتي چارو مسوليت په غاړه لري.

د سرحدونو، قومونواو قبايلو چارو وزارت وايي؛ د ننګرهار ولايت په دره نور ولاسوالۍ کې د قومي سپين ږيرو او علماوو په دوامداره همکارۍ د دوو کلیو ترمنځ هغه اووه کلنه اوږده شخړه هواره شوه، چې له دواړو خواوو پکې دوه تنه وژل شوي او دوه نور پکې ټپيان شوي وو.

د دغې روغې جوړې پر مهال علماوو او مسولينو ښکېلو خواوو ته لومړی د سولې او بښنې پر تړاو هر اړخيزې خبرې کړي او بيا يې له هغوی غوښتي، چې د دښمنۍ او نفاق پر ځای ګډ او سولهييز ژوند ته مخه کړي.

د يادونې وړ ده، چې تر دې وړاندې هم د ننګرهار په سرخرود ولسوالۍ کې ۳۰ کلنه دښمني د سرحدونو، قومونو او قبايلو چارو رياست مسولينو لخوا هواره شوې، چې څلورو تنو ته په کې مرګ ژوبله اوښتې وه.

د افغانستان اسلامي امارت د بهرنیو چارو وزارت د یوې اعلامیې په خپرولو سره د سوریې په خپلواکه خاوره د صهيونيستي رژيم پرله‌پسې بمبارۍ په کلکو ټکو غندلې او د دې هېواد د ازادۍ او استقلال څرگند نقض یې بللې دي.

په سوريه كې د بشار الاسد د نظام له نسکورېدو وروسته صهيونيستي یرغلګر رژیم د خپلو وحشتونو په دوام د یاد هېواد پر خاوره تېری او د یو لړ نظامي تاسيساتو او شتمنيو سربېره یې پر ملكي سيمو بمبارۍ کړې، چې درانه ځاني او مالي تلفات یې رامنځته کړي دي.

په یاده اعلامیه کې ویل شوي: “دغه خطرناک اقدام د هغه ناكامې ستراتیژۍ دوام دی، چې صهیونستي رژیم یې د منځني ختيځ په بېلا بېلو هيوادونو کې د خپلو نامشروع اهدافو تر لاسه کولو لپاره پر مخ وړي.”

د افغانستان د بهرنیو چارو وزارت د سوریې د خلکو په اراده له خپلواک حکومت څخه د ملاتړ تر څنګ په ښکېلو سيمه‌یيزو او نړيوالو قدرتونو غږ کوي، چې د سوریې ملت د خپل راتلونکي په باب خپل مستقل او ازاد انتخاب ته پرېږدي، تر څو له هر ډول بهرنیو فرمایشونو او فشارونو پرته د خپل هېواد برخلیک پخپله وټاکي.

برېتانیا کې د سوریې د بشري حقونو څار یوه سازمان ویلي، چې اسرائیلي جنګي الوتکو په سوریه کې له ۱۰۰ ډېر هوايي بریدونه کړي او د دمشق، درعاه، لتاکیا او حماه سیمو یو شمېر پوځي هدفونه یې په نښه کړي دي.

د یاد سازمان په وینا؛ په برزه سیمه کې د ساینسي څېړنو پر یوه مرکز هم برید شوی دی.

پر دې سربېره سوریه کې د بشار الاسد د رژیم له سقوط وروسته اسرائیلو خپل عسکر له سوریې سره په حایله سرحدي سیمه او نورو مهمو برخو کې ځای پر ځای کړي دي.

دا حایله سیمه د سوریې د قلمرو په قنیطره برخه کې موقعیت لري، چې په ۱۹۷۴ کې د اسرائیلو او سوریې تر منځ د یوې هوکړې پر اساس رامنځته شوې وه.

ملګرو ملتونو د اسرائیلو دا اقدام او حایله سیمې ته د اسرائیلي عسکرو ننوتل د نړیوالې هوکړې نقض ګڼلی دی.

