د عامې روغتیا وزیر مولوي نور جلال جلالي په خپل کاري دفتر کې د اروپایي ټولنې لپاره د منځني ختیځ له رییس پټریس اوسټوبس او مرستیالې پولا پامپای سره لیدنه کړې.
په دې لیدنه کې په افغانستان کې د روږدو او سرطاني ناروغیو د درملنې مرکزونو تمویلو، د روغتیايي کارکوونکو د ظرفیت لوړولو، او د روغتیايي سیستم پیاوړتیا اړوند خبرې شوي.
مولوي نور جلال جلالي، د افغانستان د روغتیايي برخې لپاره د اروپایي ټولنې له مرستو مننه کړې او له هغوی یې غوښتي، چې د روغتیايي سیستم په هغو برخو کې کار وکړي، چې د روغتیا وزارت لپاره لومړیتوب لري.
نوموړي ویلي، چې له دې جملې څخه د روږدو او سرطاني ناروغیو د درملنې مرکزونو تمویل او د روغتیايي کارکوونکو د ظرفیت لوړول مهم دي.
د اروپایي ټولنې مسولینو د افغانستان په روغتیايي برخه کې د شفافیت پر شتون خوښي څرګنده کړې او د روغتیايي سیستم د پیاوړتیا لپاره یې د دوامدارو همکاریو ډاډ ورکړی دی.