د عامې روغتیا وزارت ویاند ډاکټر شرافت زمان وايي، چې د اسلامي امارت له بیا واکمنېدو وروسته په روغتیايي برخه کې تغذیې ته جدي پاملرنه شوې او د خوارځواکۍ درملنې د مرکزونو شمېر له ۸۰۰ څخه ۳ زره او ۲۰۰ ته لوړ شوی دی.
نوموړی زیاتوي، چې په تېرو شپږو میاشتو کې له پینځو کلونو د کمعمره ۱.۱ میلیون خوارځواکه ماشومانو درملنه شوې ده.
د کابل اندراګاندي د ماشوم د درملنې روغتون ډاکټران د خوارځواکۍ لاملونه، اقلیمي بدلونونه، طبیعي پېښې، کډوالي، د مور د شيدو نه ورکړه او خوړو ته نه لاسرسی ګڼي.
دوی وايي، د اندراګاندي روغتون ته هره ورځ زیات شمېر په خوارځواکۍ اخته ماشومان راوړل کېږي، چې پر وخت یې درملنه کېږي.