د کلیو د بیارغونې او پراختیا د سرپرست وزیر ملا محمد یونس اخوندزاده او مل پلاوي له خوا د بادغیس ولایت قادس ولسوالۍ د لوی ذخيروي بند پروژه پرانستل شوه او په عملي ډول یې چارې پيل شوې.
په یاد پلاوي کې د اوبو رسولو او روغتیا ساتنې رییس مولوي بخت منیر محمد، لوړ پوړو چارواکو، د قومندانۍ استازو، د سیمې علمای کرامو، سپین ږیرو او مخورو په کې ګډون درلود.
د قادس ذخیروي بند یوه حیاتې پروژه ده، چې د قادس سیند د اوبو مهارولو، د سیلابونو په مخنیوي او د قادس د اوبو د سرچینو په قوي کولو کې خورا رول لري.
یاد بند د کاسي د اوبو ظرفیت ۱.۸۲ میلیون متر مکعب دی او د ۳۲ متره په ارتفاع سره جوړیږي.
د کلیو د بیارغونې او پراختیا وزارت په پراختيايې بودیجه چې ۱۲ میلیونه او ۵۰۰ زره امریکايې ډالرو په لګښت د اوبو رسولو او روغتیا ساتني ریاست لخوا پلي کیږي.
د دغه بند په جوړیدو سره به یو زر او ۴۰۰ هکتاره ځمکه خړوبه شي او د سیمې ۶۰ زره اوسيدونکو ته به د زراعت په برخه کې کاري فرصتونه برابر شي.