د مهاجرینو ستونزو ته د رسېدنې عالي کمېسیون دارالانشاء

د کمېټو ورځنی کاري راپور

د شنبې ورځ، د ۱۴۴۶/۴/۹ هـ ق نېټه چې۱۴۰۳/۷/۲۱ هـ ل نېټې سره، سمون خوري، د هېواد له بېلابېلو لارو څخه افغان مهاجرین راستانه شوي او په بېلابېلو برخو کې ورته اړین خدمات وړاندې شوي چې بشپړ راپور یې په لاندې ډول وړاندې کیږي:

ننـــــــــګرهــــــار

تورخم (ډیورنډ فرضي کرښه)

د ثبت، تثبیت او استقبال کمېټه:

د تورخم له لارې (۴) کورنۍ هېواد ته راستنې او د نوموړو کورنیو (۲۲) تنه غړي، ثبت او بایمیټریک شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۴) کورنیو سره مجموعًا (۳۲۰۰۰) افغانۍ کیږي.

د لنډمهاله مېشتېدنې کمېټه:

نن (۱۰۱) کورنۍ د تورخم په عمري کمپ کې مېشتې کړل شوي دي.

د خدماتو او روغتیايي چارو کمېټه:

د تورخم په عمري کمپ کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په تورخم کې (۴۲۰) خوراکه ډوډۍ او اوبه ویشل شوي دي.

مخابرات: راستنو شویو مهاجرینو ته (۳۳) عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، توزیع شوي دي.

په تورخم کې مهاجرینو ته ځینې البسه لکه توشکې بړستنې او داسې نور شیان هم توزیع شوې دي.

کنــــــــــــــدهار

سپین بولدک (ډیورنډ فرضي کرښه)

د ثبت، تثبیت او استقبال کمېټه:

د سپین بولدک له لارې (۱۶) کورنۍ چې د غړو شمېر یې (۷۰) تنه و، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۱۷) کورنیو سره مجموعًا (۱۲۶۰۰۰) افغانۍ کیږي.

د لنډمهاله مېشتېدنې کمېټه:

نن (۸۳) کورنۍ د تخته پل په کمپ کې مېشتې کړل شوي دي.

د خدماتو او روغتیايي چارو کمېټه:

په سپین بولدک کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په سپین بولدک کې (۱۶۶) خوراکه ډوډۍ او اوبه ویشل شوي دي.

روغتیا: په سپین بولدک کې (۶۸) تنه راستانه شوي مهاجرین تداوي شوي دي.

همدارنګه (۲۲۳) تنه مهاجرینو ته د روغتیا په بېلا بېلو برخو کې عامه پوهاوی ورکړل شوی دی.

البسه: په لنډ مهاله کمپونو کې د اړتیا سره سم خیمې، کمپلې او توسان مهاجرینو ته وېشل شوي دي.

مخابرات: د مخابراتي خدماتو د ادارې له لوري، راستنو شویو مهاجرینو ته (۵۳) عدده سیمکارتونه په وړیا توګه چې وړیا دقیقې او د انټرنټي بستې هم پکې فعاله وې، وېشل شوي دي.

نیمروز

ورېښمو لار

د لنډمهاله مېشتېدنې کمېټه:

نن (۱۳۶) کورنۍ د نیمروز په موقت کمپ کې مېشتې کړل شوي دي.

د اطلاعاتو او عامه پوهاوي کمېټه:

د نیمروز ولایت د ورېښمو په لار کې مهاجرینو ته عامه پوهاوی ورکړل شو. یادو مهاجرینو ته د دوی د ثبت، لیږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شو.

هرات

اسلام کلا

د تثبیت، ثبت او استقبال کمېټه:

د اسلام کلا له لارې (۱۳) کورنۍ چې د غړو شمېر یې (۴۷) تنه و، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۱۳) کورنیو سره مجموعًا (۹۴۰۰۰) افغانۍ مرسته شوې ده.

د لنډمهاله مېشتېدنې کمېټه:

نن (۱۲) کورنۍ د اسلام کلا او (۵) کورنۍ د پکتیا کمپ کې مېشتې کړل شوي دي.

