د امریکا ولسمشر ډونالډ ټرمپ ویلي، چې د ترکیې له ولسمشر رجب طیب اردوغان سره یې پر بېلابېلو موضوعاتو سربېره د غزې، سوريې او روسیې او اوکراین د جګړې په تړاو ټلیفوني خبرې کړې دي.
ټرمپ له اردوغان سره خپلې خبرې “ښې او ګټورې” بللي او زیاته کړې یې ده، چې ده او سیال یې یو بل ته د انقرې او واشنګټن د سفر بلنه ورکړې ده.
د ترکیې د ولسمشرۍ دفتر په خبرپاڼه کې تایید شوې، چې اردوغان د امریکا ولسمشر ته د ترکیې د سفر بلنه ورکړې ده.
ډونالډ ټرمپ، چې پخپله لومړۍ دوره کې یې له اردوغان سره خپلې اړیکې شې بللې دي، ویلي چې دواړه هېوادونو به په اوکراین کې د جګړې پای ته رسولو لپاره همکار وکړي.
ترکي چارواکي وايي، چې رجب طیب اردوغان په غزه کې د سملاسي اوربند په اړتیا خبرې کړې او خبرداری ورکړی، چې په دې تړانګه کې بشري ناورین تر ټولو سختې کچې ته رسېدلی.
ښاغلي اردوغان دغهراز له خنډ پرته غزې ته د بشري مرستو د رسولو او د دې ناوړه حالت په پای ته رسولو ټینګار کړی.
د امریکا او ترکیې ولسمشرانو داسې مهال تلیفوني خبرې کړې، چې له یوې مودې راهیسې د بېلابېلو لاملونو له امله د دواړو هېوادونو ترمنځ اړیکې پېکه شوې وې.