د ترکیې د کورنیو چارو وزارت ویلي، چې پلازمېنې انقرې ته نږدې د فضایي صنعت پر یوه فابریکه وسله‌والو برید کړی، چې لږ تر لږه پینځه کسان پکې وژل شوي او ۲۲ نور ټپیان دي.

تر اوسه کومې ډلې د دې برید مسولیت نه دی منلی، خو ترکي چارواکو ویلي، چې په تړاو یې پلټنې کوي.

په ټولنیزو رسنیو کې خپرې شوې ویډیوګانې ښيي، چې دوه وسله‌وال د ترکیې د فضایي چلن شرکت په دخولي دروازه کې ډزې کوي.

کورنیو چارو وزارت په خپره شوې خبرپاڼه کې ویلي، چې دواړه بریدګر وژل شوي.

یاد برید ګڼو ترکي او نړیوالو چارواکو غندلی او ترهګریز عمل یې بللی دی.

د ترکیې انادولو خبري اژانس د یاد هېواد د دفاع وزارت له قوله خبر ورکړی، چې له دې برید وروسته هوایي ځواکونو د عراق او سوریې په شمال کې د کرد وسله‌والو پر ۳۲ هدفونو هوایي بریدونه کړي او یاد مرکزونه یې له منځه وړي دي.

د لوړو زده‌کړو وزیر شیخ ندا محمد ندیم او مل پلاوي لوګر ته د سفر په ترڅ کې د لوګر د لوړو زده‌کړو له موسسې څخه لېدنه کړې.

د دې تر څنګ شیخ ندا محمد ندیم د لوګر له والي، د لوړو زده‌کړو موسسې رهبري پلاوي، د ملکي او نظامي ادارو مسولینو، دیني علماء کرامو، د یادې موسسې استادانو، اداري کارکوونکو او محصلانو په غونډه کې ګډون کړی او د دینې او عصري زده‌کړو پر ارزښت یې خبرې کړې دي.

نوموړي ویلي، چې په عصري زده‌کړو سره په هېواد کې روغتیایي، اقتصادي او نور تحصیلي پرمختګونه منځته راځي او هېواد به له خپلو شته مادي او طبیعي امکاناتو څخه د ښې هوساینې څښتن شي.

ښاغلي ندیم ځوانان د نن ورځې محصلان او د سبا ورځې امیران، وزیران، معینان، والیان، رییسان او نور لوړ رتبه مسولین یاد کړي او پر استادانو یې غږ کړی، چې د خپلو محصلانو علمي، مسلکي فکري او عقیدوي روزنې ته پوره پام وکړي.

وروسته د لوګر والي شیخ ضیاءالرحمن مدني هم د عصري او دیني علومو پر زده‌کړې او سالم فکر جوړونې ټینګار کړی او پر محصلانو یې غږ کړی، چې د تېرې جمهوري ادارې له کړنو او ناخوالو دې سالمې تجربې واخلي.

د لوګر د لوړو زده کړو موسسې رییس مولوي ضیاءالاحمد صارم د لوړو زده‌کړو وزارت له رهبري څخه په مننې د دې موسسې درې کلنې لاسته راوړنې، پرمختګونه، نوښتونه او شته ستونزې او غوښتنې د لوړو زده‌کړو له وزیر سره شریکې کړې.

د یادونې وړ ده، چې د لوړو زده‌کړو وزیر د هېواد یو شمېر ولایتونو ته د خپلو رسمي سفرونو په ترڅ کې د تحصیلي بنسټونو او دیني جامعاتو او تخصصاتو، مسولینو، استادانو، فاضلانو، محصلانو او د غونډو ټولو ګډونوالو ته د وینا پر مهال د امر با المعروف او نهی عن المنکر وزارت د نوي قانون او د عالیقدر امیر المؤمنین حفظه الله د فرمانونو د تطبیق او عملي کېدو په اړه اړینې سپارښتنې او توصیې کړې دي.

نوموړي په ټولو ناستو کې استادانو او محصلانو ته د یاد قانون د پابندۍ په اړه ټینګار کړی او زیاته کړې یې ده، چې موږ او تاسې ټول باید د شرعیت په تطبیق او عملي کېدو کې له اولینو او سابقینو څخه واوسو، ځکه چې دا یو شرعي او اسلامي قانون دی.

