د ریاست الوزرا سیاسي مرستیال مولوي عبدالکبیر په جلا جلا ناستو کې د ننګرهار د دره نور ولسوالۍ له قومي مخورو ترڅنګ د هېواد په شمالي ولایتونو کې د مېشت ګوجر قوم له یو شمېر مخورو او مجاهدینو سره لیدنه کړې.

په پیل کې د دره نور ولسوالۍ مخورو او مشرانو په خپلو سیمو کې د ډاډمن امنیت ترڅنګ په بېلا بېلو برخو کې د خپلو ستونزو د حل یادونه کړې او ویلي یې دي، د اسلامي امارت په راتګ سره یې ګڼې دښمنۍ د حکومتي او قومي مشرانو په منځګړیتوب له منځه تللي او دا مهال په یاده ولسوالۍ کې د ولسونو او اسلامي امارت ترمنځ ښه همکاري او همغږي شتون لري.

د دره نور ولسوالۍ قومي مشرانو د ریاست الوزرا سیاسي مرستیال ته په خپلو سیمو کې د برېښنا شبکې د پراختیا، د سړک رغولو، د منظور شوي روغتون د کار د ژر پیل او اوبو مهارولو په موخه د بند جوړولو په برخو کې خپل وړاندېزونه په لیکلي بڼه شریک کړي دي.

همدارنګه په بله لیدنه کې په بدخشان، تخار، کندوز او بغلان ولایتونو کې د مېشت ګوجر قوم یو شمېر قومي مخورو او مجاهدینو افغانستان کې پر ټولنیز عدالت خوښي څرګنده او زیاته کړې یې ده، حکومت دې په لېرې پرتو سیمو کې پراختیايي پروژو ته ځانګړې پاملرنه وکړي.

د ګوجر قوم یادو مخورو د ریاست الوزرا سیاسي مرستیال ته د بې وزلو د لاسنیوي ترڅنګ په یو شمېر نورو برخو کې هم د خپلو ستونزو د حل وړاندېزونه کړي.

وروسته د ریاست الوزرا سیاسي مرستیال مولوي عبدالکبیر د دره نور ولسوالۍ او ګوجرو قومي مشرانو او مخورو ته د ښه راغلاست پر مهال ویلي، د اسلامي امارت او قومونو ترمنځ د واټن نشتون د روښانه راتلونکي ښکارندويي کوي.

مولوي عبدالکبیر زیاته کړې، اسلامي امارت د حکومت او ولسونو ترمنځ د همکارۍ فضا رامنځته کړې او قومي جوړښتونه کولی شي له مسولینو سره د ښې همغږۍ له لارې د خلکو ستونزو ته مناسبې حل لارې ومومي.

لیدنې په پای کې سیاسي مرستیال، د ننګرهار په دره نور ولسوالۍ کې د ولسونو او د هېواد په شمال ولایتونو کې د ګوجر قوم د ستونزو حل مهم بللی او ویلي یې دي، پر شویو وړاندېزونو به یې د غور ترڅنګ اړوندو ادارو ته اړینې سپارښتنې وکړي.

د ریاست الوزرا سیاسي مرستیال مولوي عبدالکبیر په کابل کې د امام ابوحنیفه ملي او نړیوال نندارتون په پای غونډه کې ګډون او وینا کړې.

په دغه مراسمو کې د اسلامي امارت د یو شمېر مسولینو سربېره ګڼ شمېر پانګوالو، صنعتکارانو، بهرنیو ډيپلوماتانو او ګڼو هېوادوالو ګډون کړی وو.

مولوي عبدالکبیر د امام ابو حنیفه ملي او نړیوالو نندارتون له جوړونکو او مسولو ادارو په مننې ویلي، دا ډول غونډې د افغان او بهرنیو سوداګرو ترمنځ د تجربو شریکولو او د پانګونې په برخه کې د شته زمینو پیژندلو لپاره ګټورې دي.

نوموړي زیاته کړې، له مرکزي اسیا سره د اسلامي امارت سوداګریزې اړیکې په مناسب حالت کې دي او د لا پراختیا لوري ته روانې دي.

د ریاست الوزرا سیاسي مرستیال د ځينو هېوادونو لخوا پر افغان صادراتي توکو د مالیې لوړول ناسم بللي او څرګنده کړې یې ده، اسلامي امارت د افغانستان د سوداګرۍ لپاره بدیلې لارې په واک کې لري.

مولوي عبدالکبیر ویلي، اسلامي امارت افغانستان کې بهرنیو او افغان سوداګرو او پانګوالو ته د کار غوره زمینې رامنځته کړي او د افغان حکومت بهرنی سیاست پر اقتصادي همکاریو راڅرخي.

نوموړي له سوداګرو د اسلامي امارت پر دوامداره ملاتړ ټینګار کړی او زیاته کړې یې ده، دا مهال په هېواد کې د مالیاتو کچه را کمه شوې او لاهم دې برخې ته هڅې روانې دي.

د ریاست الوزرا سیاسي مرستیال د خپلو خبرو پر دوام یادونه کړې، چې اسلامي امارت پر خپلو ژمنو عمل کړی.

په پای کې مولوي عبدالکبیر همدارنګه پر لبنان او فلسطین د اسرائیلو اشغالي حکومت بريدونه هم غندلي دي.

