د عامې روغتیا وزیر مولوي نورجلال جلالي پکتیا ته د سفر پرمهال د دې ولایت په حوزوي روغتون کې په لومړي ځل د اکمال تخصص پروګرام پرانیسته کړې.
یاد روزنیز پروګرام چې په لمړي سر کې به د پینځو څانګو (عمومي جراحي، عمومي داخله، د ماشومانو عمومي داخله، نسايي ولادي او ارتوپيډي) درلودونکی وي د ځوانو ډاکټرانو د روزنې او د زون په کچه د متخصصینو د شتون اړوند به خورا موثر ثابت شي.
مولوي نورجلال جلالي د یاد پروګرام د پرانیستې پر مهال د روغتیایي کارکوونکو د ظرفیت لوړونې پروګرامونو ته په اشارې سره ویلي، هڅه کوي چې د اکمال تخصص برنامه لا پراخه او معیاري کړي ترڅو د هېواد روغتیایي سیستم لا پیاوړی او شته ستونزې تر ډیره حل شي.
ښاغلي جلالي د پکتیا ولایت سیمهییز روغتون لپاره د سي ټي سکن خدماتو په اړه هم ویلي، چې نږدې راتلونکي کې به یې تدارکاتي چارې پیل شي.
د یادې پرانستې پر مهال د عامې روغتیا وزارت د اکمال تخصص لوی رییس ډاکټر نثار احمد نیازي په پکتیا ولایت کې د اکمال تخصص پروګرام پیل د رهبرۍ هڅې، او د ملت لپاره د ښې ارادې او ژمنتیا څرګندونه ګنلې ده.
نوموړي ویلي، چې ډېر ژر به یاد پروګرام ته ځوانان ور وپیژني او د اړوند اړینو بستونو لپاره به هم ازموینه واخیستل شي.