اسرائیلي یرغلګرو غزه کې په خوندي اعلان شوې المواصي سیمه برید کړی، چې د ښځو او ماشومانو په ګډون ۲۰ فلسطینیان پکې شهیدان او ګڼ نور ټپيان شوي دي.
روغتیايي سرچینو ویلي، چې په دې برید کې د ښځو او ماشومانو جسدونه سوزېدلې دي.
په دې برید کې هغه خېمې په نښه شوې، چې ۱۴ بېځایه شویو فلسطیني کډوالو پناه پکې اخیستې وه.
له سیمې نه د الجزیرې خبریال راپور ورکړی؛ په نښه شوې سیمه له فلسطیني بېځایه شویو کورنیو ډکه وه، چې لږ تر لږه دوه توغندیز بریدونه پرې وشول.
یوازیني ژوندي پاتې فلسطیني سپینږیري، چې ټوله کورنۍ یې په یاد برید کې له منځه تللې، الجزېرې ته ویلي: “له ماښام لمانځه وروسته چاودنه وشوه، چې له امله یې اور ولګېد او ټول کمپ ویجاړ شو.”
نوموړي زیاته کړې: “ما منډې کړې، چې زامن، لوڼې او مېرمن مې ولټوم. دوی ټول روغتون ته وړل شوي وو. زه یوازینی ژوند پاتې کس وم. ټول په روغتون کې دي. زه وېرېدلی یم او هېڅ نه پوهېږم چې څه پېښ شول.”
د اسرائیلو له لوري په اعلان شوې خوندي المواصي سیمه د صهیونیستي یرغلګرو بریدونه دوام لري، چې له امله یې د بېځایه شویو خېمو له منځه ځي او ګڼ فلسطینیان پکې شهیدان او ټپيان کېږي.
پر دې سربېره الاقصی تلویزیون راپور ورکړی، چې اسرائیلي یرغلګرو نن سهار د غزې په شمال کې سخت بمبار پیل کړی.
الجزیرې هم د یاد بمبار په تړاو راپور ورکړی او ویلي یې دي، چې بیتلاهیا، جبالیا، د نصیرات کمپ په شمال او مرکزي غزه کې هم د اسرائیلو بریدونه دوام لري.
د ۲۰۲۳ د اکتوبر له ۷مې راهیسې غزه کې د اسرائیلي یرغلګرو د نسلوژنې په جګړه کې لږ تر لږه ۴۴ زره او ۵۳۲ فلسطینیان شهیدان او ۱۰۵ زره او ۵۳۸ نور ټپیان شوي دي.
