د افغانستان د اسلامي امارت د بهرنیو چارو وزیر مولوي امیر خان متقي د چین د پرمختیايي همکاریو د ادارې له رییس چن ژیاؤډونګ سره لیدنه کړې.
په دې لیدنه کې د افغانستان د بیار غونې په برخه کې د چین د پرمختیايي پروژو او نورو دوه اړخیزو همکاریو په تړاو خبرې شوې دي.
مولوي امیر خان متقي د اقتصادي بیارغونې په برخه کې د یادې ادارې له عملي شویو پروژو مننه کړې او ویلي یې دي، چې له امنیت وروسته د هېواد اقتصادي رغونه د اسلامي امارت له مهمو لومړیتوبونو څخه ده، چې ورته ځانګړې پاملرنه شوې او کېږي.
نوموړي هیله څرګنده کړې، چې د زراعت، انرژۍ او اوږدمهالو بنسټیزو پروژو په برخه کې د افغانستان او چین تر منځ همکاري دې لا نږدې شي.
د بهرنیو چارو وزیر د چین د پرمختیايي همکاریو ادارې ته هغه عملي وړاندیزونه هم وړاندې کړي، چې یاده اداره ترې د افغانستان د بیا رغونې په برخه کې د لومړیتوبونو په توګه کار اخیستلای شي.
دغه راز د چین د پرمختیايي همکاریو ادارې رییس له افغانستان سره د روغتیا، انرژۍ، کرنې او ظرفیت جوړونې په برخو کې د همکاریو ژمنه کړې او له افغانستان سره یې د دوامداره همکارۍ ډاډ ورکړی دی.
دې لیدنه کې د یادې ادارې رییس د افغانستان د بنسټیزو تاسیساتو د ابادۍ، مالدارۍ او د نفتو او ګازو د امکان سنجۍ د مطالعې او تحقیق په برخه کې هم د همکاریو ژمنه هم کړې ده.