د افغانستان اسلامي امارت د ریاست الوزرا سیاسي مرستیال مولوي عبدالکبیر د کابل د سوداګرو او کسبګرو د ملاتړ ټولنې له غړو سره لیدنه وکړه.

په دې ناسته کې د سوداګریزو شرکتونو، مارکېټونو او کسبګرو استازو حضور درلود.

هغوی د اسلامي امارت له همکاریو څخه مننه کړې او ویلي یې دي، چې د اسلامي نظام په راتګ سره یې ګڼې ستونزې اوارې شوې دي.

دوی زیاته کړې؛ افغان سوداګر په هېواد کې لا ډېرې پانګونې ته لېواله دي، چې له دې لارې به په مستقیم او غیرې مستقیم ډول زرګونه کاري فرصتونه رامنځته او د اقتصادي ودې سبب شي.

د کابل د سوداګرو او کسبګرو د ملاتړ ټولنې غړو ویلي؛ افغان پانګوال له اسلامي امارت سره د واخان لویې لارې د جوړېدو په برخه کې همکارۍ ته چمتو دي.

همدارنګه که په صنعتي ښارګوټو کې ځمکه ورکړل شي په تولیدي برخه کې به هم کار پیل کړي.

د کابل د سوداګرو او کسبګرو د ملاتړ ټولنې غړو د کابل ښاروالۍ او یو شمېر نورو اړوندو ادارو د چارو د ښه ترسره کېدو په موخه خپل وړاندېزونه د ریاست الوزرا سیاسي مرستیال ته سپارلي.

مولوي عبدالکبیر راغلو سوداګرو ته د ښه راغلاست ترڅنګ ویلي؛ څرنګه چې د اسلامي نظام ټینګښت د ټولو افغانانو شریک ارمان و، نو هر افغان پر حکومت حق لري او کولای شي په زغرده خپل نظریات او غوښتنې له اسلامي نظام سره شریکې کړي.

د ریاست الوزرا سیاسي مرستیال په کور دننه د افغان سوداګرو پانګونه مهمه بللې او یادونه یې کړې، چې اسلامي امارت یې د چارو ملاتړ کوي.

د ناستې په پای کې مولوي عبدالکبیر د سوداګرو د وړاندېزونو په اړه د غور كولو ډاډ ورکړی او ټینګار یې کړی، چې اړونده ادارې به له دوی سره د ستونزو د حل لپاره ګډې ناستې ولري.

چین کې د “یو کمر بند یوه لاره نوښت” د انرژي وزیرانو په درېیم کنفرانس کې د اوبو او انرژي وزیر ملا عبداللطیف منصور ګډون ګډون او وینا کړې.

یاد کنفرانس ته د ملا عبداللطیف منصور د وینا بشپړ متن په لاندې ډول دی:

درنو حاضرینو!

د برېښنا انرژي په سکټور کې نړیوالو همکارانو …

السلام علیکم ورحمة الله و برکاته!

خوشحاله یم، چې د افغانستان د نوي رغنیز بدلون په پړاو کې د انرژي د سکټور د مدیریت او تنظیم ستر او عظیم مسولیت په لرلو سره په دغه برخه کې د آبادۍ د کاروان غړی یم.

له نېکه مرغه په تېرو درې وروستیو کلونو کې مو د برېښنا انرژي د پر ځان بسیا کېدو په لور ستر ګامونه اخېستي او د هېواد د ښېرازي په لور لا نور ورګړندي کیږو.

د الهي نصرت په ملتیا، وروستي پرمختګونه د برېښنا انرژي لپاره ډاډمن او ارزښتناک پړاوونه دي، چې په پلي کېدو سره يې د انرژي وړتیا لوړېږي او په ټوله کې د برېښنا د کموالي تشه کمېږي.

د افغانستان اسلامي امارت دغه ټکي ته په پام او د هېواد د برېښنا د کموالي اصل ته په پاملرنې سره هوډ لري، چې خپله فعاله ونډه د هېواد د بیارغونې د کاروان په روان بهیر کې ولري او ځان ورڅخه وروسته پرې نږدي.

درنو حاضرینو!

لکه څرنګه چې معلومه ده، د لومړنیو اټکلونو او سروې ګانو له مخې، افغانستان کولای شي نږدې ۳۱۸ ګیګاواټه برېښنا د نوې کیدونکې انرژي له سرچینو څخه تولید کړي، چې پکې د اوبو سرچینې (۲۳۰۰۰ میګاواټه)، د باد د انرژي سرچینې (۶۷۰۰۰ میګاواټه)، لمریزه انرژي (۲۲۲۰۰۰ میګاواټه)، جیوترمل انرژي (۳۰۰۰ څخه تر ۳۵۰۰ میګاواټه)، بایوماس انرژی (4000 میګاواټه) شاملې دي.