له دې وړاندې قطر، سعودي عربستان او عراق د اسرائیلي رژیم له لوري اشغال شوي جولان ته نږدې د سوریې د خاورې نیول غندلي وو.

د راپورونو له مخې، اسرائیلي رژیم په سوریه کې له ۱۰۰ ډېر هوايي بریدونه کړي.

برېتانیا کې د سوریې د بشري حقونو څار یوه سازمان ویلي، چې اسرائیلي جنګي الوتکو په سوریه کې له ۱۰۰ ډېر هوايي بریدونه کړي او د دمشق، درعاه، لتاکیا او حماه سیمو یو شمېر پوځي هدفونه یې په نښه کړي دي.

د یاد سازمان په وینا؛ په برزه سیمه کې د ساینسي څېړنو پر یوه مرکز هم برید شوی دی.

پر دې سربېره سوریه کې د بشار الاسد د رژیم له سقوط وروسته اسرائیلو خپل عسکر له سوریې سره په حایله سرحدي سیمه او نورو مهمو برخو کې ځای پر ځای کړي دي.

دا حایله سیمه د سوریې د قلمرو په قنیطره برخه کې موقعیت لري، چې په ۱۹۷۴ کې د اسرائیلو او سوریې تر منځ د یوې هوکړې پر اساس رامنځته شوې وه.

د دمشق په سویل لوېدیځ کې شاوخوا په دې ۶۰ کیلو متره غرنۍ سیمه کې، چې یوه برخه یې لا له وړاندې اسرائیلو اشغال کړې، له ۱۹۶۷ کال وروسته د ملګر ملتونو سوله ساتي ځواکونه مېشت دي. اسرائیلي عسکر له ۱۹۷۴ وروسته د لومړي ځل لپاره د سوریې دې سیمې ته داخل شوي.

ملګرو ملتونو د اسرائیلو دا اقدام او حایله سیمې ته د اسرائیلي عسکرو ننوتل د نړیوالې هوکړې نقض ګڼلی دی.

له بل لوري د اسرائیلو لومړي وزیر بنیامین نتانیاهو ویلي؛ د جولان لوړې سیمې، چې د اشغال یې شاوخوا ۶۰ کاله کېږي، د تل لپاره به د اسرائیلو د خاورې برخه پاتې شي.

قطر، سعودي عربستان او عراق د اسرائیلي رژیم له لوري اشغال شوي جولان ته نږدې د سوریې د خاورې نیول غندلي.

دې هېوادونو په بېلابېلو خبرپاڼو کې د اسرائیلي دا اقدام له نړیوالو قوانینو ښکاره سرغړونه ګڼلې ده.

اسرائیلي عسکر د تېرې یکشنبې په ورځ د سوریې تر کنټرول لاندې د جولان په لوړو کې حایله سیمې ته ننوتل.

د الجزیرې د راپور له مخې، اسرائیلي عسکرو ستراتېژیکې سیمې ته نږدې په پینځو کلیو کې سوریايي اوسېدونکو ته په کور د پاتې کېدو خبرداری ورکړی دی.

د افغانستان اسلامي امارت له افغان شخصیتونو سره د تماس کمېسیون لخوا د کابل د تېرې ادارې د یوه جنرال په ګډون څو تنو پخوانیو پوځیانو او ملکي مسولینو ته د خوندیتوب کارتونه ورکړل شول.

له افغان شخصیتونو سره د تماس کمېسیون د دارالانشا رییس مولوي ذاکر الله ذاکر پخوانیو مسولینو ته د ښه راغلاست ترڅنګ هغوی ته ډاډ ورکړی، چې د اسلامي امارت د عمومي بښنې د فرمان پر بنسټ هیڅوک د پخوانۍ دندې او فعالیت له امله نه پوښتل کیږي.

