د رسنيو د شکايتونو او سرغړونو د څېړنې کمېسيون نوبتي غونډه د خپرونو چارو د مرستیال مولوي حیات الله مهاجر فراهي په مشرۍ ترسره شوه.
د غونډې په پيل کې مولوي حیات الله مهاجر فراهي د تېرو غونډو د پرېکړو او موضوعاتو ارزونه کړې، ورپسې د ځينو رسنيو له لوري دې کمېسیون ته رالېږل شوي شکايتونه څېړل شوي، چې په ترڅ کې يې د جهان راډيو د ستونزې هواري لپاره کمېټه ټاکل شوې، ترڅنګ يې د راه فردا تلويزيون او کارکوونکو ترمنځ يې د رامنځته شوې ستونزې په اړه خبرې شوي دي.
همدارنګه د داخلي رسنيو د ملاتړ په موخه د سوداګريزو اعلاناتو شريکولو موضوع ته د رسېدنې سربېره په څو نورو موضوعاتو هم بحث شوی او په اړه يې لازمې پرېکړې شوې دي.
د یادونې وړ ده، چې د رسنيو د شکايتونو او سرغړونو د څېړنې کمېسيون په رسنيز ډګر کې د رامنځته شويو ستونزو د حل کولو په موخه رامنځته شوی، چې په نوبتي شکل د کمېسيون د غړو په شتون کې غونډه کوي او رالېږل شوي شکايتونه او رسنيزې سرغړونې څيړي او په اړه يې لازمې پرېکړې کوي.