موږ تمه لرو، چې د هېواد د برېښنا انرژي بازار به په راتلونکو لسیزو کې د یادو مواردو په پام کې نیولو سره ښه وده وکړي، مونږ د افغانستان اسلامي امارت د ستراتیژیکو موخو او لید لوري رښتیا کولو او د برېښنا قانون پلي کولو په موخه خپل پنځه کلن پلان او د نوې کېدونکې انرژي تګلاره جوړه کړې چې د نوې کېدونکې انرژي اصلي تګلاره کې د هېواد پراختیایي برنامو وړاندوینه کوي.

مونږ په دې باور یو، چې ډاډمنې برېښنا ته لاسرسی، خوندیتوب، د انرژي امنیت، او د انرژي په وړاندې کولو کې تعادل، د افغاني ټولنې د اقتصادي او ټولنیز پرمختګ لپاره اړین شرطونه دي.

مونږ خپلې برنامې داسې جوړې کړې تر څو د کورنیو سرچینو څخه د انرژي تأمینول لوړ کړي او د کلیوالو سیمو، لرې پرتو بانډو، د ولایتونو مرکزونو او نورو د مصرف سره سم، د برېښنا انرژي تأمینول لا ښه کړي.

همدارنګه د برېښنا انرژي د جذب وړتیا، د نننیو لومړیتوبونو په تناسب د انرژي د پروژو، د تجارتي مناسب موډلونو ډیزاین او د هغو پلي کول او د مارکېټ د پراختیا پیاوړي کوونکو مشخصول پکې شامل دي.

د افغانستان ستراتیژیک جغرافيايي موقعیت:

افغانستان د منځنۍ آسیا، سویلي آسیا او منځني ختیځ په اوږدو کې پروت هېواد دی، چې د سیمه ییز اتصال لپاره یو مهم ځمکنی پل برابروي. دا دریځ افغانستان د چین د یو کمربند له لارې یو اړین شریک جوړوي، ځکه چې دا کولای شي، د ځمکې له لارې سوداګریزې اړیکې او د انرژي دهلېزونه آسانه کړي، چې چین له اروپا سره نښلوي.

د واخان دهلېز پرانیستل:

د واخان دهلېز پرانیستل به د افغانستان او چین اړيکې نورې هم پراخې کړي. دا لاره د افغانستان شمال ختیځ د چین د سینکیانګ له سیمې سره نښلوي او د سوداګري او انرژي د همکارۍ یوه نوې دروازه خلاصوي. دغه دهلېز به د زیربناوو، پراختیا او د پولې په اوږدو کې سوداګري او د افغانستان له لارې د چین او منځنۍ آسیا تر منځ لوژیستیکي راکړې ورکړې ته وده ورکړي.

د انرژي همکاري او سرچینې:

افغانستان د پام وړ غیر استعمال شوې طبیعي زیرمې لري، طبیعي ګاز او منرالونه د نړۍ د انرژي د لیږد لپاره مهم عناصر دي. د چین هېواد سره زمونږ د هېواد د انرژي د سکټور د همغږۍ هڅې کولای شي د دواړو هېوادونو د ګټو لپاره دا سرچینې خلاصې کړي او د سیمه ییزې انرژي د امنیت ملاتړ وکړي. د انرژي په پروژو کې د افغانستان ښکېلتیا هم کولای شي، زموږ د هېواد د اقتصاد د پياوړتیا سبب او د کار موندنې لپاره مناسب بستر شي.

د منځنۍ آسیا د انرژي د رسولو په سلسله کې د افغانستان رول:

د ترکمنستان او ازبکستان په ګډون د منځنۍ آسیا د انرژي له پلوه بډایه هېوادونو ته د افغانستان نږدېوالی، د انرژي په شبکو کې د یوه مهم غړي په توګه موقعیت لري. د پایپ لاینونو او د انرژي د زیربناوو په پراختیا سره، افغانستان کولای شي له منځنۍ آسیا څخه چین او جنوبي آسیا ته د انرژي د صادراتو د یوې لارې په توګه اغېزمن کار وکړي.

