د افغانستان اسلامي امارت د ریاست الوزرا سیاسي مرستیال مولوي عبدالکبیر د ننګرهار ولایت د مومندرې ولسوالۍ له يو شمېر قومي مشرانو سره لیدنه کړې.

په دې لیدنه کې یادو قومي مشرانو د اسلامي نظام ټینګښت، د امنيت تأمین او له ولسونو سره د مسولینو ښه همغږي ستایلې او اسلامي امارت ته یې د هر راز همکارۍ ډاډ ورکړی دی.

هغوی دغه راز د کابل سیند پر غاړه په مومندرې ولسوالۍ کې د استنادي دېوال د جوړېدو غوښتنه کړې او ویلي یې دي، چې د مومندرې او نورو جګړو ځپلو سیمو لپاره دې ځانګړې اساسي او پراختیايي پروژې عملي شي.

راغلو قومي مشرانو د تورخم ښارګوټي د ستونزو حل او فعالولو وړاندیزونه هم د ریاست الوزرا سیاسي مرستیال ته سپارلي.

مولوي عبدالکبیر د مومندرې له قومي مشرانو څخه د مننې ترڅنګ ویلي، چې د ولسونو په همکارۍ د افغانستان په ټوله جغرافیه اسلامي نظام حاکم او سراسري امنیت تأمین دی.

نوموړي زیاته کړې؛ اسلامي امارت د ټولو افغانانو مشترک نظام دی، چې د ولسونو د ستونزو حل یې په لومړیتوبونو کې قرار لري.

د رياست الوزرا سياسي مرستيال د مومندرې ولسوالۍ دغو قومي مشرانو ته ډاډ ورکړی، چې ستونزې به يې د حل په موخه له اړوندو ادارو سره شريکې شي.

د کډوالو او راستنېدونکو چارو وزارت او کابل کې د قطر سرې میاشتې ادارې ترمنځ د وزارت د پلان او پالیسۍ رییس مولوي محمودالحق احدي په مشرۍ تخنیکي ناسته وشوه.

په دې ناسته کې په کابل کې د قطر د سرې میاشتې رییس ابو مصطفی او د وزارت ځینو رییسانو برخه اخیستې وه او په پکتیا کې د قطر د سرې میاشتې له لوري د بې‌ځایه شویو، راستنو شویو او مستحقو کورنیو لپاره د سرپناه د جوړولو، کیفیت او معیاري کېدو په اړه چې مخکې هم ورباندې بحث شوی و، خبرې شوې.

ښاغلي مصطفوي د وزارت د وړاندیزونو د عملي کولو ژمنه کړې او ویلي یې دي، چې دا موضوع به د خپل هېواد له مشرتابه سره شریکوي او په اړه به یې کار کوي.

د وزارت د پلان او پالیسۍ رییس د قطر د سرې میاشتې له مرستې او ښه نیت څخه مننه کړې او د هر اړخیزو همکاریو ډاډ یې ورکړی دی.

ټاکل شوې چې د قطر د سرې میاشتې اداره په پکتیا ولایت کې د بې ځایه شویو، راستنو شویو او مستحقو کورنیو لپاره لسګونه سرپناوې جوړې کړي، چې ۲ خونې، یو پخلنځی، یو دهلیز او یو تشناب به ولري.

افغان ابدالیانو لوبډلې د اسیا ایمرجېنګ جام کرېکټ سیالیو په پایلوبه کې د سریلانکا الف لوبډلې ته په ۷ ویکټو ستره ماتې ورکړه او د لومړي ځل لپاره یې د یادو سیالیو اتلولي وګټله.

افغان لوبډلې یوه په زړه پورې لوبه نندارې ته وړاندې کړه او داسې مهال یې د ۲۰۲۴ اسیا جام اتلولي وګټله، چې ۱۱ بالونه لا ورته پاتې وو.

د دې لوبې پچه د سریلانکا الف لوبډلې وګټله او لومړی یې د توپ‌وهنې پرېکړه وکړه.

