د بغلان ولایت د مرکزي ولسوالۍ د چمقلعه سیمې په نوي صنعتي پارک کې د شاوخوا دوه میلیونه امریکايي ډالرو په ارزښت د وریجو د پروسس د یوې کارخونې رغنیزې چارې د سیمهییزو چارواکو په شتون کې پیل شوې.
د بغلان ولایت د صنعت او سوداګرۍ ریاست رییس قاري محمد نعیم همکار ویلي، چې دغه کارخونه د یوه کورني شرکت له لوري جوړیږي، چې بشپړېدو وروسته به سلګونو کسانو ته د مستقیم او غیرمستقیم کار زمینه برابره کړي.
نوموړي زیاته کړې، چې د دغې کارخونې د جوړېدو موخه د کورنیو وریجو پروسس او پر تولیداتو د ارزښت زیاتول دي.
ښاغلي همکار وینا، د بغلان والي مولوي عبدالله مختار د پرانیستې مراسمو پر مهال ټینګار کړی، چې سیمهییزه اداره د پانګهوالو ملاتړ کوي او د صنعت ودې او پانګونې پراختیا لپاره به اړینې اسانتیاوې برابرې کړي.