سیمه ییز تجارت او اقتصادي ادغام ته وده ورکول:

په اقتصادي او تجارتي وصل کېدو سره به چین زموږ د هېواد د زیربنا په ښه کولو، د سوداګري د آسانتیا، او بازار ته د لاسرسي په زیاتولو سره د سیمه ییزې اقتصادي ودې په لاره اچولو کې مرسته وکړي. دا ادغام به د انرژي، کانونو او د ځمکني ترانسپورت په برخو کې د لا زیاتو همکاریو لامل شي، چې افغانستان به د سیمه ییزې سوداګري لپاره د یوه مهم مرکز په توګه خپل ځای پيدا کړي.

د چین هېواد له لوري د یو کمربند او یوې لارې په توګه له افغانستان سره نږدې کېدل:

زموږ رغنده ګډون د یو کمربند او یوې لارې په توګه په آسیا، اروپا او افریقا کې د اتصال د زیاتولو لپاره د چین له اوږدمهاله ستراتیژیک لید سره سمون لري. د انرژي په برخه کې د همکاري، سوداګري او د زیربناوو په پراختیا سره، افغانستان کولای شي د چین د پراخو جیوپولیټیک او اقتصادي موخو په ملاتړ کې مهم رول ولوبوي. جنوبي آسیا او هاخوا ته د تګ لاره همداشان او تر وصل وروسته په سیمه کې د برېښنا انرژي د ګډ مارکېټ رامینځته کول یو بل ګټور ګام بللی شو.

دغه راز له پخوانۍ ژمنې سره سم د صنعتي هېوادونو له خوا د دوامدارې انرژي په تولید سره زمونږ د هېواد د انرژي د سکټور پراختیا او د ګلخانه يي ګازاتو کمول چې افغانستان ورڅخه رنځ وړي.

باید یادونه وکړم چې د افغانستان ستراتیژیک موقعیت کولای شي د یوه ارتباطي پل په توګه کار وکړي، چې په دې سره منځنۍ آسیا له جنوبي آسیا سره ونښلوي، د سوداګري، زیربناوو پراختیا او د انرژي د لېږد لپاره نوي فرصتونه پرانیزي. یاد هېوادونه د یو کمربند او یوې لارې په توګه د افغانستان له خاورې څخه د سیمه ییز اتصال د پراختیا لپاره کار واخلي، چې ګټې یې له نږدې ګاونډیانو څخه د سویلي آسیا بازارونو ته پراخیږي.

د سیمې سولې او ثبات ته د افغانستان ژمنتیا:

د یو کمربند او یوې لارې په څیر په سیمه ییزو پروژو کې په فعاله توګه د ښکېلتیا له لارې، افغانستان په سیمه کې د سولې، ثبات او اقتصادي پرمختګ لپاره خپله ژمنه څرګندوي. دا همکاري کولای شي سیاسي ثبات ته وده ورکړي او په سیمه کې د مهمو زیربناوو پانګونې لپاره امنیت تضمین کړي.

ظرفیت پيدا کول او له نړیوالو سره همغږي کېدل:

لکه څرنګه چې څرګنده ده، افغانستان له نوې تکنالوژۍ سره د همغږو برنامو لرل خپل ستراتیژیک اهداف بولي، غواړم چې له دغه فرصت څخه په ګټې اخیستنې سره یادونه وکړم چې د چين هېواد او نور سیمه ییز هېوادونه کولای شي د لنډ مهاله او منځ مهاله پروګرامونو په ترڅ کې زموږ تخنیکي همکاران وروزي او د ظرفیت په لوړولو او نړۍوالو تجاربو په تر لاسه کولو کې همکاري وکړي.

د افغانستان اسلامي امارت د ریاست الوزرا سیاسي مرستیال مولوي عبدالکبیر په دوو جلا ناستو کې د ننګرهار له یو شمېر قومي مخورو او مشرانو سره لیدنه وکړه.

په لومړۍ ناسته کې د مومندو، شینوارو او خوګیاڼیو د قومونو مخورو ویلي، چې د اسلامي نظام ملاتړ کوي او له حکومت سره په هېواد کې د بشپړ امن د ساتلو په موخه همکار دي.

د یادو قومونو مشرانو او مخورو د ریاست الوزرا د سیاسي معاونیت له همکاریو په مننې زیاته کړې، چې تل یې د اسلامي امارت لخوا غږ اورېدل شوی او وړاندېزونو ته یې د مسوولو ادارو لخوا رسېدنه شوې ده.

دوی د اسلامي نظام راتګ د لویو ناخوالو د پای سبب یاد کړی او خپل ځينې وړاندېزونه او سلا مشورې یې د ریاست الوزرا سیاسي مرستیال سره شریکې کړې دي.

