د ریاست الوزرا سیاسي مرستیال مولوي عبدالکبیر په المپيک کې د اسیا شورا د لوبو د پراختیا او کورش نړیوال فدراسیون رییس حیدر فرمان او پلاوي سره لیدنه کړې.
په دې لیدنه کې د المپيک، بدني روزنې او سپورټ عمومي رییس مولوي احمدالله وثیق او یو شمېر نورو مسولینو هم شتون درلود.
په المپيک کې د اسیا شورا د لوبو د پراختیا او کورش نړیوال فدراسیون رییس افغانستان ته په خپل راتګ خوښي څرګنده کړې او ویلي يې دي؛ د اسلامي امارت په واکمنۍ کې د افغان ټولنې حالت له هغه څه سره ډېر توپیر لري، چې غربي رسنۍ او سیاستوال یې په هکله څرګندونې کوي.
حیدر فرمان زیاته کړې، د افغانستان د لوبو په تړاو یې له ګڼو افغان مسولینو سره مثبتې لیدنې ترسره کړي او هڅه کوي په بېلا بېلو برخو کې له افغان لوبغاړو سره همکارۍ او د تجربو شریکولو ته زمینه برابره کړي.
نوموړي څرګنده کړې؛ افغان لوبغاړي ښې لاسته راوړنې لري او اړتیا ده، چې د افغانستان د لوبو د پراختیا او پرمختګ لپاره نړیوالو اړوندو ادارو ته د راتګ بلنه ورکړل شي، ترڅو وضعیت له نږدې وګوري.
ښاغلي فرمان د خپلو خبرو په پای کې، ورزش له نړۍ سره د اسلامي امارت د اړیکو لپاره ښه زمینه یاده کړې او پر دوه اړخیزو همکاریو یې ټېنګار کړی.
د ریاست الوزرا سیاسي مرستیال د کورش نړیوال فدراسیون رییس حیدر فرمان او پلاوي ته د ښه راغلاست ترڅنګ ویلي؛ افغان زلمیان غوره وړتیاوې لري او په تېرو څو میاشتو کې یې ثابته کړې، چې په نړیواله کچه بریاوې ترلاسه کولی شي.
مولوي عبدالکبیر زیاته کړې، نړیوالې ورزشي ادارې دې له افغان لوبغاړو او اړوندو ادارو سره خپلې همکارۍ ډېرې او د تجربو شریکولو ته لومړیتوب ورکړي.
نوموړي په نړیوالو ډګرونو کې د افغان لوبغاړو فوق العاده وړتیاوو ته په اشارې ویلي، اسلامي امارت د خپلو ورزشي لوبغاړو هر اړخیز ملاتړ کوي او د ورزشي زمینو زیاتېدو لپاره له اړوندو نړیوالو ادارو سره هر ډول همکارۍ ته چمتو دی.
د ریاست الوزرا سیاسي مرستیال د خپلو خبرو په پای کې زیاته کړې، اسلامي امارت د ځوان نسل د روزنې او په مناسبو برخو کې د هغوی د بوختیاوو لپاره پلانونه جوړ کړي او په هېواد کې د نشه یي توکو د کښت او کارونې مخنیوي له امله اوس افغان ځوانان له اکثریت ناسمو کړنو راګرځول شوي دي.