کابل

مرکز

د ټراسپورټ او لیږد کمېټه:

له کابل څخه (۱۲) کورنۍ چې د غړو شمېر یې (۴۷) تنه و، کندوز، بلخ،E جوزجان ولایتونو ته په خوندي توګه لېږدول شوې دي او یادو کورنیو ته (۶۱۶۰۰) افغانۍ کرایه هم ورکړل شوې ده.

د ټولو کمېټو د بېلا بېلو کړنو ټولیز ارقام په لاندې توګه دي:

ثبت شوي مهاجرین: (۳۳) کورنۍ او (۱۳۹) افراد

لېږدول شوي مهاجرین: (۱۲) کورنۍ او (۴۷) افراد

مرسته شوي مهاجرین: (۳۴) کورنۍ

موقت ميشت شوي مهاجرین: (۳۳۷) کورنۍ

وېشل شوي سیمکارتونه: (۸۶) عدده

د مهاجرینو ستونزو د رسېدنې عالي کمېسیون دارالانشاء

د فلسطین روغتیا وزارت وايي، چې غزه کې د اسرائیلي یرغلګرو د روانو بریدونو له امله ۴۲ زره او ۲۲۷ فلسطیینیان شهیدان او ۹۸ زره او ۴۶۴ نور ټپیان شوي دي.

یاد وزارت زیاتوي، چې په تېرو ۲۴ ساعتونو کې د اسرائیلي رژیم د بریدونو له امله ۵۲ فلسطینیان شهیدان او ۱۲۸ نور ټپیان شوي.

پر دې سربېره زرګونه کسان د ویجاړو شویو ودانیو تر خاورو لاندې دي.

غزه کې د اسرائیلي یرغلګرو د وحشتونو پر دوام د دې تړانګې په شمال کې د کډوالو د جبالیا کمپ سخته محاصره نهمې ورځې ته غځېدلې.

په یاد کمپ کې ګڼ کورونه ویجاړ شوي او په بېلابېلو برخو کې یې د هوايي بریدونه له امله اورونه لګېدلي دي.

الجزیرې د غزې د روغتیايي مسولینو له قوله خبر ورکړی، چې شمالي غزه کې د اسرائیلي یرغلګرو نهه ورځنۍ پوځي محاصره کې د ښځو او ماشومانو په ګډون لږ تر لږه ۲۰۰ کسان شهیدان شوي.

جبالیا غزه کې د بې‌ځایه شویو فلسطینیانو تر ټولو لوی کمپ دی.

نن سهار هم اسرائیلي عسکرو د جبالیا سوېلي سیمو اوسېدونکو ته له خپلو مېنو د وتلو امر کړی و.

صهیونیستي عسکرو ۹ ورځې وړاندې د جبالیا په سیمه کې وژونکي بریدونه پیل کړي، چې د بې‌پولې ډاکټرانو د نړیوال سازمان په وینا؛ د دې بریدونو له امله زرګونه عام فلسطینیان په دام کې لوېدلي دي.

پوهنې وزیر مولوي حبیب الله اغا د بادغیس ولایت پوهنیز وضعیت ارزونې په موخه یاد ولایت ته سفر کړی.

په پیل کې مولوي حبیب الله اغا د بادغیس له پوهنې رییس مولوي محب الله احسان او مسولینو سره په لیدنه کې د پلاوي سفر موخې شریکې کړي.

ورپسې د یاد ولایت پوهنې رییس د پوهنې وزارت د رهبرۍ په شتون کې د خپلو اړوندو ادارو د دندو لنډ راپور وړاندې کولو ترڅنګ یو لړ وړاندیزونه او ستونزې هم د پوهنې له وزیر سره شریکې کړې دي.

په ورته مهال مولوي حبیب الله اغا د یاد ولایت د پوهنې مسولینو سره په ملتیا قادس ولسوالۍ ته ولاړ او د حضرت ابوبکر صدیق ^{رضی الله عنه}، حضرت عمر فاروق ^{رضی الله عنه} له مدارسو، د حضرت سلمان بن فارسی ^{رضی الله عنه} له دارلعلوم او د حمعیت قادس لېسې څخه لیدنه کړې.