په دویمه ناسته کې د ننګرهار د شینوارو له شپږو ولسوالیو راغلو قومي مخورو او علماوو د ریاست الوزرا د سیاسي مرستیال له همکاریو په مننې ویلي، چې ننګرهار کې د شینوارو ستونزې د اسلامي امارت د چارواکو لخوا اوارې شوې او ولسونه له دغه اقدام څخه خوښ دي.

دوی زیاته کړې، چې په هر ډګر کې له حکومت سره همکاري او ملاتړ یې کوي.

دغه راز دوی د یو لړ مسائلو په هکله خپلې سلا مشورې او نظرونه د ریاست الوزرا له سیاسي مرستیال سره شریک کړي او د حکومت لخوا یې په شینوارو کې د سړک د رغولو وړاندېز کړی دی.

مولوي عبدالکبیر د ننګرهار قومي مخورو ته د ښه راغلاست پرمهال ویلي، چې د ولس غږ اورېدل او د هغوی وړاندېزونو ته رسېدنه د اسلامي امارت مسولیت دی.

سیاسي مرستیال زیاته کړې، چې د مسولو حکومتي ادارو لخوا د ننګرهار په ځینو سیمو کې له بې‌وزلو سره د مرستې لړۍ پیل شوې او هیله ده، چې د یاد ولایت نورو سیمو ته به هم وغزول شي.

نوموړي ډاډ ورکړی؛ ملت دې ډاډمن اوسي چې په ملي او دیني ارزښتونه معامله نه کیږي او څرنګه چې اسلامي امارت له ملت راټوکېدلی همدارنګه د ولسونو غږ او غوښتنې په وخت سره اوري.

په پای کې مولوي عبدالکبیر په ټینګار سره ویلي، چې د ننګرهار د ولسونو غوښتنې به له اړوندو ادارو سره شریکې شي او د حل لپاره به یې هڅې وشي.

د افغانستان اسلامي امارت د ارشاد، حج او اوقافو وزیر شیخ نورمحمد ثاقب په رسمي بلنه د اوزبیکستان هېواد د مسلمانانو د ادارې مشر شیخ مفتي نورالدین خالق نظر په مشرۍ مل پلاوی پلازمېنه کابل ته را ورسېد.

د یاد هېواد لوړ رتبه علماوو پلاوی به د افغانستان اسلامي امارت له لوړ پوړو چارواکو، مسولینو او منسوبینو سره په جلا جلا کتنو کې د دوه اړخېزو اړیکو او همکاریو په پیاوړتیا خبرې وکړي.

دغه‌راز په دیني او ښوونیزو موضوعاتو به د دواړو هېوادونو (افغانستان او اوزبیکستان) د علماوو ترمنځ د اړیکو پراختیا او پرمختګ، د جوماتونو او مدرسو په چارو کې به یو له بل سره همکاري او تجربې شریکې کړي او همدا راز به د افغانستان له تاریخي، مقدسو او مشهورو ځایونو څخه لیدنې وکړي.

د امر بالمعروف، نهی عن‌‌المنکر او شکایتونو اورېدلو وزیر شیخ محمد خالد الحنفي د‌ ولایتي سفرونو په دوام لوګر ولایت ته ولاړ.

نوموړي په یاد ولایت کې د عالیقدر امیر المؤمنین حفظه الله د فرمانونو، حکمونو او لارښوونو ترڅنګ د امر بالمعروف او نهی عن‌المنکر قانون د لا ښه پلي کېدو، معروفاتو اقامې او منکراتو مخنیوي، همغږۍ، عامه پوهاوي او د خلکو د ستونزو اورېدو په موخه د دې ولایت له ځایي مسولینو، علماء کرامو، خطیبانو، قومي مخورو او د ګذر له وکیلانو سره لیدنه کړې.

په دې لیدنه کې شیخ محمد خالد الحنفي ټینګار کړی، چې هېڅوک حق نه لري ترڅو د ناوړه دودونو پر اساس د ښځو حقوق تر پښو لاندې کړي.

نوموړي زیاته کړې، چې موږ د ښځو د ټولو شرعي حقوقو ورکړې ته ژمن یو او هر هغه څوک، چې په یاده برخه کې شکایت لري شکایت یې اورېدل کېږی او حل کېږي.

د ښاغلي الحنفي په وینا؛ د تاریخ په اوږدو کې بېلابېلو ښکېلاګرو د خپلو موخو او لیدلورو پلي کولو په موخه پر افغانستان یرغل کړی، خو هر یو یې د افغان مېړني ولس له غاښ ماتوونکي ځواب سره مخ شوی دی.

