د کلیو د بیارغونې او پراختیا وزارت وایي، د کندهار ولایت په سپين بولدک ولسوالۍ کې د ۷۵ میلیونه افغانیو په لګښت د پینځه زره او۲۰۰ مترو په اوږدوالي استنادي دیوال د جوړولو چارې بشپړې او د یوې غونډې په ترڅ کې د ملا محمد یونس اخوندزاده او مل پلاوي له لوري ګټې اخیستنې ته وسپارل شو.

په دې غونډه کې د کلیو د بیارغونې او پراختیا وزیر ملا محمد یونس اخوندزاده، مل پلاوي، د علماوو شورا رییس مولوي محمد ادریس، د ولسوالۍ قومندان ملا محمد هاشم محمود، د سپین بولدک ولسوال مولوي رحیم الله محمود، یو شمیر نورو مسولینو او د سیمې اوسیدونکو ګډون کړی وو.

ملا محمد یونس اخوندزاده ویلي، اسلامي امارت هغو پروژو ته لومړیتوب ورکوي چې زموږ هېواد ځان بساینې ته رسوي.

نوموړي زیاته کړې؛ دا پروژه د بیت المال په پیسو جوړه شوې او پلي شوي ده، چې تاسو یې باید ښه ساتنه وکړی.

دغه استنادي دیوال د کلیو د بیارغونې او پراختیا وزارت له بودیجې څخه د سپین بولدک ولسوالۍ په ترکزي، کڅی، سوزاده خیل، قاضیانو او ګلان کلیو کې جوړ شوی دی.

د یاد استنادي دیوال په بشپړیدو سره رود خپل مسیر ته واړول شو او د یادې ولسوالۍ د اوسیدونکو سلګونه هکټاره کرنیزه ځمکه او د استوګني کورونه د سېلابونو او موسمي بارانونو له خطر څخه خوندي شول.

د ریاست الوزرا سیاسي مرستیال مولوي عبدالکبیر د پروان ولایت د شینوارو ولسوالۍ له یو شمېر مجاهدینو سره لیدنه کړې.

په دې لیدنه کې یادو مجاهدینو په بېلا بېلو برخو کې د ولسونو او مجاهدینو د ستونزو د حل له امله د ریاست الوزرا سیاسي معاونیت د هڅو په یادولو سره ویلي؛ د ولس د قربانیو موخه د اشغال له منځه وړل او د اسلامي نظام واکمني وه، په هېواد کې د شریعت پر حاکمیت خوښ یوو او په هر ډول حالت کې د اسلامي نظام دفاع کوو.

 د پروان ولایت د شینوارو ولسوالۍ دغو مجاهدینو د یو لړ ستونزو د حل په موخه د ریاست الوزرا سیاسي مرستیال ته وړاندېزونه کړي او اسلامي نظام یې د مجاهدینو د ویاړ سبب بللی.

د ریاست الوزرا سیاسي مرستیال مجاهدینو ته د ښه راغلاست پرمهال ویلي، د اسلامي امارت د ټولو چارواکو او مجاهدینو لومړنۍ موخې ترلاسه شوي او اوس به په ګډه د افغانستان د رغونې او اسلامي نظام د پیاوړتیا لپاره کار کوي.

مولوي عبدالکبیر د ولسونو د ستونزو حل د حکومت مسولیت بللی او زیاته کړې یې ده، د ټولو ادارو دروازې د خلکو پر مخ پرانیستې دي او د پروان ولایت د اوسېدونکو د ستونزو حل ته به اساسي پاملرنه وشي.

د راپورونو له مخې، اسرائیلي یرغلګرو نن سهار (سې‌شنبه، د اکټوبر په لومړۍ نېټه) د لبنان په سویل کې ځمکني عملیات پيل کړي دي.

صهیونیستي رژیم داسې مهال د لبنان په خاوره کې ځمکني عملیات پیل کړي، چې لا هم د دې هېواد پر بېلابېلو سمیو هوايي بریدونه دوام لري.

اسرائیلي رژیم د بېروت په سویل کې ګڼ ځایونه په نښه کړې او د سیمې اوسېدونکو ته یې د خپلو کورنو د پرېښودو امر کړی.

تازه د لبنان په داودیه ښار کې په یوه کور هوايي برید شوی، چې لږ تر لږه ۱۰ کسانو ژوند پکې بایللی او ۵ نور ټپیان شوي دي.

اسرائیلي یرغلګرو د لبنان په سویل کې صیدا ښار ته نږدې د فلسطیني کډوالو په ‘عین الحلوه’ کمپ هم برید کړی.

د دې برید له امله ۵ کسانو ژوند بایللی، ګڼ نور ټپیان شوي، زیاتې ودانۍ ویجاړې شوې او ډېر کسان د ویجاړو شویو ودانیو تر خاورو لاندې دي.