د افغانستان اسلامي امارت د عامې روغتیا وزیر مولوي نور جلال جلالي د افغانستان لپاره د روغتیا نړیوال سازمان (WHO) له استازي او مل پلاوي سره لیدنه کړې.

په دې لیدنه کې د روغتیا نړیوال سازمان له لوري د مرکز کابل په ګډون د هېواد په لسو ولایتونو کې د سرطاني ناروغانو د درملنې لپاره د روغتیايي مرکزونو جوړېدو، د سرطان برخې ناروغانو لپاره اړینو وسایلو او درملو پېرلو، د لیرې پرتو سیمو اوسېدونکو لپاره د روغتیا په برخه کې د اسانتیاوو رامنځته کېدو او د افغانستان روغتیايي سیسټم د پیاوړتیا لپاره د نړیوالو مرستو د جلب اړوند بحث او خبرې شوې دي.

د عامې روغتیا وزیر مولوي نور جلال جلالي د هېواد په ولایتونو کې د سرطان ناروغانو د درملنې لپاره د جوړېدونکو روغتیايي مرکزونو په موخه د روغتیا نړیوال سازمان څخه مننه کړې او د روغتیا په برخه کې یې د دوامداره همکاریو غوښتنه کړې ده.

د روغتیا نړیوال سازمان استازي د روغتیا په برخه کې پر خپلو دوامداره همکاریو ټینګار کړی او په دې برخه کې یې د غوره همغږۍ او همکارۍ ډاډ څرګند کړی دی.

د افغانستان اسلامي امارت د ریاست الوزرا سیاسي مرستیال مولوي عبدالکبیر په مشرۍ سیاسي کمېسیون ناسته وکړه.

په دې ناسته کې له اجنډا سره سم د سیاسي کمېسیون غړو د افغانستان او سیمې پر اړوندو وروستیو مهمو مسایلو خبرې او بحثونه وکړل.

همدرانګه د یاد کمېسیون غړو د اسلامي امارت د سیاستونو د څرنګوالي او پرمختګونو ارزونه وکړه او د اسلامي نظام د اصولو په ښه پلي کېدو ټېنګار وشو.

د دې تر څنګ د اسلامي امارت د سیاسي کمېسیون په ناسته کې د یو لړ موضوعاتو په اړه اړینې پرېکړې وشوې.

د کډوالو ستونزو ته د رسېدنې عالي کمېسیون دارالانشا

د کمېټو ورځنی کاري راپور

د چهارشنبې ورځ، د ۱۴۴۶/۴/۲۱ هـ ق نېټه چې۱۴۰۳/۸/۲ هـ ل نېټې سره، سمون خوري، د هېواد له بېلابېلو لارو څخه افغان مهاجرین راستانه شوي او په بېلابېلو برخو کې ورته اړین خدمات وړاندې شوي چې بشپړ راپور یې په لاندې ډول وړاندې کیږي:

ننـــــــــګرهــــــار

تورخم (ډیورنډ فرضي کرښه)

د ثبت، تثبیت او استقبال کمېټه:

د تورخم له لارې (۱۳) کورنۍ هېواد ته راستنې او د نوموړو کورنیو (۶۵) تنه غړي، ثبت او بایمیټریک شوي دي.

د ټرانسپورټ او لېږد کمېټه:

له تورخم څخه (۸) کورنۍ چې د غړو شمېر یې (۴۲) تنه و، کابل او ننګرهار ته په خوندي توګه لېږدول شوې دي او یادو کورنیو ته (۳۱۰۰۰)افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له (۱۶) کورنیو سره مجموعًا (۱۴۲۰۰۰) افغانۍ کیږي.

د خدماتو او روغتیايي چارو کمېټه:

د تورخم په عمري کمپ کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په تورخم کې (۱۸۰) خوراکه ډوډۍ او اوبه ویشل شوي دي.

روغتیا: په تورخم کې (۱۷۷) تنه راستانه شوي مهاجرین تداوي شوي دي.

