د اسلامي امارت د ټولګټو وزارت د سالنګونو لویې لارې د اساسي بیارغونې چارې سږ کال د پلان مطابق پیل کړې وې، چې دا مهال يې د زيات شمېر ګالریو د بیارغونې او د ګالریو ترمنځ د نښلوونکو فاصلو د کانکريټ اچونې کارونه بشپړ کړي، چې په نږدې وخت کې به ګټې اخيستنې ته وسپارل شي.
د دې لویې لارې د ګانکریټي برخو کار په درېیو طبقو کې شوی، چې د لومړۍ (فلتر لیر) طبقې ضخامت ۴۲ سانتي متره، د سي ټي بي(CTB) طبقې ضخامت ۱۵ سانتي متره او د وروستۍ (سیخ لرونکي) کانکریټ طبقې ضخامت یې ۲۸.۵ سانتي متره دی، چې ټولټال ضخامت یې تر ۸۵.۵ سانتي مترو پورې رسیږي.
د یادې لویې لارې هغه برخې چې د کانکریټ اچونې کار یې بشپړ شوی، د کانکریټ د وچولو لپاره ۲۰ نورو ورځو ته اړتیا لري، ترڅو د وسایطو د تګ راتګ لپاره چمتو شي.
په همدې اساس به د یادې لویې لارې اصلي مسیر ۲۰ ورځې وروسته (د ۱۴۴۶هـ ق کال د جمادی الاخر په ۲۲مه، چې د ۱۴۰۳ه ش کال د جدی (مرغومي) له ۴مې نېټې سره سمون لري) د هر ډول مسافر وړونکو او باروړونکو وسایطو د تګ راتګ پرمخ پرانیستل شي.
دغه راز د دوشي – خنجان مسیر د شاوخوا ۵ کیلومتره سړک د اسفالټ اچونې کار د بشپړېدو په حال کې دی او د پاتې برخو کار یې هم په چټکۍ سره جریان لري.
د یادونې وړ ده، چې ټولګټو وزارت تیر کال د تونل او ۱۶ مې ګالرۍ په شمول د یو شمېر نورو برخو کار بشپړ کړی و.
د ياد مسير د دې برخې په بشپړېدو سره به د تګ-راتګ په برخه کې هېوادوالو ته ګڼې اسانتياوې رامنځته شي.