لبنان کې دا د فلسطیني کډوالو تر ټولو له ګڼې ګوڼې ډک کمپ دی، چې له ۱۳۰ زره زیات فلسطینیان پکې اوسېږي.

له دې سره هم‌مهاله اسرائیلي یرغلګرو د سوریې په دمشق ښار کې هم هوايي برید کړی، چې درېیو کسانو ژوند پکې بایللی.

د سوریې دولتي رسنۍ وايي، چې په دې برید کې ۹ نور کسان ټپيان شوي دي.

د یاد هېواد دولتي تلویزیون په یوه اعلامیه کې ویلي، چې په دمشق د اسرائیلو په یرغل کې د دوی یوې خبریالې هم ژوند بایللی دی.

د افغانستان برېښنا انرژۍ د پانګونې فرصتونو کنفرانس بهیر کې د افغانستان برېښنا شرکت عمومي اجراییوي رییس ډاکټر عبدالباري عمر او د زولرستان کمپنۍ او غضنفر ګروپ استازو تر منځ د ۱۰۰ مېګاواټه لمریزې برېښنا تولید د همکارۍ هوکړه لیک لاسلیک شول.

دغه راز د افغانستان برېښنا برېښنا شرکت او د ځواک پاور خصوصي شرکت ترمنځ له ډبرو سکرو څخه د ۱۰۰ مېګاواټه حرارتي برېښنا تولید پروژې د همکارۍ هوکړه لیک لاسلیک شو.

یادې پروژې به د کابل سروبي ولسوالۍ کې پلې کیږي، چې ورسره به د برېښنا کمښت ستونزه تر ډیره بریده حل شي.

پر دې سربېره د افغانستان برېښنا شرکت او کابل ملي شرکت ترمنځ کابل کې صنعتي پارکونو ته څیرمه د ۴۰ مېګاواټه برېښنا تولید هوکړه لیک لاسلیک شو.

په ورته مهال د افغانستان نوې کېدونکې انرژۍ ټولنې او عزیزي بانک ترمنځ هم د همکارۍ هوکړه لیک لاسلیک شو.

د افغانستان برېښنا شرکت هېواد کې د برېښنا اړتیا کچې بشپړونې او شته ستونزو حل لپاره د یو منظم پلان له مخې چټک کار کوي.

د ریاست الوزرا سیاسي مرستیال مولوي عبدالکبیر په افغانستان کې د انرژۍ د تولید په برخه کې د پانګونې د فرصتونو د وړاندې کولو په کنفرانس کې ګډون او وینا کړې.

د ریاست الوزرا سیاسي مرستیال د دغه کنفرانس ګډونوالو ته چې د کابینې یو شمېر غړي، د افغانستان برېښنا شرکت مسولین، بهرني او افغان پانګوال وو، د وینا پرمهال ویلي، افغانستان د برېښنا د تولید په برخه کې د ګڼو زمینو او سرچینو په لرلو سره هڅې کوي چې د انرژۍ په برخه کې پرځان بسیاینې ته ورسیږي او افغانستان د انرژۍ په صادراتي هېواد بدل شي.

مولوي عبدالکبیر زیاته کړې؛ اسلامي امارت په انرژۍ او نورو برخو کې پانګوالو ته غوره زمینه برابره کړې، مالیه کمه شوې او ادارې پروسې یې لنډې شوې او لازم ملاتړ ترې کېږي.

نوموړي ویلي؛ اوسمهال د اوبو مدیریت لومړیتوب لري او اسلامي امارت غواړي چې سیمه ييزو پروژو ته د پلې کېدو زمینه برابره کړي او په وینا یې، افغانستان به ډېر ژر په سیمه کې د سوداګرۍ او ترانزېټ د اتصال مرکز وګرځي، افغاني تولیدات او توکي به نړیوالو بازارونو ته ورسېږي.

سیاسي مرستیال د هېواد پر بانکي سیستم د خنډونو په لرې کېدو ټېنګار کړی او د افغان شتمنۍ د ازادېدو غوښتنه یې کړې.

نوموړي د خبرو پر دوام ویلي، اسلامي امارت په سیمه او نړۍ کې د ثبات او نظم غوښتونکی دی او هغو ډلو ته اجازه نه ورکوي چې امنیت ته ګواښ پېښوي.

د دغه کنفرانس په پای کې د ریاست الوزرا سیاسي مرستیال او یو شمېر نورو چارواکو په شتون کې د برېښنا شرکت او خصوصي سکتور تر منځ د ۲۴۰ میګاواټه لمریزې او حرارتي برېښنا په برخه کې د همکاریو هوکړه لېکونه لاسلېک شول.