مخابرات: راستنو شویو مهاجرینو ته (۴۹) عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، توزیع شوي دي.

په تورخم کې مهاجرینو ته ځینې البسه لکه توشکې بړستنې او داسې نور شیان هم توزیع شوې دي.

کنــــــــــــــدهار

سپین بولدک (ډیورنډ فرضي کرښه)

د ثبت، تثبیت او استقبال کمېټه:

د سپین بولدک له لارې (۳۸) کورنۍ چې د غړو شمېر یې (۱۹۵) تنه و، هېواد ته راستنې او ثبت شوي دي.

د ټرانسپورټ او لېږد کمېټه:

له سپین بولدک څخه (۵) کورنۍ چې د غړو شمېر یې (۲۵) تنه و، کندهار، غزني او هلمند ولایتونو ته په خوندي توګه لېږدول شوې دي او یادو کورنیو ته (۶۰۰۰) افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له (۳۵) کورنیو سره مجموعًا (۲۷۸۰۰۰) افغانۍ کیږي.

د خدماتو او روغتیايي چارو کمېټه:

په سپین بولدک کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په سپین بولدک کې (۳۴۷) خوراکه ډوډۍ او اوبه ویشل شوي دي.

روغتیا: په سپین بولدک کې (۷۳) تنه راستانه شوي مهاجرین تداوي شوي دي.

مخابرات: د مخابراتي خدماتو د ادارې له لوري، راستنو شویو مهاجرینو ته (۱۲۸) عدده سیمکارتونه په وړیا توګه چې وړیا دقیقې او د انټرنټي بستې هم پکې فعاله وې، وېشل شوي دي.

البسه: په لنډ مهاله کمپونو کې د اړتیا سره سم خیمې، کمپلې او توسان مهاجرینو ته وېشل شوي دي.

نیمروز

ورېښمو لار

د تثبیت، ثبت او استقبال کمېټه:

د نیمروز ولایت د ورېښمو له لارې (۴۸) کورنۍ چې د غړو شمېر یې (۲۷۰) تنه و، هېواد ته راستنې او ثبت شوي دي او همدا راز (۱۷۴۵) مسافر هېواد ته راستانه شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۷۲) کورنیو سره مجموعًا (۵۲۰۰۰۰) افغانۍ مرسته شوې ده.

د خدماتو او روغتیايي چارو کمېټه:

د نیمروز د ورېښمو په لار کې راستنه شویو مهاجرینو ته د روغتیا په شمول لاندې بیلابیل خدمات وړاندې شول:

مخابرات: د مخابراتو او معلوماتي ټکنالوژۍ د مسئولینو له لوري (۷۸) عدده سیم کارتونه مهاجرینو ته په وړیا توګه چې وړیا دقیقې او د انټرنټي بستې هم پکې فعاله وې، توزیع شوي دي.

د اطلاعاتو او عامه پوهاوي کمېټه:

د نیمروز ولایت د ورېښمو په لار کې مهاجرینو ته عامه پوهاوی ورکړل شو. یادو مهاجرینو ته د دوی د ثبت، لیږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شو.

هرات

اسلام کلا

د تثبیت، ثبت او استقبال کمېټه:

د اسلام کلا له لارې (۱۲۳) کورنۍ چې د غړو شمېر یې (۴۵۱) تنه و، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۱۲۰) کورنیو سره مجموعًا (۸۴۰۰۰۰) افغانۍ مرسته شوې ده.

د ټولو کمېټو د بېلا بېلو کړنو ټولیز ارقام په لاندې توګه دي:

ثبت شوي مهاجرین: (۲۲۲) کورنۍ او (۹۸۱) افراد

لېږدول شوي مهاجرین: (۱۳) کورنۍ او (۶۷) افراد

مرسته شوي مهاجرین: (۲۴۳) کورنۍ

وېشل شوي سیمکارتونه: (۲۵۵) عدده

د کډوالو ستونزو ته د رسېدنې عالي کمېسیون دارالانشا

د افغانستان اسلامي امارت د ریاست الوزرا سیاسي مرستیال مولوي عبدالکبیر د کابل د سوداګرو او کسبګرو د ملاتړ ټولنې له غړو سره لیدنه وکړه.