د اطلاعاتو او کلتور وزارت د هنر او کلتور معینیت د ترانو او ترنم ریاست له لوري نن د خوست ولایت د قبایلو چارو د ریاست په تالار کې د ترنم، شعر او ادب ښوونیز سیمینار د یاد وزارت د ځوانانو چارو مرستیال قاري محمد یونس راشد، د وزارت مقام حقوقي سلاکار قاري سعید خوستي، د ترنم او ترانو رییس امان الله مستغفر، د رضاکاره ځوانانو رییس مولوي امدادالله منصور، د جنوب ختیځ زون (خوست، پکتیا، پکتیکا، لوګر، غزني) ولایتونو د اطلاعاتو او کلتور رییسانو او د لسګونو ترانه ویونکو او عامو خلکو په شتون کې ترسره شو.

 سیمینار د پیل په وینا کې د خوست اطلاعاتو او کلتور رییس مولوي شبیر احمد عثماني له وزارت او ولایتونو څخه کډون کوونکو مېلمنو ته ښه راغلاست ویلی.

د اطلاعاتو او کلتور وزارت حقوقي سلاکار قـاري سعید خوستي د شعر او ترانو د ارزښت په اړه وویل؛ د ۲۰ کلنې مبارزې پر وخت ډېر خلک زموږ صفونو ته د ملي، حماسي او جـهادي اشعارو او ترانو له امله راغلي دي او په یاده مبارزه کې د ترانه ویونکو ونډه مهمه وه.

 ښاغلي خوستي زیاته کړه؛ اوس د پخوا په پرتله ډېر خلک په جشنونو، د خوښیو مراسمو، موټرو او عامه ځایونو کې د سندرو پر ځای ترانې او نعتونه اوري، نو شاعرانو ته پکار ده، چې په ترانو کې خلکو ته د ازادۍ او خپلواکۍ د اهمیت تر څنګ د هېواد د پرمختګ تصویر وړاندې کړي.

 د ترانو او ترنم عمومي رییس امان الله مستغفر وویل؛ ترنم او ترانه ویونکي دې داسې څه په خپلو اشعارو کې نه بیانوي، چې له ملي یووالي، اسلامي ارزښتونو، او پښتني دود او دستور سره په ټکر کې وي.

نوموړي زیاته کړه؛ شاعران باید په خپلو اشعارو کې ښه مفاهیم راواخلي، له درباري شاعرۍ څخه دې ډډه وکړي او په شعر کې دې قومي او ژبنیو تعصباتو ته لمن نه وهي.

 ښاغلي مستغفر له خبریالانو سره په جلا خبرو کې د شاعرانو لپاره د دا ډول سیمینارونو دایرول، د دوی د شعر د لا ښه والي په موخه ګټور یاد کړل او زیاته یې کړه؛ چې غواړو ورته سیمینارونه د هېواد په نورو ولایتونو کې هم ترسره کړو.

 د ځوانانو چارو مرستیال قـاري محمد یونس راشد د اسلام مبارک دین په پیل کې د جـهاد په برخه کې د شاعرانو او ترانه ویونکو مقام لوړ یاد کړ او ویې ویل؛ رسول الله ^ص هم هغه شاعران ستایلي چې د کفارو پر وړاندې یې د شعر په ژبه جـهاد کاوه.

 د جنوب ختیځ زون د ترانو او ترنم ویونکو له ډلې ځینو یې وویل، دوی لپاره دا ډول علمي سمینارونو دایرول خورا اړین دي او په راتلونکو کې یې د نورو ورته علمي سمینارونو د چمتو کولو هیله وکړه.

مالیزیا کې د افغانستان اسلامي امارت لوی سفیر نقیب الله احمدي د افغانستان لپاره د مالیزیا له ځانګړي استازي او د بهرنیو چارو وزير مشاور داتو احمد اعظم سره په خپل کاري دفتر کې په ګڼو موضوعاتو د بحث په موخه لیدنه کړې.

 په یاده ناسته کې د دواړو هېوادونو ترمنځ اړیکو کې پر مثبتو پرمختګونو خبرې شوي.

دغه راز مالیزیا ته د معارف وزارت د مسولینو پر سفر، ظرفیت لوړونې، روزنیزو پروګرامونو کې د ګډون او دولتي مسولینو سره د لیدنو په موخه بحث شوی دی.

 د لیدنې په پای کې دواړه لوریو راتلونکي کې د ګډو ګټو پر بنسټ پیاوړو اړیکو د پراختیا هیله څرګنده کړې.

۲۵ افغان بندیان د عراق هېواد له بندخونو ازاد او د تلې په ۲۰ مه نېټه هېواد ته راستانه شول.

د نیمروز ولایت د سرحدي امریت د معلوماتو له مخې، یاد کسان د قانوني اسنادو نه درلودلو له امله شپږ میاشتې د عراق هېواد بېلابېلو ولایتونو بندخونو کې بندیان وو، چې له ازادېدو سره سم په عراق کې د افغانستان سفارت د ایران له لارې هېواد ته راستولي دي.

دغه کسان د نیمروز په سرحدي امریت کې له ثبت وروسته د مرستو ترلاسه کولو په موخه د کډوالۍ نړیوال سازمان ته ورپېژندل شوي دي.