اوکراین پرون یکشنبه (د نومبر لسمه) د مسکو په ګډون د روسیې پر یو شمېر نورو سمیو ۸۴ ډرون بریدونه کړي.
د روسیې دفاع وزارت د دې بریدونو په اړه ویلي، چې د هوایي دفاع سیسټم د مسکو په فضا کې ۳۶ اوکرایني ډرون له منځه وړي.
یاد وزارت زیاته کړې؛ د ویجاړو شویو ډرون ټوټې پر استوګنیزو کورونو را پرېوتې، چې په پاېله کې یې څلورو کورونو اور اخیستی او پینځه کسان پکې ټپیان شوي دي.
وړاندې هم د روسیې پر لوېدیځو سیمو هم د ډرون پراخ بریدونه شوي وو.
روسیې بیا پر اوکراین پراخه بریدونه کړي او نږدې ۱۵۰ ډرونونه یې کارولي دي.
د اوکراین هوايي ځواک ویلي؛ روسیې یې په ټول هېواد ۱۴۵ ډرون بریدونه کړي، چې ډېری یې له منځه وړل شوي دي.
د روسیې او اوکراین یو پر بل دا بریدونه د جګړې له پیل راهیسې تر ټولو ستر بریدونه ګڼل شوي دي.