په دې ناسته کې د سوداګریزو شرکتونو، مارکېټونو او کسبګرو استازو حضور درلود.

هغوی د اسلامي امارت له همکاریو څخه مننه کړې او ویلي یې دي، چې د اسلامي نظام په راتګ سره یې ګڼې ستونزې اوارې شوې دي.

دوی زیاته کړې؛ افغان سوداګر په هېواد کې لا ډېرې پانګونې ته لېواله دي، چې له دې لارې به په مستقیم او غیرې مستقیم ډول زرګونه کاري فرصتونه رامنځته او د اقتصادي ودې سبب شي.

د کابل د سوداګرو او کسبګرو د ملاتړ ټولنې غړو ویلي؛ افغان پانګوال له اسلامي امارت سره د واخان لویې لارې د جوړېدو په برخه کې همکارۍ ته چمتو دي.

همدارنګه که په صنعتي ښارګوټو کې ځمکه ورکړل شي په تولیدي برخه کې به هم کار پیل کړي.

د کابل د سوداګرو او کسبګرو د ملاتړ ټولنې غړو د کابل ښاروالۍ او یو شمېر نورو اړوندو ادارو د چارو د ښه ترسره کېدو په موخه خپل وړاندېزونه د ریاست الوزرا سیاسي مرستیال ته سپارلي.

مولوي عبدالکبیر راغلو سوداګرو ته د ښه راغلاست ترڅنګ ویلي؛ څرنګه چې د اسلامي نظام ټینګښت د ټولو افغانانو شریک ارمان و، نو هر افغان پر حکومت حق لري او کولای شي په زغرده خپل نظریات او غوښتنې له اسلامي نظام سره شریکې کړي.

د ریاست الوزرا سیاسي مرستیال په کور دننه د افغان سوداګرو پانګونه مهمه بللې او یادونه یې کړې، چې اسلامي امارت یې د چارو ملاتړ کوي.

د ناستې په پای کې مولوي عبدالکبیر د سوداګرو د وړاندېزونو په اړه د غور كولو ډاډ ورکړی او ټینګار یې کړی، چې اړونده ادارې به له دوی سره د ستونزو د حل لپاره ګډې ناستې ولري.

چین کې د “یو کمر بند یوه لاره نوښت” د انرژي وزیرانو په درېیم کنفرانس کې د اوبو او انرژي وزیر ملا عبداللطیف منصور ګډون ګډون او وینا کړې.

یاد کنفرانس ته د ملا عبداللطیف منصور د وینا بشپړ متن په لاندې ډول دی:

درنو حاضرینو!

د برېښنا انرژي په سکټور کې نړیوالو همکارانو …

السلام علیکم ورحمة الله و برکاته!

خوشحاله یم، چې د افغانستان د نوي رغنیز بدلون په پړاو کې د انرژي د سکټور د مدیریت او تنظیم ستر او عظیم مسولیت په لرلو سره په دغه برخه کې د آبادۍ د کاروان غړی یم.

له نېکه مرغه په تېرو درې وروستیو کلونو کې مو د برېښنا انرژي د پر ځان بسیا کېدو په لور ستر ګامونه اخېستي او د هېواد د ښېرازي په لور لا نور ورګړندي کیږو.

د الهي نصرت په ملتیا، وروستي پرمختګونه د برېښنا انرژي لپاره ډاډمن او ارزښتناک پړاوونه دي، چې په پلي کېدو سره يې د انرژي وړتیا لوړېږي او په ټوله کې د برېښنا د کموالي تشه کمېږي.

د افغانستان اسلامي امارت دغه ټکي ته په پام او د هېواد د برېښنا د کموالي اصل ته په پاملرنې سره هوډ لري، چې خپله فعاله ونډه د هېواد د بیارغونې د کاروان په روان بهیر کې ولري او ځان ورڅخه وروسته پرې نږدي.

درنو حاضرینو!