نوموړي په دې لیدنه کې، چې د يادو ښوونیزو بنسټونو له مسولينو او استادانو سره يې درلوده، په خپلو خبرو کې هغوى ته ډاډ ورکړی، چې د مدارسو او ښوونځيو د ستونزو په هواري کې به له هېڅ راز هلو ځلو ډډه ونه کړي او د هېواد د پوهنیز نظام لا ښه والي لپاره به تر خپل توان هر ډول هڅې وکړي.

د کډوالو او راستنېدونکو چارو وزارت مسلکي مرستیال مولوي عبدالرحمن راشد او پلاوي د احصایې او معلوماتو ملي ادارې

له عمومي رییس عبدالقاهر ادریس سره لیدنه کړې.

په یاده لیدنه کې افغان کډوالو او بېرته راستنېدونکو هېوادوالو ته د تابعیت پېژندپاڼو د وېش او د هویت د تثبیت په تړاو پر اسانتیاوو خبرې شوي او په دې برخه کې په لا ډېرې همغږۍ او د کارونو پر لا تنظیم ټینګار شوی.

د احصایې او معلوماتو ملي ادارې عمومي رییس عبدالقاهر حاجي ادریس ویلي؛ هېوادوالو ته د متوازنو، چټکو او پر وخت د تابعیت پېژندپاڼو او نورو اړوندو خدمتونه وړاندې کولو ته ژمن یو.

د یادونې وړ ده، چې د احصایې او معلوماتو ملي اداره د هېواد دننه او بهر د افغانانو د هویت د تثبیت او د نفوسو د احوال ثبتولو (د کاغذي او برېښنایي پېژندپاڼو وېش) د یوازینۍ او معتبرې مرجع په توګه فعالیت کوي او هره ورځ په زرګونو هېوادوالو ته اړوند خدمتونه وړاندې کوي.

د روان ۱۴۰۳ هـ.ل کال په دویمه ربعه کې په ګمرکونو کې د ترسره شويو چارو د تخنیکي ارزونې ناسته، د مالیې وزارت د ګمرکونو لوی رییس مفتي عبدالمتین سعید په مشرۍ پر لیکه او حضوري بڼه جوړه شوه.

په دغه ناسته کي د روان ۱۴۰۳ هـ.ل کال په دویمه ربعه کې په ګمرکونو کې د ترسره شویو فعالیتونو ټولیز راپور وړاندې شو؛ په یاده موده کې د عوایدو د راټولېدو، د هېواد په ګمرکونو کې د ترسره شوې سوداګرۍ، د وارداتي توکو د ګمرکي ارزښت او د سوداګریزو محمولو د شمېر او ثبت شوي وزن په اړه بشپړ معلومات وړاندې شول، چې له مخي یې د تېر کال د همدې مودې په پرتله، د ګمرکونو چارې ۱۸ سلنه مثبتې ښودل شوي.

د وړاندې شوي راپور په تړاو هر اړخیز تخنیکي بحثونه وشول او د چارو د لا پرمختګ په موخه د ولایتي ګمرکونو د مسولینو ستونزې او وړاندیزونه واورېدل شول، چې د ګمرکونو د رهبرۍ له لوري د ستونزو د حل ډاډ ورکړل شو او ور سره اړینې سپارښتنې هم شریکې شوې.

په دغه ناسته کې همداراز د روان کال د لومړیو شپږو میاشتو د سوداګرۍ هر اړخیز تحلیل وشو، چې له مخې یې د تېر کال د همدې مودې په پرتله هېواد ته د سوداګریزو توکو واردات ۳۲ سلنه زیات شوي دي.

د چاپېریال ساتنې ملي ادارې عمومي رییس مولوي مطیع الحق خالص تېره ورځ (شنبه د ۱۴۰۳کال د تلې په ۲۰مه) نېټه د پیاوړتیا لوړولو، چاپېریال ساتنې او بشري مرستو (رها) موسسې له رییس محمد یوسف حمیدیان او مرستیال انجنیر عزت الله صدیقي سره د چاپېریالي ستونزو او ګواښونو په تړاو د عدالت غوښتنې او اړیکو د ټینګښت پروژې د پلي کېدو څرنګوالي په اړه خبرې کړي.

