د ریاستالوزرا اقتصادي مرستیال ملا عبدالغني برادر اخوند د روان ۱۴۰۳ لمریز کال د وري میاشتې په ۲۷مه نېټه روزګان ولایت کې د وروستیو سېلابونو له امله د زیانمنو شویو هېوادوالو سره د مرستې په موخه دغه ولایت ته سفر وکړ.
ملا عبدالغني برادر اخوند روزګان ته د خپل سفر پر مهال د یاد ولایت له مسولینو، مجاهدینو او اوسیدونکو سره لیدنه کړې او هغوى ته يې د وروستیو سېلابونو له امله د رسېدلو زیانونو له امله د لازمې همکارۍ ډاډ ورکړی دی.
د ریاستالوزرا اقتصادي مرستیال د یاد ولایت مسولینو ته د کارونو ښه ترسراوي په اړه اړینې سپارښتنې کړې او له دوی یې غوښتي، چې په ډېر صداقت او رښتينولۍ سره د خپلو زیانمنو هېوادوالو خدمت وکړي.
محترم ملا صاحب ویلي: “دا هغه خلک دي چې د اسلامي نظام د راتګ لپاره یې هر ډول قربانۍ ورکړې او ډېر تکلیفونه یې ګاللي دي، اوس یې حق دی چې اسلامي امارت د ارام ژوند زمینه ورته برابره کړي.”
نوموړي زیاته کړې؛ که د هېواد په هر ګوټ کې هېوادوال په مشکل کې وي، د اسلامي امارت مسوولین مکلف دي، چې د دوی حال واخلي او ستونزو ته یې پر وخت رسېدنه وکړي.
د روزګان ولایت اوسېدونکو د اسلامي امارت د ملکي او نظامي مسولینو له چلند څخه خوښي څرګنده کړې او ویلي یې دي، چې د اسلامي امارت مسولینو یې تل د ستونزو پرمهال لاسنیوی کړی دی.
دغه راز دوی زیاته کړې؛ خوشحاله دي چې پر ټول افغانستان بشپړ اسلامي نظام حاکم شوی او نور د نفرت، قومي تعصب او نفاق لمن له دغه هېواده ټوله شوې ده.