د افغانستان اسلامي امارت د امربالمعروف، نهی عن المنکر او شکایتونو اورېدلو وزیر شیخ محمد خالد الحنفي هلمند ته سفر او د مسولینو، علماء کرامو او متنفذینو سره یې په یوه پراخه غونډه کې ګډون کړی.
په دې غونډه کې ګڼو ځايي چارواکو او مسولینو ګډون کړی و.
په پیل کې د هلمند د امر بالمعروف او نهی عن المنکر رییس مولوي محمد امین بدخشاني له هر څه وړاندي د ولایت مقام له ښې رهبرۍ مننه کړې، چي تل یې د دغه ریاست سره په اړوند برخو کي همکاري کړې ده.
نوموړي له ټولو مسولینو، علماءکرامو او متنفذینو غوښتي، چي خپلې همکارۍ ته لا دوام ورکړي او د اسلامي احکامو په تطبیق کې خپل مسولیت او رسالت په ښه ډول ادا کړي.
د امربالمعروف او نهی عن المنکر وزیر تر هر څه وړاندي په تېرو شلو کلونو کي د هلمندي ولسونو جهادي کارنامې د ستایلې او ویلي یې دي، چې زموږ شل کلن جهاد دوې موخي لرلې؛ یو اشغال ته د پای ټکی اېښودل او بل په ټول هېواد کې اسلامي نظام نافذول دي.
نوموړي زیاته کړې، چې د اسلامي امارت د واکمنېدو وروسته په ټول هېواد کې د مظلومانو غږ اورېدل شوی او د ظالمانو مخه نیول شوې ده.
د ښاغلي الحنفي په وینا؛ موږ په فزیکي او فکري جګړه کې بریالي شوي یو او لا هم هڅه کوو، تر څو د اسلام د دښمنانو د فکري جګړې شیندل شوی اثر هم له منځه یوسو.
شیخ محمد خالد الحنفي له علماء کرامو غوښتي، چې د دغه وزارت قانون د منبر له لاري تر ولسونو پورې ورسوي، تر څو خلک له منکراتو وژغورل شي او نېکي لارې ته وهڅول شي.
د هلمند والي په دې غونډه کې ویلي، چې الهی احکام تر خلکو رسول او خلک نېکې لارې ته هڅول زموږ د ټولو ګډ مسؤلیت دی.
نوموړي امر بالمعروف وزیر ته ډاډ ورکړی، چې د دغه وزارت د قانون ټولي مادې به په دولتي ادارو کي په ښه ډول عملي شي او هم به د علماء کرامو پر مټ یاد قانون په ښه توګه تر خلکو پورې ورسول شي.
د غونډې په وروستۍ برخه کې د یاد وزارت ویاند مولوي سیف الاسلام خیبر د عالیقدر امیر المؤمنین حفظه الله هغه فرمان، چې د امر بالمعروف قانون د تنفیذ په موخه یې د هېواد ټولو ولایتونو ته صادر کړی بیان کړ.
د یادونې وړ ده، چې راغلي پلاوي په هلمند ولایت کې د بېلا بېلو لیدنو پر مهال د امر بالمعروف ریاست د محتسبینو، د رسنیو مسولینو، ازادو او سیمهییزو خبریالانو سره کتنې کړې. د هغوی هر اړخیزې ستونزې، غوښتنې او وړاندیزونه یې د حل په موخه اورېدلې دي.