په پیل کې د رها موسسې مرستیال انجنیر عزت الله صدیقي د خپلو فعالیتونو او پروګرامونو د پلي کېدو او څرنګوالي په اړه معلومات وړاندې کړي او ژمنه یې کړې، چې د چاپېریال ساتنې ملي ادارې سره به په ګډه همکارۍ او همغږۍ د عدالت غوښتنې او اړیکو د ټینګښت تر عنوان لاندې پروژه چې ۱۵ بېلابېل پروګرامونه لري، په پینځو ولایتونو کې به د زونونو په کچه پلي کړي.

ښاغلي صدیقي زیاته کړې؛ په یادو پروګرامونو کې د چاپېریالي مسایلو په تړاو د نړیوالو ارګانونو، د پوهنتون استادانو، علمای کرامو، محصلینو او ژورنالیستانو سره مشورتي، د ظرفیت لوړونې او عامه پوهاوي موضوعات شامل دي، چې د چاپېریال ساتنې ملي ادارې په همکارۍ او همغږۍ به پلي شي.

نوموړي ویلي، موږ به هڅه وکړو چې د نړیوالو ارګانونو او رسنیو له لارې په COP29 نړیوال کنفرانس کې د افغانستان د استازو د ګډون لپاره د عدالت غوښتنې غږ پورته کړو.

د چاپېریال ساتنې ملي ادارې عمومي رییس مولوي مطیع الحق خالص ویلي؛ د لسیزو جګړو، اقلیمي بدلون او اقتصادي پابندیو له امله د افغانستان خلک له ډیرو ستونزو سره لاس او ګریوان دي او هر څوک چې د دې خلکو د هوساینې لپاره د چاپېریال ساتنې یا په نورو برخو کې عملي اقدامات کوي کارونه یې د ستایلو دي.

ښاغلي خالص ټینګار کړی، چې موږ باید په فزیکي توګه اقدام وکړو.

نوموړي د یادې موسسې له مسولینو غوښتنه کړې، چې باید عملي کارونه وشي ترڅو خلک چاپېریال ساتنې ته وهڅول شي او دې برخې ته یې توجه راجلب کړو.

د چاپېریال ساتنې ملي ادارې عمومي رییس زیاته کړې؛ موږ هڅه کوو چې بشري اړخ پر سیاسي هغه قوي کړو او کله چې چاپېریالي موضوعات له سیاست څخه و ایستل شي بیا به عملي کارونو ته لار پرانستل شي.

نوموړي ډاډ ورکړی، چې موږ کلک هوډ لرو او د دې مظلوم ملت د هوساینې لپاره شپه او ورځ خدمت کولو ته چمتو یوو او نور خلک هم خدمت کولو ته هڅوو.

د رها موسسې رییس محمد یوسف حمیدیان ژمنه کړې، چې د اقلیمي بدلون سره د سازښت او مبارزې په برخه کې داسې پروګرامونه لري چې په عملي او فزیکي توګه به خلکو ته کار کوي.

نوموړي هیله څرګنده کړې، د اوسنیو پروګرامونو په پلي کېدو سره به راتلونکي کې په عملي توګه د چاپېریالي پروژو د تطبیق لپاره زمینه برابره شي.

د لیدنې په پای کې د ګډ کار کولو ژمنه او ټینګار شوی، چې د یوې پریکړې له لارې باید ټولې چارې ترسره شي.

د وفا خبري اژانس د راپور له مخې، اسرائیلي یرغلګرو نن سهار د کډوالو په نصیرات کمپ کې پر یوه کور هوايي برید کړی، چې د ۶ ماشومانو په ګډون د یوې کورنۍ ۸ غړي پکې شهیدان او ګڼ نور ټپیان شوي.

په یاد راپور کې د برید قربانیان شپږ ماشومان او د دوی مور او پلار ښودل شوي دي.

د وفا د راپور له مخې، څلور نور فلسطینیان جبالیا کمپ کې د برید له امله شهیدان او یو شمېر نور ټپیان شوي دي.