د امر بالمعروف او نهی عن‌‌المنکر وزیر له ګډونوالو غوښتي، ترڅو د امر بالمعروف او نهی عن‌المنکر قانون ترڅنګ د اسلامي شريعت پلي کولو او تر نورو رسولو کې له محتسبینو سره مرسته وکړي.

شیخ صاحب همداراز زیاته کړې؛ محمدي امت ځکه ځانګړی دی، چې امر بالمعروف او نهی عن‌المنکر ترسره کوي.

دغه‌راز محتسبین او دیني عالمان باید د ښه چلند او لارښوونو له لارې د منکراتو او معروفاتو په اړه ټولنې ته پوهاوی ورکړي.

ورته مهال د لوګر اوسېدونکي، قومي مشران او امارتي مسولین وايي، چې امر بالمعروف او نهی عن‌ المنکر د اسلامي نظام ځانګړنه ده او د اسلامي امارت ټول مسولین د اسلام او جهاد د ارزښتونو ساتلو ته ژمن دي.

هغوی ډاډ ورکړی، چې د اسلامي امارت مشرتابه فرمانونو، حکمونو او لارښوونو پلي کولو سربېره د امر بالمعروف او نهی عن‌المنکر وزارت د محتسبینو ترڅنګ ولاړ دي او له هېڅ ډول همکارۍ او همغږۍ څخه به درېغ ونه کړي.

ښاغلي الحنفي د یوې جلا ليدنې په ترڅ کې د یاد ولایت د مرکز او ولسوالیو له محتسبینو سره هم لیدنه کړې.

هغوی ته یې د چارو د ښه مخته وړلو او همغږۍ رامنځته کولو په موخه اړینې لارښونې او سپارښتنې کړې او ترې غوښتي یې دي، ترڅو د امر بالمعروف او نهی عن‌المنکر قانون په رڼا کې خپلې چارې په ښه چلند او ژمنتیا مخته یوسي.

د پانګونې بین‌الوزارتي کمېټې نوبتي غونډه د روان ۱۴۰۳ لمریز کال د عقرب میاشتې په لومړۍ نېټه په مرمرینه ماڼۍ کې ترسره شوه.

دې غونډې ته له اجنډا سره سم په جوزجان ولایت کې له طبیعي ګازو د ۵۰ مېګاواټه، د کابل ولایت په سروبي ولسوالۍ کې له ډبرو سکرو څخه د ۱۰۰ مېګاواټه، په کابل ولایت کې له جامدو کثافاتو او په سمنګان ولایت کې د لسګونو مېګاواټه بادي برېښنا د تولید، د کرنیز کمپلکس پر طرحې او همدا راز په غزني ولایت کې د پینځه زره ټنه ظرفیت په درلودو سره د سړې خونې د جوړولو طرحې د بحث لپاره وړاندې شوې.

په غونډه کې د یادو طرحو له هر اړخیزې ارزونې وروسته ټاکل شوو کمېټو ته دندې سپارل شوې، تر څو د یادو طرحو له وړاندې کوونکو شرکتونو سره تخنیکي بحثونه ترسره او خپل راپورونه په ټاکل شویو نېټو د پانګونې بین‌الوزارتي کمېټې ته وړاندې کړي.

د المپيک کمېټې، بدني روزنې او ورزش عمومي ریاست اړوند د پارولیفټینګ ملي فدراسیون له لوري د کابل ښار د ۹۰ ورزشکارانو ترمنځ په تک‌بنج پرس سبک د پاورلیفټینګ شپږم پړاو سیالۍ پيل شوې.

دا سیالۍ به د کابل ښار د بېلا بېلو کلبونو د ورزشکارانو ترمنځ د نویو ځوانانو، ځوانانو، لویو ورزشکارانو او د تجربه لرونکو ورزشکارانو ترمنځ ترسره شي، چې دوې ورځې به دوام وکړي.

د یادو سیالیو پرانیست‌غونډه کې د المپیک کمېټې، بدني روزنې او ورزش عمومي ریاست فني او مسلکي مرستیال حافظ احمد جان ځدراڼ، د پارولیفټینګ ملي فدراسیون رهبري، ورزشکارانو او زیات شمېر مینوالو ګډون کړی و.

د دې سیالیو موخه په تک‌بنج پرس سبک کې د غوره لوبغاړو موندل او د ورزشکارانو د ظرفیت لوړول ښودل شوي دي.