د افغانستان کرېکټ بورډ له لوري د کورني کرېکټ تر ټولو سترو شل اوریزو «شپږېزه کرېکټ ليګ» سيالیو نېټه او ځای په ډاګه شو.
د مهالوېش له مخې به د دغو سیالیو یوولسم پړاو د راتلونکې جولای میاشتې په لومړۍ نېټه د خوست ولایت په «رحمت ولي مسرور» کرېکټ لوبغالي کې پیل شي، چې د همدې میاشتې تر ۱۴مې نېټې پورې به دوام وکړي.
د کرېکټ بورډ د معلوماتو له مخې دا لومړی ځل دی، چې يادې سیالۍ له پلازمېنې کابل څخه بهر په يوه ولایت کې ترسره کېږي.
په دې پړاو کې هم پینځه لوبډلې( سپينغر، بندامیر، مسعينک، امو او بست) ګډون لري، چې د ملي لوبډلې د پیاوړو لوبغاړو سربېره به په کې ځوان او د کورني کرېکټ ګڼ شمېر لوبغاړي ونډه ولري.
سږني پړاو لوبو کې د سپین غر لپاره لوبډلمشر راشد خان ټاکل شوی دی دغه راز د امو لپاره عظمتالله عمرزی، مسعينک لپاره رحمنالله ګربز، د بست لپاره ابراهيم ځدراڼ او حشمتالله شهيدي بيا د بندامير لوبډلې د لوبډلمشر چارې په غاړه لري.
په يادو سیالیو کې به هره لوبډله له بلې لوبډلې سره دوه ځل مخامخ شي، چې په ټوله کې به د ۱۴ ورځو په موده کې ۲۱ لوبې ترسره شي او په پای کې به دوه مخکښې لوبډلې د جولای میاشتې په ۱۴مه نېټه ترسره کېدونکې پایلوبې ته لاره ومومي.
د يادونې وړ ده، چې د کورني کرېکټ دغه سترې شل اوریزې سیالۍ د لومړي ځل لپاره په ۲۰۱۳م کال کې پیل شوې، چې له هغه راهیسې یې لس پړاوونه ترسره شوي دي او سږکال به یې یوولسم پړاو سیالۍ ترسره کېږي.
سپین غر لوبډلې ۳ ځلې، دغه راز امو، مس عینک او کابل لوبډلې دوه-دوه ځلې دغه سیالۍ په خپلې اتلولۍ پای ته رسولې دي.
د کرېکټ لوبې د شنونکو په باور، شپږېزې کرېکټ لیګ سیالیو د کورني کرېکټ، ځوانو لوبغاړو او په ټوله کې د افغانستان د کرېکټ ودې او پرمختګ په برخه کې مهم او اغېزناک رول لوبولی دی.