مولوي ذاکر الله ذاکر ويلي؛ اسلامي امارت د انتقام فکر نه لري، بلکې په هېواد کې امن او وګړو ته د اسانتیاوو چمتو کولو لپاره هڅې کوي.

نوموړی د خبرو پر دوام څرګنده کړې، چې ټولې امارتې ادارې د خوندیتوب کارت لرونکو لپاره ځانګړی پام لري او همدارنګه د حقوقي ستونزو د حل لپاره یې ځانګړی تشکیل کار کوي.

 دغه راز له بهر راغلو پخوانیو چارواکو د اسلامي امارت د بښنې د فرمان ستاینه کړې او ویلي یې دي، هېواد ته په راتګ سره د امن احساس کوي او له هیڅ ډول ستونزې سره نه دي مخ شوي.

 دوی په افغانستان کې شته امن اړتیا یاده کړې او یادونه یې کړې ده، چې د هېواد د ابادۍ په موخه له اسلامي امارت سره هر ډول همکارۍ ته چمتو دي.

د اطلاعاتو او کلتور وزارت د هنر او کلتور مرستیال مولوی عتیق الله عزیزي د چهلستون له بڼ څخه لیدنه کړې.

په دې لیدنه کې د یاد وزارت د تاریخي ابداتو، لرغون پېژندنې، مالي او اداري چارو، عامه کتابتون، ملي راډیو ټلوېزیون، د ځوانانو د اصلاح چارو او د ځوانانو د همغږۍ رییسانو ګډون درلود.

د اغاخان د کلتوري بنسټ رییس انجینر اجمل میوندی چې د چهلستون بڼ د رغونې چارو مسوليت لري، د یاد بڼ د بیا رغونې د پروژې په اړه هر اړخیز پریزنټیشن وړاندې کړ.

نوموړي ویلي، د تېرو کلونو په پرتله د بڼ عواید کم شوي او د ساتنې په برخه کې یې ګڼې ستونزې رامنځته شوې دي.

د اطلاعاتو او کلتور وزارت د هنر او کلتور مرستیال مولوی عتیق الله عزیزي د چهلستون بڼ د هېواد د تاریخي ارزښتونو یوه مهمه برخه بللې او ټینګار یې کړی، چې د دې بڼ د حفاظت او ښېرازۍ لپاره به اړینې هڅې کېږي.

نوموړي له هېوادوالو او سیلانيانو غوښتي، چې د چهلستون بڼ ته لاړ شي د دې تاریخي بڼ له ښکلا، لرغونې معمارۍ، او ودانیو څخه خوند واخلي او د بڼ تاریخي اهمیت په اړه معلومات ترلاسه کړي.

د چهلستون بڼ او قصر د امیر عبدالرحمن خان په زمانه کې د ۱۸۸۰ څخه تر ۱۹۰۱ میلادي کلونو پورې جوړ شو، د امیر حبیب الله خان په دوره کې د دې قصر په جوړښت کې پراخ بدلونونه راوستل شول او د سلطنت په وخت کې د دولتي لوړپوړو چارواکو د اوسېدو ځای و.

د تنظيمي جګړو په ترڅ کې (۱۳۷۱ تر ۱۳۷۶ لمريز کلونو) دغه بڼ او قصر سخت زیان ولید، خو د ۲۰۱۵ څخه تر ۲۰۱۸ میلادي کلونو پورې د اغاخان کلتوري بنسټ د المان هېواد په مالي ملاتړ د دې بڼ بیارغونه بشپړه کړه.

دا مهال د چهلستون بڼ د خلکو پر مخ پرانیستی دی او له ۲۰۱۹ میلادي څخه تر اوسه پورې له درې میلیونو زیاتو کسانو له دې تاریخي بڼ څخه لیدنه کړې ده، یاد بڼ د نندارتونونو او مجلسونو لپاره مناسب ځایونه لري او د هېواد د تاریخي شتمنیو یوه ارزښتناکه نښه بلل کېږي.