د احصایې او معلوماتو ملي اداره وايي؛ هېوادوالو ته د اسانتیا او په چټکۍ د عامه خدمتونو د وړاندې کولو په موخه په ننګرهار ولایت کې اسان خدمت مرکز تېره ورځ پنجشنبه د (غويي ۴مه/ د شوال المکرم ۲۶مه) د یو لړ رسمي مراسمو په ترڅ کې پرانېستل شو.
په دې تړاو جوړو شویو مراسمو کې د احصایې او معلوماتو ملي ادارې لوی رییس عبدالقاهر ادریس، د ولایت مرستیال مولوي عزیز الله مصطفي، د یاد ولایت د احصایې او معلوماتو رییس قاري عارفالله حنیف حمزه، ګڼو نورو ولایتي چارواکو، علماوو، قومي مشرانو او د اسان خدمت مرکز کارکوونکو ګډون کړی و.
د احصایې او معلوماتو ملي ادارې لوی رییس د ننګرهار ولسونو ته په دې ولایت کې د اسان خدمت مرکز د پرانېستې مبارکي وویله او زیاته یې کړه، ټوله هڅه یې دا ده، ترڅو هېوادوالو ته د عامه خدمتونو وړاندېکولو پروسې اسانې او چټکې شي، چې د همدې موخې لهپاره په بېلابېلو ولایتونو کې د اسان خدمت مرکزونو رامنځتهکول یې ښکاره بېلګې دي.
عبدالقاهر ادریس زیاته کړه؛ د خوښۍ ځای دی، چې له تېرو څو کلونو راهیسې د اسان خدمت مرکزونو د جوړېدو پروسه له کابل څخه پیل شوې او یو شمېر نورو ولایتونو ته یې هم خدمتونه پراخ شوي، چې دا دی نن یې موږ او تاسو په ننګرهار ولایت کې د یوه مرکز د پرانېستو شاهدان یوو.
نوموړي د خپلو خبرو پر دوام وویل، په نږدې راتلونکي کې به په بلخ کې هم د اسان خدمت مرکز پرانېزي او ترڅنګ یې په فراه کې هم د اسان خدمت مرکز لهپاره د ودانۍ د جوړولو چارې په چټکۍ روانې دي.
د ننګرهار مرستیال والي مولوي عزیز الله مصطفي د احصایې او معلوماتو ملي ادارې له مشرتابه څخه مننه وکړه، چې د ننګرهار د خلکو ستونزو ته د رسېدنې په موخه یې د اسان خدمت مرکز پرانېست.
نوموړي همدارنګه زیاته کړه، چې اسلامي امارت په ټولو برخو کې هڅه کوي چې هېوادوالو ته چټک، پر وخت او له ټولو اسانتیاوو سره هر اړخیز خدمتونه وړاندې کړي.
دا مهال د اسان خدمت په مرکزونو کې په چټکه بڼه د الکترونیکي تذکرو، زېږون کارتونو او د الکترونیکي تذکرو له وېش وروسته خدمتونه وړاندې کېږي او په راتلونکي کې به له اړوندو ادارو سره په همغږۍ ځینې نور عامه خدمتونه لکه، پاسپورټ، جواز سیر، لایسنس، کورنیو او بهرنیو اتباعو ته د کار جواز وېش، د عدم مسوولیت فورم، د ټي آی ان یا تشخصیه نمبر فورم، د افغان اعلاناتو خدمتونه او د سترې محکمې د وثایقو خدمتونه هم په چټکه توګه تر یوه چتر لاندې هېوادوالو ته وړاندې شي.
د یادونې وړ ده، چې اوس مهال په کابل کې د اسان خدمت څلور مرکزونه، په کندهار، خوست، هرات او هلمند کې یو یو مرکز فعال دی او په نږدې راتلونکي کې به بلخ ولایت کې هم د اسان خدمت مرکز پرانېستل شي.
همدارنګه په بهر کې مېشتو هېوادوالو ته د لازمو اسانتیاوو په موخه په متحده عربي اماراتو کې هم د اسان خدمت یو مرکز فعال او هره ورځ هېوادوالو ته اړوند خدمتونه وړاندې کوي.