یادې لوبډلې د پایلوبې په لومړۍ پاڼۍ کې د خپلو ۷ لوبغاړو په زیان سره ۱۳۳ منډې جوړې کړې او افغان لوبډلې ته یې د ۱۳۴ منډو هدف وټاکه.

د افغان لوبډلې تکړه ورو توپ‌اچوونکي محمد غضنفر په دې لوبه کې بهترینه توپ اچونه وکړه او په خپلو ۴ اورونو کې یې د ۱۴ منډو په بدل کې ۲ ویکټې ترلاسه کړې.

د نوموړي ترڅنګ بلال سمیع هم ښه توپ اچونه وکړه او ۳ سیال لوبغاړي یې له ډګره بهر کړل.

افغان لوبډلې د یاد هدف په ځواب کې خپل لومړی لوبغاړی زبید اکبري د دویمې پاڼۍ په لومړي توپ له لاسه ورکړ، خو صدیق الله اتل د تېرو سیالیو په څېر یو ځل بیا بهترینه توپوهنه وکړه او په یادو سیالیو کې یې پینځمه پرله‌پسې نیمه سلیزه جوړه کړه.

افغان لوبډله په ۱۹م اور کې یوازې د درېیو لوبغاړو په زیان سره یاد هدف او د دغو سیالیو اتلولۍ ته ورسېده.

د افغان لوبډلې په ګټه صدیق الله اتل ۵۵ ناسوځېدلې منډې جوړې کړې، دغه راز کریم جنت ۳۳، لوبډلمشر دروېش رسولي ۲۴ او محمد اسحاق هم ۱۶ چټکې او ناسوځېدلې منډې جوړې کړې.

د پایلوبې د غوره لوبغاړي جایزه محمد غضنفر ترلاسه کړه.

د افغان لوبډلې بل تکړه لوبغاړي او ځوان توپ‌وهونکي صدیق‌الله اتل بیا د کرېکټ اسیايي شورا د اېمرجېنګ اسیا جام سیالیو د تر ټولو غوره لوبغاړي جایزه پخپل نوم کړه.

نوموړي په پینځو لوبو کې پینځه پرله‌پسې نیمه سلیزې او د ۱۲۲.۶۶ منډو په اوسط او ۱۴۷.۷۹ سټرایک رېټ سره یې تر ټولو ډېرې ۳۶۸ منډې جوړې کړې.

یادې سیالۍ د روانې اکتوبر میاشتې په ۱۸مه د عمان په پلازمېنه کې پیل شوې وې.

افغان ابدالیانو په ګروپي پړاو کې په ترتیب سره سریلانکا الف او بنګله دېش الف او وروسته په نیمه پایلوبه کې د هند الف لوبډلې ته او نن په پایلوبه کې یو ځل بیا سریلانکا الف لوبډلې ته ماتې ورکړه او د لومړي ځل لپاره یې د یادو سیالیو اتلولي پخپل نوم کړه.

نن یکشنبه د لړم په شپږمه د سنوکر څلور ورزشکاران او یو پلاوی د سنوکر په نړیوالو سیالیو کې د ګډون په موخه قطر ته ولاړل.

یادې سیالۍ به د روان کال د اکتوبر له ۲۸مې د نومبر تر ۹مې د قطر په پلازمېنه دوحه کې ترسره شي.

یادو سیالیو ته د سنوکر نړیوال فدراسیون زیات غړي او لوبغاړي دعوت شوي، چې له افغانستان څخه څلور د سنوکر لوبغاړي او یو پلاوی ګډون پکې کوي.

د یادونې وړ ده، چې دا سیالۍ د ماستران او مردان په برخو کې کېږي او د هېواد ورزشکارانو په پوره چمتووالي سره ګډون پکې کوي.

‌د احصایې او معلوماتو ملي اداره په میاشتني ډول د لګښتي توکو د بیو ارقام راټول او تحلیلوي، چې له مخې یې د روان کال د تلې په میاشت کې د خوراکي توکو په بیو کې ۰.۶ سلنه کموالی راغلی.

دا کموالی ۱.۷ سلنه د غوښې، ۳.۷ سلنه د میوو او ۲.۰ سلنه د شکر او خوږو په بیو کې دی.

