د افغانستان لپاره د ملګرو ملتونو د سرمنشي ځانګړې استازې روزا اوتنبایوا د اطلاعاتو او کلتور له وزیر ملا خیرالله خیرخواه سره د مخې ښې لیدنه کړې ده.
مېرمن روزا اوتنبایوا د فرهنګي میراثونو په ارزښت او ساتنه خبرې کړې او د افغانستان ملي ارشیف او ملي موزیم یې د افغانستان د تاریخ او کلتور خزانه بللې ده.
نوموړې د افغانستان فرهنګي میراثونو د ساتنې په برخه کې د اړوندو ادارو په ځانګړې توګه د یونسکو د همکاریو په اړه ډاډ ورکړی دی.
ملا خیر الله خیر خواه د افغانستان اسلامي امارت د تېرو څلور کلونو لاسته راوړنو په ځانګړې توګه د نشهيي توکو پر وړاندې مبارزې، اداري فساد له منځه وړلو او په ټول هېواد کې د امنیت تامینولو په اړه خبرې کړې دي.
نوموړي ویلي، چې افغانستان وروسته له ۴۵ کلونو د یو مقتدر مرکزي نظام خاوند شوی دی.
د اطلاعاتو او کلتور وزیر زیاته کړې، چې د هېواد له فرهنګي میراثونو څخه ساتنه د دې وزارت په کاري لومړيتوبونو کې ده. دغهراز فرهنګي میراثونه یې د بشریت مشترک میراث بللی دی.