له پېښو سره د مبارزې امادګۍ ادارې لوی رییس ملا نورالدین ترابي په افغانستان کې د جایکا (JICA) له رییس توساکا سوتا او مل پلاوي سره لیدنه کړې.
له پېښو سره د مبارزې امادګۍ اداره وايي، چې دې لیدنه کې د پېښو د خطرونو د مدیریت، د وقایوي پروژو د پلي کولو، د اقلیمي بدلونونو د اغېزو کمولو او د ماین پاکۍ د پروګرامونو په اړه د دوه اړخیزو همکاریو پر پراختیا خبرې شوې دي.
ښاغلي ترابي د بشري مرستو او عامالمنفعه فعالیتونو پر غیرسیاسي ماهیت د ټینګار ترڅنګ، له نړیوالو بنسټونو، همکارو موسسو او تمویلونکو غوښتي چې د بېړنیو مرستو سربېره، د وقایوي پروژو او د پېښو د خطرونو د کمولو په برخه کې لا ډېره پانګونه وکړي.
د جایکا رییس ویلي، د جاپان دولت او خلک تل د افغانستان د خلکو ترڅنګ ولاړ دي او خپلو بشري او پراختیایي همکاریو ته به په بېلابېلو برخو کې دوام ورکړي.