د ریاست الوزرا سیاسي مرستیال مولوي عبدالکبیر په سپېدار ماڼۍ کې د کابل پوهنتون د ټولنیزو علومو پوهنځي د افغانستان پېژندنې ماسټرۍ پروګرام له مسولینو او محصلینو سره لیدنه کړې.
په دې لیدنه کې د ټولنیزو علومو پوهنځي رییس پوهنمل حسین احمدزي د یاد پوهنځي په اړه د ریاست الوزرا سیاسي مرستیال ته معلومات ورکړي او ویلي یې دي؛ په دې پوهنځي کې د افغانستان پېژندنې د ماسټرۍ پروګرام تازه پیل شوې، چې لومړنۍ دوره فارغ کادرونه یې ټولنې ته وړاندې کړي.
نوموړي زیاته کړې، د دې پروګرام مسولین او محصلین هڅه کوي د خپلو علمي څېړنو او کنفرانسونو پرمټ نړۍ ته د افغانستان رښتینی انځور وړاندې کړي.
پوهنمل حسین احمدزي، په یاده برخه کې دې اسلامي امارت څخه غوښتنه کړې، چې د دوی لاسنیوی او ملاتړ یې وکړي.
ورپسې د کابل پوهنتون د ټولنیزو علومو استاد ډاکټر فیض محمد ځلاند ویلي، د خوښۍ ځای دی چې نن د پوهنتون استادان او محصلین کولی شي له خپلو مسولو مسولینو سره خپلې علمي لاسته راوړنې او ستونزې شریکې کړي.
نوموړي غوښتنه کړې، چې ځوانو کادرونو ته دې د افغانستان په سیاسي لیدلوري او مسلکي برخه کې د جذب زمینه برابره شي.
دغهراز محصلینو د ریاست الوزرا د سیاسي معاونیت سیاسي فعالیتونه او پرمختګونه ستایلي او ویلي يې دي، اسلامي امارت په کمه موده کې ډېرې لاسته راوړنې لري.
دوی له اسلامي امارت د تاریخ او کلتور ملي کمېسیون د جوړېدو غوښتنه کړې، څو د افغانستان کلتور او تاریخ ژوندی وساتي.
د ریاست الوزرا سیاسي مرستیال مولوي عبدالکبیر له مسولینو او محصلینو څخه د مننې تر څنګ د افغانستان پېژندنې د پروګرام په پیل خوښي ښودلې او په یاده برخه کې یې د استادانو او مسولینو هڅې ستایلي.
مولوي عبدالکبیر ویلي، محصلین دې بهرمیشتي افغان کادرونه افغانستان ته را دعوت کړي.
دغهراز نوموړي له محصلینو سره د اسلامي امارت، سیمې او نړۍ په اړه معلومات شریک کړي او د هغوی پوښتنو ته یې ځوابونه ویلي دي.
د دې ترڅنګ مولوي عبدالکبیر په دې لیدنه کې محصلینو ته د افغانستان د وضعیت، پرمختګونو او لاسته راوړنو په اړه معلومات ورکړي.
نوموړي ویلي؛ په تېر ۲۰ کلن جهاد او قربانیو کې ولسونو، د پوهنتون استادانو، محصلینو او علماوو برخه اخیستې او اسلامي امارت دوی په جهاد او اسلامي نظام کې شریک بولي او د اسلامي نظام ساتنه او تقویت د ټولو ګډه دنده ده.
د ریاست الوزرا سیاسي مرستیال زیاته کړې؛ اسلامي امارت د اسلامي نظام د ټېنګښت او تقویت ترڅنګ په سیاسي او اقتصادي میدان کې د افغانستان ځلولو هڅه کړې، چې دا مهال اسلامي امارت په بېلا بېلو هېوادونو کې ۴۰ رسمي استازولۍ لري او له نړۍ سره تعامل مثبت لور ته روان دی.
مولوي عبدالکبیر ویلي، اسلامي امارت له ګاونډیو او نړیوالو هېوادونو سره نېکې اړیکې غواړي، خو د اسلام پر اصولو سودا ته هیڅکله حاضر ندی او نه به د نورو د خوښۍ لپاره اسلامي ارزښتونه تر پښو لاندې کړي.
د ریاست الوزرا سیاسي مرستیال زیاته کړې، اسلامي امارت د هیچا په کورنیو چارو کې لاسوهنه نه کوي او نه بل چاته زموږ په داخلي چارو کې د لاسوهنې اجازه ورکوي.