لکه څرنګه چې معلومه ده، د لومړنیو اټکلونو او سروې ګانو له مخې، افغانستان کولای شي نږدې ۳۱۸ ګیګاواټه برېښنا د نوې کیدونکې انرژي له سرچینو څخه تولید کړي، چې پکې د اوبو سرچینې (۲۳۰۰۰ میګاواټه)، د باد د انرژي سرچینې (۶۷۰۰۰ میګاواټه)، لمریزه انرژي (۲۲۲۰۰۰ میګاواټه)، جیوترمل انرژي (۳۰۰۰ څخه تر ۳۵۰۰ میګاواټه)، بایوماس انرژی (4000 میګاواټه) شاملې دي.

موږ تمه لرو، چې د هېواد د برېښنا انرژي بازار به په راتلونکو لسیزو کې د یادو مواردو په پام کې نیولو سره ښه وده وکړي، مونږ د افغانستان اسلامي امارت د ستراتیژیکو موخو او لید لوري رښتیا کولو او د برېښنا قانون پلي کولو په موخه خپل پنځه کلن پلان او د نوې کېدونکې انرژي تګلاره جوړه کړې چې د نوې کېدونکې انرژي اصلي تګلاره کې د هېواد پراختیایي برنامو وړاندوینه کوي.

مونږ په دې باور یو، چې ډاډمنې برېښنا ته لاسرسی، خوندیتوب، د انرژي امنیت، او د انرژي په وړاندې کولو کې تعادل، د افغاني ټولنې د اقتصادي او ټولنیز پرمختګ لپاره اړین شرطونه دي.

مونږ خپلې برنامې داسې جوړې کړې تر څو د کورنیو سرچینو څخه د انرژي تأمینول لوړ کړي او د کلیوالو سیمو، لرې پرتو بانډو، د ولایتونو مرکزونو او نورو د مصرف سره سم، د برېښنا انرژي تأمینول لا ښه کړي.

همدارنګه د برېښنا انرژي د جذب وړتیا، د نننیو لومړیتوبونو په تناسب د انرژي د پروژو، د تجارتي مناسب موډلونو ډیزاین او د هغو پلي کول او د مارکېټ د پراختیا پیاوړي کوونکو مشخصول پکې شامل دي.

د افغانستان ستراتیژیک جغرافيايي موقعیت:

افغانستان د منځنۍ آسیا، سویلي آسیا او منځني ختیځ په اوږدو کې پروت هېواد دی، چې د سیمه ییز اتصال لپاره یو مهم ځمکنی پل برابروي. دا دریځ افغانستان د چین د یو کمربند له لارې یو اړین شریک جوړوي، ځکه چې دا کولای شي، د ځمکې له لارې سوداګریزې اړیکې او د انرژي دهلېزونه آسانه کړي، چې چین له اروپا سره نښلوي.

د واخان دهلېز پرانیستل:

د واخان دهلېز پرانیستل به د افغانستان او چین اړيکې نورې هم پراخې کړي. دا لاره د افغانستان شمال ختیځ د چین د سینکیانګ له سیمې سره نښلوي او د سوداګري او انرژي د همکارۍ یوه نوې دروازه خلاصوي. دغه دهلېز به د زیربناوو، پراختیا او د پولې په اوږدو کې سوداګري او د افغانستان له لارې د چین او منځنۍ آسیا تر منځ لوژیستیکي راکړې ورکړې ته وده ورکړي.

د انرژي همکاري او سرچینې:

افغانستان د پام وړ غیر استعمال شوې طبیعي زیرمې لري، طبیعي ګاز او منرالونه د نړۍ د انرژي د لیږد لپاره مهم عناصر دي. د چین هېواد سره زمونږ د هېواد د انرژي د سکټور د همغږۍ هڅې کولای شي د دواړو هېوادونو د ګټو لپاره دا سرچینې خلاصې کړي او د سیمه ییزې انرژي د امنیت ملاتړ وکړي. د انرژي په پروژو کې د افغانستان ښکېلتیا هم کولای شي، زموږ د هېواد د اقتصاد د پياوړتیا سبب او د کار موندنې لپاره مناسب بستر شي.