غزه کې د اسرائیلي یرغلګرو د وحشتونو پر دوام د دې تړانګې په شمال کې د کډوالو د جبالیا کمپ سخته محاصره نهمې ورځې ته غځېدلې.

په یاد کمپ کې ګڼ کورونه ویجاړ شوي او په بېلابېلو برخو کې یې د هوايي بریدونه له امله اورونه لګېدلي دي.

الجزیرې د غزې د روغتیايي مسولینو له قوله خبر ورکړی، چې شمالي غزه کې د اسرائیلي یرغلګرو نهه ورځنۍ پوځي محاصره کې د ښځو او ماشومانو په ګډون لږ تر لږه ۲۰۰ کسان شهیدان شوي.

اسرائیلي یرغلګرو پرون شنبه شمالي غزه کې جبالیا کمپ ته نږدې اوسېدونکو ته د خپلو سیمو د پرېښودو او سویل ته د تګ امر کړی.

صهیونیستي عسکرو ۹ ورځې وړاندې د جبالیا په سیمه کې وژونکي بریدونه پیل کړي، چې د بې‌پولې ډاکټرانو د نړیوال سازمان په وینا؛ د دې بریدونو له امله زرګونه عام فلسطینیان په دام کې لوېدلي دي.

د یادونې وړ ده، چې پر غزه د صهیونیستي یرغلګرو د بریدونو له پیل راهیسې ۴۲ زره او ۱۷۵ فلسطینیان شهیدان او ۹۸ زره او ۳۳۶ نور ټپیان شوي دي.

د افغانستان برېښنا شرکت عمومي اجراییوي رییس ډاکټر عبدالباري عمر د ایران برېښنا رسونې (توانیر) ملي شرکت له رهبرۍ سره د ویډیو کانفرانس له لارې پر ګڼو اړخونو خبرې کړي او د دوه اړخیزه همکاریو پر دوام او پیاوړتیا یې ټېنګار کړی.

دې ویډیو کانفرانس کې د ایران له لورې د برېښنا د یو شمېر پراختیايي پروژو، د برېښنا ستونزو پر وخت حل او د بشپړې همغږۍ له مخې د چارو پرمخ وړل او تنظیم په اړه هر اړخیزې خبرې شوي.

د ایران برېښنا رسونې (توانیر) ملي شرکت رهبرۍ افغانستان کې د برېښنا انرژۍ تولید برخو کې د ایراني پانګوالو پانګونې ته لیوالتیا ښودلې.

په ورته مهال د افغانستان برېښنا شرکت عمومي رییس ډاکټر عبدالباري له لورې ورته هرکلی ویل شوی او افغانستان کې د پانګونې هر ډول اسانتیاوو برابرولو بشپړ ډاډ ورکړل شوی دی.

د لبنان روغتیا وزارت ویلي، چې د تېرې سپټمبر میاشتې راهیسې، کله چې اسرائیلي یرغلګرو پر لبنان بریدونه زیات کړي، لږ تر لږه ۱۶۴۵ کسانو ژوند بایللی.

یاد وزارت زیاته کړې، چې د تېر کال له اکتوبر میاشتې راهیسې د اسرائیلي یرغلګرو د بریدونو له امله د ۱۲۷ ماشومانو او ۲۶۱ ښځو په ګډون ۲ زره او ۲۵۵ کسانو ژوند بایللی. دغه‌راز ۱۰ زره او ۵۲۴ نور ټپیان شوي دي.

لبنان کې لا هم د اسرائیلي یرغلګرو بریدونه روان دي. د یاد هېواد د روغتیايي مسولینو په وینا؛ پرون د اسرائیلو په بریدونو کې ۲۶ کسانو ژوند بایللی او ۱۴۴ نور ټپیان شوي دي.

د راپورونو له مخې، اسرائیلي رژیم د لبنان په سویل کې د ۲۲ کلیو اوسېدونکو ته امر کړی، تر څو له خپلو سیمو ووځي او شمالي نهر الاولي سیمو ته ولاړ شي.

دوی ته خبرداری ورکړل شوی، تر هغو دې خپلو کورونو او سیمو ته نه را ګرځي، تر څو چې هلته جګړه روانه وي.