د امام ابوحنیفه رحمه الله (ننګرهار) دیني جامعې د افتاء او قضاء څانګې له لومړۍ دورې څخه (۳۷) تنه متخصصین فارغ شول
لوړو زدهکړو وزارت وایي، چې په ننګرهار کې د امام ابوحنیفه (رح) جامعې د افتاء او قضاء څانکې له لومړۍ دورې څخه ۳۷ متخصصین فارغ شول.
په یاده فراغتغونډه کې د دیني جامعاتو او تخصصاتو عمومي رییس مولوي اسدالله فرید د یادو متخصصینو فراغت د افتاء او قضاء برخې تخصصي کولو کې ګټور ګام وباله او زیاته یې کړه، د لوړو زده کړو وزارت ژمن دی چې د افغانستان په کچه دیني تخصصي برنامې لا زیاتې او پیاوړې کړي، چې د شرعي علم متخصصین د اوسني عصر ستونزو ته رسېدنه وکړي.
همدارنګه نورو ویناوالو فارغو شویو فاضلانو ته اړینې لارښوونې او سپارښتنې وکړې او ورته ویې ویل، چې د خپلو تحقیقي وړتیاوو او مهارتونو پر مټ د افتاء او قضاء په میدان کې د عدالت، اعتدال او علمي استدلال غوره مظاهره وکړي.