د کډوالو او بېرته راستنېدونکو چارو وزیر مولوي عبدالکبیر په جلا جلا ناستو کې د بغلان ولایت د علماو شورا له رییس او د یاد ولایت د نهرین ولسوالۍ له یو شمېر مخورو سره لیدنه وکړه.
په دې لیدنه کې د بغلان د علماو شورا رییس شیخ کمالالدین حقاني د یاد ولایت د کډوالو ستونزې او یو شمېر وړاندیزونه له وزیر سره شریک کړل.
نوموړي د راستنو شویو کډوالو د ستونزو د حل لپاره د ځانګړي ښارګوټي پرانیستل یو اغېزناک ګام وباله.
همداراز، د نهرین ولسوالۍ مخورو د خپلو سیمو لپاره د یو لړ پراختیايي پروژو د پيل غوښتنه وکړه او د یوې نیمګړې پروژې د بشپړولو وړاندیز یې هم له وزیر سره شریک کړ.
مولوي عبدالکبیر د علماو شورا رییس او قومي مشرانو ته د ښه راغلاست ویلو ترڅنګ د اسلامي نظام له ملاتړ او همکاریو یې مننه وکړه.
نوموړي زیاته کړه، اسلامي امارت د کډوالو ستونزو ته د رسېدو په موخه د عالي کمېسیون له لارې اړین اقدامات کړي، او په پاتې ولایتونو کې هم د کډوالو لپاره د ښارګوټو د پرانیستلو چارې روانې دي.
همدارنګه، نوموړي ټینګار وکړ چې اسلامي امارت د خلکو غوښتنو ته متوجه دی او له مشرانو یې وغوښتل چې خپل وړاندیزونه د سیمهییزو مسولینو په همغږۍ له اړوندو مرکزي ادارو سره شریک کړي.