د مخابراتو او معلوماتي ټکنالوژي وزارت او د احصایې او معلوماتو ملي ادارې تر منځ د مخابراتي خدمتونو د مشترکینو د هویت د تثبیت ګډ هوکړه لیک لاسلیک شو.
د مخابراتو او معلوماتي ټکنالوژي وزارت او د احصایې او معلوماتو ملي ادارې تر منځ د مخابراتي او انټرنیټي خدمتونو د مشترکینو د هویت د تثبیت په موخه د برېښنايي پیژندپاڼو له سیسټم سره د سیمکارټونو د ثبت او مدیریت سیسټم د نښلېدو ګډ هوکړه لیک لاسلیک شو.
د دغې هوکړه لیک له مخې به افغانستان کې د غیرې قانوني سیمکارټونو مخه په پوره ډول ونیول شي چې د هېوادوالو د ازار اذیت او رواني امنیت د اخلال سبب شوي وو او ورسره به افغانستان کې د سیمکارټونو د ویش پروسه په بشپړ ډول شفافه او اسانه شي.
یاد هوکړه لیک چې د مخابراتو او معلوماتي ټکنالوژي وزارت د وزیر محترم الحاج مولوي نجیب الله حقاني او د احصایې او معلوماتو ملي ادارې رییس ښاغلي ډاکټر صاحب فقیر محمد زیار لخوا لاسلیک شو دواړو لوریو یاد اقدام افغانستان کې موثر او ګټور وباله .
د مخابراتو او معلوماتي ټکنالوژي وزارت وزیر ښاغلي مولوي صاحب نجیب الله حقاني وویل، نه یوازې دا چې د یاد ګام په اخیستو سره به افغانستان کې د هویت د تثبیت ستونزه حل شي بلکې ومو کولای شول د ډیجیټلایزشن پر لوري هم یو موثر ګام واخلو له یوه لوري به مو د غیر قانوني سیمکارټونو مخه نیولې وي او له بل لوري به د شفافیت تر څنګ یاده پروسه ګړندۍ او سهولتونه به ورسره ایجاد شي.
د احصایې او معلوماتو ملي ادارې رییس ښاغلي ډاکتر صاحب فقیر محمد زیار هم افغانستان کې د الکټرونیکي پیژندپاڼو له سیسټم سره د سیمکارټونو د ثبت او راجسټریشن پروسه ګټه وره او د وخت اړتیا یې وبلله .
د یادونې وړ ده چې له کلونو راهیسې افغانستان کې د غیر قانوني سیمکارټونو شتون افغانانو لپاره ستر سرخوږی جوړ کړی و او په بازارونو کې به په ازاد ډول پلورل کېدل، د افغانستان اسلامي امارت له راتلو سره سم د مخابراتو او معلوماتي ټکنالوجۍ وزارت یاده چاره په خپلو لومړیتوبونو کې ونیوله او د یوې جامع کړنلارې په اساس یې افغانستان کې د غیر قانوني سیمکارټونو مخه په پوره ډول ونیوله.