د افغانستان اسلامي امارت د کابینې اوومه غونډه د رییس الوزرا ملا محمد حسن اخند په مشرۍ پرون دوشنبه ترسره او د يو شمېر موضوعاتو په اړه بحث او پرېکړې پکې وشوې.

د کابينې دا غونډه چې د قرانکريم په تلاوت پيل شوه، له اجنډا سره سم په هېواد کې د ودانيزو چارو په برخه کې د اسانتیاوو رامنځته کولو او خلکو ته د کار اجازې ورکولو په اړه بحث پکې وشو.

دغه‌راز د کور او ښار جوړونې وزارت په مشرۍ پلاوي ته دنده وسپارل شوه، چې په هېواد کې د ودانيزو چارو په برخه کې د اسانتياوو رامنځته کولو په موخه يوه طرحه ترتيب کړي، ترڅو خلکو ته اسانتياوې رامنځته شي او په کم وخت کې د ملکيت له تثبيت وروسته د کار اجازه ترلاسه کړي.

په غونډه کې د هرات-خواف اوسپنې پټلۍ د لومړي فاز څلورمې قطعې پروژې د مسير اړوند ځمکو د استملاک په اړه د لېږل شوي پلاوي نظر تأیيد شو او پرېکړه وشوه، چې د جوړېدو چارې دې یې پيل شي.

همدا راز د اقینې-اندخوی اوسپنې پټلۍ د لومړي فاز ۳۰ کیلومتره ځمکې د استملاک اړوند د پلاوي راپور تایيد شو او ټولګټو وزارت ته دنده وسپارل شوه چې په دې اړه اقدامات وکړي.

د کابينې په دې غونډه کې د کابل ښار د پراختيا لپاره د کور او ښار جوړونې وزارت او کابل ښاروالۍ له لوري چمتو شوی پلان تایيد شو او پرېکړه وشوه چې کابل ښاروالي دې د ياد پلان له مخې اجراات وکړي.

د کابينې دا غونډه د خير په دعاء پای ته ورسېده.

د المپیک کمېټې، بدني روزنې او ورزش عمومي رياست اړوند د هنډبال ملي فدراسيون له لوري د ياد رياست په ۵۰۰ کسيز جمنازيوم کې د ۱۶ ولايتونو د ۱۷ لوبډلو ترمنځ ملي لوبډلې ته د غوره لوبغاړو ټاکلو په موخه د هنډبال درېيم پړاو ټاکنيزې سيالۍ د کابل منتخب لوبډلې په اتلولۍ پای ته ورسېدې.

په دغو سياليو کې د بلخ، باميان، جوزجان، سرپل، غور، کونړ، کندوز، لوګر، لغمان، ننګرهار، ميدان وردګ، باميان، پروان، هرات، کابل منتخب او کابل الف لوبډلو ګډون کړی وو، چې په پايلوبه کې کابل منتخب لوبډلې خپلې سيالې هرات لوبډلې ته د ۲۲ پر ۱۹ امتيازونو په توپير ماتې ورکړه او اتلولي يې خپله کړه.

په دې سياليو کې جوزجان لوبډلې بيا درېيم مقام ترلاسه کړ.

د یادولو وړ ده، چې دغو سياليو لس ورځې دوام وکړ او په پای کې ۱۸ تنه غوره ورزشکاران د هېواد هنډبال ملي لوبډلې ته غوره شول.

هېره دې نه وي، چې د دغو سياليو د پای په مراسمو کې د المپيک کمېټې، بدني روزنې او ورزش عمومي رياست فني او مسلکي مرستيال حافظ احمد جان ځدراڼ، مالي او اداري رییس مولوي عبدالناصر هاشمي، د المپیکي چارو ریيس پاينده محمد اختري، د دعوت او ارشاد رييس مولوي داد محمد بريال عطايي، د هنډبال فدراسيون مسولینو، ورزشکارانو او د ورزش ګڼ مينوالو ګډون کړی وو.

ملي دفاع وزارت وايي، د اسلامي امارت سرحدي مسولینو د ایران له مسولینو سره ناسته وکړه.

د ۲۰۷ الفاروق قول اردو د لسمې سرحدي لوا قوماندان حاجي محمد رحیم خادم په مشرۍ یوه پلاوي، د نورو استازو او کمیسارانو سره یوځای د ایران له سرحدي مسولینو سره په لیدنه کې د دواړو لورو د سرحدي ځواکونو ترمنځ د همغږۍ په موخه د سرحدونو ساتنه او له قاچاق څخه د مخنیوي موضوعات، همدارنګه د سرحدي نښو (خطونو) د رنګولو او ترمیم په اړه خبرې وکړې.

همدارنګه په راتلونکي کې د لا ښه همغږۍ په موخه دغو ناستو او لیدنو د دوام په هکله هم هوکړه وشوه.