د عامې روغتیا سرپرست وزیر ډاکټر قلندر عباد د افغانستان لپاره د روغتیا نړیوال سازمان له مشر او د اوچا دفتر له مسولینو سره لیدنه کړې.
په لیدنه کې د افغانستان لپاره د روغتیا نړیوال سازمان مشر ډاکټر جمشېد، د بشري او پرمختیايي ټولنې مشر ادریکا راتوت، د اندریکا د دفتر رییس فادې المیوچي او د اوچا دفتر مشرې ازابیل مورسادکارلسن ګډون درلود.
په یاده لیدنه کې د روږدو ناروغانو د درملنې، د افغان روغتیايي پرسونل د ظرفیت لوړولو، د پلي کوونکو موسسو د فعالیتونو، د روغتیا په برخه کې پر تلپاتې همکارۍ او ګڼو نورو موضوعاتو خبرې شوي دي.
د عامې روغتیا سرپرست وزیر ویلي؛ د هېواد ټولو وګړو ته د معیاري روغتیايي خدمتونو وړاندې کول زموږ د لومړیتوبونو څخه دي او هڅه کوو ترڅو، د روغتیا په برخه کې د خپلو کاري شریکانو په همکارۍ د روغتیايي خدمتونو کیفیت ښه او هېوادوالو ته غوره روغتیايي خدمتونه وړاندې کړو.
ډاکټر قلندر عباد زیاته کړې، د افغان روغتيايي پرسونل ظرفیت لوړونه زموږ له لومړیتوبونو څخه ده او په همدې برخه کې هڅه کوو تر څو د ظرفيت لوړونې لپاره یې زمينه برابره کړو.
همداراز په دې لیدنه کې د روغتیا په برخه کې پر دوه اړخیزو همکاریو ټینګار کړی.