د امر بالمعروف، نهې عنالمنکر او شکایتونو اورېدلو وزارت پوځي مرستیال شیخ سعید احمد شهید خیل د برېتانیا هېواد څخه د دیني عالمانو راغلي لس کسیزه پلاوي سره لیدنه کړې.
په دې لیدنه کې شیخ سعید احمد شهید خیل یاد پلاوي ته د ښه راغلاست ترڅنګ ویلي، موږ پوهېږو چې د کفري یرغل په ماتولو کې د الله تعالی د نصرت ترڅنګ د ټول اسلامي امت دعا او معنوي ملاتړ له موږ سره وو.
نوموړي زیاته کړې، اسلامي امارت یواځینی اسلامي نظام دی چې ټوله اسلامي نړۍ پرې ویاړي.
ښاغلي شهید خیل همدارنګه له یادو دیني علماوو غوښتي ترڅو د اسلامي امارت رښتینی انځور او دیني واقعيتونه نړۍ ته وړاندې کړي.
د برتانيې هېواد دیني عالمانو ویلي؛ له ډېرو کلونو راهیسې مسلمانانو داسې انګېرله چې اسلامي امت یتیم دی، خو د اسلامي امارت پر راتګ موږ ډاډ ترلاسه کړ، چې اسلامي امت اوس غمخواره لري او پرې ډاډه دي.
نوموړو زیاته کړې؛ اسلامي امارت د ډېرو علماوو او افغاني مسلمانانو په قربانیو راغلی دی، دا چې موږ په دې ډکر کې برخه نه ده اخیستي ټول یې پوروړي یو، خو ژمنه کوو چې د اسلامي امارت رښتینی انځور نړۍ ته وړاندې کړو او هغوی د افغانستان له حقایقو خبر کړو.
دا په داسې حال کې ده، چې له دې وړاندې هم ورته پلاوي له بهرنیو هېوادونو راغلي او د اسلامي امارت له مشرانو سره یې لیدنې کړې دي.