له بلې خوا د غیرې خوراکي توکو په بیو کې ۳.۰ سلنه زیاتوالی ښکاري، چې دا زیاتوالی ۴.۱ سلنه یې د البسې او کالیو شاخص، ۴.۰ د استوګنځي او ۳.۴ سلنه یې د کور وسایلو په شاخص کې دی.

‌د روان کال د تلې په میاشت کې د لګښتي توکو د بیو شاخص میاشتنی پړسوب ۱.۶ سلنه زیاتوالی ښيي، چې د پړسوپ دا زیاتوالی تر ډېره د خوراکي توکو (لبنیاتو او سبزیو) او غیرې خوراکي توکو (د البسې او کالیو، استوکنځي او د کور وسایلو شاخص) د بیو د زیاتوالي له امله دی.

همدارنګه د ټکي په ټکي پړسوب له مخې د ۱۴۰۳ کال په تله میاشت کې د تېر کال همدې میاشت په پرتله ۲.۲ سلنه کموالی ښيي.

له بل لوري د روان کال په تله میاشت کې د امریکايي ډالرو پر وړاندې د افغانیو ارزښت ۶۷.۶ افغانۍ او په وږي میاشت کې ۷۰.۲ افغانۍ و، چې د وږي میاشتې په پرتله ۳.۷ سلنه د افغانیو په ارزښت کې زیاتوالی راغلی.

که د افغانیو ارزښت د تېر کال له ورته دورې سره پرتله شي، نو ښکاري چې د امریکايي ډالرو پر وړاندې د افغانیو په ارزښت کې ۱۱.۴ سلنه زیاتوالی راغلی دی.

د الجزیرې د راپور له مخې، د لبنان په سویل کې ۴ نور اسرائیلي عسکر وژل شوي او ګڼ نور ټپيان دي.

د لبنان په سویل کې اسرائیلي یرغلګر د ځمکنیو عملیاتو له پیل وروسته د حزب‌الله غورځنګ له سخت مقاومت سره مخ دي.

اسرائیلي پوځ هم د څلورو نورو عسکرو وژل تایید کړي او ویلي یې دي، چې له حزب‌الله سره په جګړه کې یې څلور عسکر وژل شوي او ګڼ نور ټپيان دي.

په ټپیانو کې د پينځو روغتیايي وضعیت نازک ښودل شوی.

پر لبنان د اسرائیلي یرغلګرو په ځمکنیو عملیاتو کې تر اوسه ۳۶ صهیونیستي عسکر وژل شوي دي.

پر دې سربېره حزب‌الله پر اسرائیلو ډرون او توغندیز بریدونه جاري ساتلي.

تازه صهیونیستي رسنۍ وايي، چې نن یکشنبه د اسرائیلو په شمال کې د ډرون برید له امله دوه کسان ټپیان شوي.

د راپورونو له مخې، په دې برید کې د هوايي چلند اداره په نښه شوې ده.

رویټرز د مکسیکو د ځایي چارواکو په حواله ویلي، چې د دې هېواد په مرکزي ایالت زاکاټکاس کې د یوه بس موټر د ټکر کېدو په پېښه کې ۱۹ کسان مړه او شپږ نور ټپیان دي.

دا پېښه پرون سهار وختي هغه مهال رامنځته شوې، چې د بار ټیلر باډۍ له ټیلر څخه تر جلا کېدو وروسته له بس موټر سره لګېدلې او یاد بس له سړک وتلی او یوې کندې ته لوېدلی دی.

ځايي چارواکو ویلي، چې پلټنې روانې ده او هڅه کېږي، چې د ټیلر موټروان ونیول شي.

سیمه‌ییزو مسولینو رویټرز ته ویلي، چې په سیمه کې د جسدونو پلټنه لا هم جریان لري.

په ټولنیزو رسنیو کې خپاره شوي انځورنه ښيي، چې ژغورنکې ډلې او امنیتي او پوځي کسان په سیمه کې د جسدونو په موندلو او پلټنو بوخت دي.