د سرحدونو، قومونواو قبايلو چارو وزارت وايي؛ د ننګرهار ولايت په سرخرود ولاسوالۍ کې د دوو کورنيو ترمنځ هغه ۳۰ کلنه اوږده شخړه هواره شوه، چې له دواړو خواوو پکې د ګڼو مالي زيانونو ترڅنګ دوه تنه وژل شوي وو او دوه نور پکې ټپيان شوي هم وو.
د سرحدونو، قومونواو قبايلو چارو وزارت د جرګو او قبايلي چارو د همغږۍ مرستیال مولوي محمد علي جان احمد او مل پلاوي په شتون کې د ننګرهار ولايت د سرحدونو، قومونو او قبايلو چارو رییس رحمت الله غازي عمر په هلو ځلو او د ياد ولايت د ۲۲ ولسواليو قومي مشرانو په منځګړيتوب دغه پخوانۍ جنجالي شخړه د يوې غونډې په ترڅ کې داسې مهال پای ته ورسېده، چې مسولینو ښکيل لوري سولې ته را وبلل او د دښمنۍ په ناوړه پايلو يې وپوهول.
د يادو کورنيو مشرانو د مسولینو په شوې پریکړه د رضايت ترڅنګ په تېره دښمني پښيماني ښودلې او ژمنه يې کړې، چې په راتلونکي کې به هيڅ ډول جنجالونو ته زړه ښه نه کړي.