د تایوان چارواکو د امریکا د ولسمشر ډونالډ ټرمپ او د چین د ولسمشر شي جین پینګ تر لیدنې وروسته ویلي، چې تایوان یوه خپلواکه او حاکمه سیمه ده، خو د چین او تایوان ترمنځ به اوسنی وضعیت وساتل شي.
دغه څرګندونې وروسته له هغې مطرح شوې، چې ډونالډ ټرمپ له فاکس نیوز سره په مرکه کې ویلي، نه غواړي تایوان د امریکا په ملاتړ د بشپړې خپلواکۍ اعلان وکړي.
بلخوا د چین ولسمشر شي جین پینګ ټرمپ ته خبرداری ورکړی، چې د تایوان مسئله د واشنګټن او بیجینګ ترمنځ تر ټولو حساسه موضوع ده او که په سمه توګه مدیریت نه شي، ښايي د دواړو هېوادونو اړیکې له جدي خطر سره مخ کړي.
همدارنګه ټرمپ هم ویلي، چې د تایوان په اړه یې وروستۍ پرېکړه نه ده کړې او لا هم څرګنده نه ده، چې امریکا به تایوان ته د وسلو نوې بسته منظور کړي که نه.
په ورته وخت کې د تایوان د بهرنیو چارو وزارت ټینګار کړی، چې د امریکا تګلاره لا هم بدله شوې نه ده او واشنګټن له تایوان سره خپلو اړیکو او همکاریو ته دوام ورکوي.