د منځنۍ آسیا د انرژي د رسولو په سلسله کې د افغانستان رول:

د ترکمنستان او ازبکستان په ګډون د منځنۍ آسیا د انرژي له پلوه بډایه هېوادونو ته د افغانستان نږدېوالی، د انرژي په شبکو کې د یوه مهم غړي په توګه موقعیت لري. د پایپ لاینونو او د انرژي د زیربناوو په پراختیا سره، افغانستان کولای شي له منځنۍ آسیا څخه چین او جنوبي آسیا ته د انرژي د صادراتو د یوې لارې په توګه اغېزمن کار وکړي.

سیمه ییز تجارت او اقتصادي ادغام ته وده ورکول:

په اقتصادي او تجارتي وصل کېدو سره به چین زموږ د هېواد د زیربنا په ښه کولو، د سوداګري د آسانتیا، او بازار ته د لاسرسي په زیاتولو سره د سیمه ییزې اقتصادي ودې په لاره اچولو کې مرسته وکړي. دا ادغام به د انرژي، کانونو او د ځمکني ترانسپورت په برخو کې د لا زیاتو همکاریو لامل شي، چې افغانستان به د سیمه ییزې سوداګري لپاره د یوه مهم مرکز په توګه خپل ځای پيدا کړي.

د چین هېواد له لوري د یو کمربند او یوې لارې په توګه له افغانستان سره نږدې کېدل:

زموږ رغنده ګډون د یو کمربند او یوې لارې په توګه په آسیا، اروپا او افریقا کې د اتصال د زیاتولو لپاره د چین له اوږدمهاله ستراتیژیک لید سره سمون لري. د انرژي په برخه کې د همکاري، سوداګري او د زیربناوو په پراختیا سره، افغانستان کولای شي د چین د پراخو جیوپولیټیک او اقتصادي موخو په ملاتړ کې مهم رول ولوبوي. جنوبي آسیا او هاخوا ته د تګ لاره همداشان او تر وصل وروسته په سیمه کې د برېښنا انرژي د ګډ مارکېټ رامینځته کول یو بل ګټور ګام بللی شو.

دغه راز له پخوانۍ ژمنې سره سم د صنعتي هېوادونو له خوا د دوامدارې انرژي په تولید سره زمونږ د هېواد د انرژي د سکټور پراختیا او د ګلخانه يي ګازاتو کمول چې افغانستان ورڅخه رنځ وړي.

باید یادونه وکړم چې د افغانستان ستراتیژیک موقعیت کولای شي د یوه ارتباطي پل په توګه کار وکړي، چې په دې سره منځنۍ آسیا له جنوبي آسیا سره ونښلوي، د سوداګري، زیربناوو پراختیا او د انرژي د لېږد لپاره نوي فرصتونه پرانیزي. یاد هېوادونه د یو کمربند او یوې لارې په توګه د افغانستان له خاورې څخه د سیمه ییز اتصال د پراختیا لپاره کار واخلي، چې ګټې یې له نږدې ګاونډیانو څخه د سویلي آسیا بازارونو ته پراخیږي.

د سیمې سولې او ثبات ته د افغانستان ژمنتیا:

د یو کمربند او یوې لارې په څیر په سیمه ییزو پروژو کې په فعاله توګه د ښکېلتیا له لارې، افغانستان په سیمه کې د سولې، ثبات او اقتصادي پرمختګ لپاره خپله ژمنه څرګندوي. دا همکاري کولای شي سیاسي ثبات ته وده ورکړي او په سیمه کې د مهمو زیربناوو پانګونې لپاره امنیت تضمین کړي.

ظرفیت پيدا کول او له نړیوالو سره همغږي کېدل:

لکه څرنګه چې څرګنده ده، افغانستان له نوې تکنالوژۍ سره د همغږو برنامو لرل خپل ستراتیژیک اهداف بولي، غواړم چې له دغه فرصت څخه په ګټې اخیستنې سره یادونه وکړم چې د چين هېواد او نور سیمه ییز هېوادونه کولای شي د لنډ مهاله او منځ مهاله پروګرامونو په ترڅ کې زموږ تخنیکي همکاران وروزي او د ظرفیت په لوړولو او نړۍوالو تجاربو په تر لاسه کولو کې همکاري وکړي.

د افغانستان اسلامي امارت د ریاست الوزرا سیاسي مرستیال مولوي عبدالکبیر په دوو جلا ناستو کې د ننګرهار له یو شمېر قومي مخورو او مشرانو سره لیدنه وکړه.

په لومړۍ ناسته کې د مومندو، شینوارو او خوګیاڼیو د قومونو مخورو ویلي، چې د اسلامي نظام ملاتړ کوي او له حکومت سره په هېواد کې د بشپړ امن د ساتلو په موخه همکار دي.

د یادو قومونو مشرانو او مخورو د ریاست الوزرا د سیاسي معاونیت له همکاریو په مننې زیاته کړې، چې تل یې د اسلامي امارت لخوا غږ اورېدل شوی او وړاندېزونو ته یې د مسوولو ادارو لخوا رسېدنه شوې ده.

دوی د اسلامي نظام راتګ د لویو ناخوالو د پای سبب یاد کړی او خپل ځينې وړاندېزونه او سلا مشورې یې د ریاست الوزرا سیاسي مرستیال سره شریکې کړې دي.

په دویمه ناسته کې د ننګرهار د شینوارو له شپږو ولسوالیو راغلو قومي مخورو او علماوو د ریاست الوزرا د سیاسي مرستیال له همکاریو په مننې ویلي، چې ننګرهار کې د شینوارو ستونزې د اسلامي امارت د چارواکو لخوا اوارې شوې او ولسونه له دغه اقدام څخه خوښ دي.

دوی زیاته کړې، چې په هر ډګر کې له حکومت سره همکاري او ملاتړ یې کوي.

دغه راز دوی د یو لړ مسائلو په هکله خپلې سلا مشورې او نظرونه د ریاست الوزرا له سیاسي مرستیال سره شریک کړي او د حکومت لخوا یې په شینوارو کې د سړک د رغولو وړاندېز کړی دی.

مولوي عبدالکبیر د ننګرهار قومي مخورو ته د ښه راغلاست پرمهال ویلي، چې د ولس غږ اورېدل او د هغوی وړاندېزونو ته رسېدنه د اسلامي امارت مسولیت دی.

سیاسي مرستیال زیاته کړې، چې د مسولو حکومتي ادارو لخوا د ننګرهار په ځینو سیمو کې له بې‌وزلو سره د مرستې لړۍ پیل شوې او هیله ده، چې د یاد ولایت نورو سیمو ته به هم وغزول شي.

نوموړي ډاډ ورکړی؛ ملت دې ډاډمن اوسي چې په ملي او دیني ارزښتونه معامله نه کیږي او څرنګه چې اسلامي امارت له ملت راټوکېدلی همدارنګه د ولسونو غږ او غوښتنې په وخت سره اوري.

په پای کې مولوي عبدالکبیر په ټینګار سره ویلي، چې د ننګرهار د ولسونو غوښتنې به له اړوندو ادارو سره شریکې شي او د حل لپاره به یې هڅې وشي.

د افغانستان اسلامي امارت د ارشاد، حج او اوقافو وزیر شیخ نورمحمد ثاقب په رسمي بلنه د اوزبیکستان هېواد د مسلمانانو د ادارې مشر شیخ مفتي نورالدین خالق نظر په مشرۍ مل پلاوی پلازمېنه کابل ته را ورسېد.

د یاد هېواد لوړ رتبه علماوو پلاوی به د افغانستان اسلامي امارت له لوړ پوړو چارواکو، مسولینو او منسوبینو سره په جلا جلا کتنو کې د دوه اړخېزو اړیکو او همکاریو په پیاوړتیا خبرې وکړي.

دغه‌راز په دیني او ښوونیزو موضوعاتو به د دواړو هېوادونو (افغانستان او اوزبیکستان) د علماوو ترمنځ د اړیکو پراختیا او پرمختګ، د جوماتونو او مدرسو په چارو کې به یو له بل سره همکاري او تجربې شریکې کړي او همدا راز به د افغانستان له تاریخي، مقدسو او مشهورو ځایونو څخه لیدنې وکړي.