د پکتیا په ګردې څېړۍ کې د اسلامي امارت ګڼ مشران، د کابینې غړي، دیني علما او د هېواد له بېلابېلو سیمو زرګونه هېوادوال د شهید حقاني جنازې اداینې لپاره انتظار وو.
د افغانستان اسلامي امارت د مشرانو او د شهید د کورنۍ په استازیتوب یو شمېر مشرانو ویناوې وکړې.
د ریاست الوزرا سیاسي مرستیال مولوي عبدالکبیر د شهید د شخصیت ستاینه وکړه او د هغه د متانت اثبات لپاره یې وویل؛ د کندهار په وروستي سفر کې شهید خلیل الرحمن حقاني هم ورسره مل و، د ده په وینا شهید حقاني هلته تر بل هر چا مخکې په خورا جرأت سره د ټولو مخکې د ستونزو او ناخوالو تفصیلي یادونه وکړه.
په دوام کې د شهید ورور ابراهیم حقاني د حاجي شهید خلیل الرحمن حقاني د لارې پر دوام ټینګار وکړ او زیاته یې کړه؛ چې د دوی کورنۍ د قام د هوساینې لپاره د تل په څېر هر راز مالي او ځاني قربانۍ ته چمتو ده.
په دې مراسمو کې د کورنیو چارو وزیر خلیفه سراج الدین حقاني هم د راغلو مشرانو او ولسونو څخه د هغوی د راتللو او غمشریکۍ په پار مننه وکړه.
خلیفه سراج الدین حقاني د شهید حقاني د شهادت له کبله د اسلامي امارت مشرانو او ټول ولس ته تسلیت ووایه.
نوموړي شهید حقاني د درې انقلابونو یو مخلص مجاهد او مصلح مشر یاد کړ.
د کورنیو چارو وزیر زیاته کړه؛ د دوی هره مبارزه د في سبیل الله پر بنسټ وه او هېڅکله د شخصي عقدې او شخصي غچ په فکر کې نه ول، ځکه خو ډاډه دی چې د شهید حقاني شهادت هم د کوم شخصي عناد له کبله نه بلکې د الهي مسیر او دین د دښمنانو عمل دی.
مونږ هېڅ شخصي فکر نه لرو هر څه مو د الله ج لره دي او ډاډه یو چې ستر رب عَزِيزٌ ذُو انْتِقَامٍ رب دی.
مونږ د جګړې او مبارزې د لارو چارو مخکښان یو خو هیڅکله دا لارې چارې د الله ج له رضا پرته د شخصي مقاصدو وسیله نه ګرځوو.
شهید خلیل الرحمن حقاني د ټولو سختو کړاوونو تر زغم وروسته بیا هم د دومره سترې حوصلې ظرفیت درلود چې که مونږ به کم حوصلې هم شو ده به د ستونزو حل لپاره د هېواد هر ګوټ ته منډه وهله.
د خلیفه صیب تر وینا وروسته د بهرنیو چارو وزیر مولوي امیرخان متقي هم خبرې وکړې.
مولوي امیرخان متقي د افغان مجاهد ولس نه ماتېدونکی زغم او هوډ بیان کړ او دا یې ویاړ وباله چې د شهید خلیل الرحمن حقاني په څېر یو لوړپوړی مشر داسې حال کې شهادت مقام ته رسیږي، چې د ولس پر وړاندې یې د خدمت لپاره دروازې پرانیستې دي دا هر مجاهد، وزیر، والي او د اسلامي امارت هر مشر د الله ج په لاره کې شهادت ستر ویاړ بولي او تل ورته چمتو دي.
نوموړي همدارنګه اشاره وکړه، چې تېرو اوو میاشتو کې د داعشي خوارجو د ۷ بریدونو له ډلې شپږ هغه یې د کره استخباراتي معلوماتو پر بنسټ له هېواده بهر پلان او ترتیب شوې دي.
ښاغلي متقي پر هغه هېوادونو چې داسې شریر عناصر ساتي غږ وکړ، چې داسې عناصرو ته ځای ورکول د دې اور لمن تاسو ته هم رسوي دا یو ګډ دښمن دی د ملاتړ پر ځای یې ګډ مخنیوي کې باید همکار شو.
د خبرو د لړۍ پای حافظ انس حقاني د مننې په الفاظو وشو نوموړي د شهید حقاني د شهادت په پار د ټولو کورنیو او بهرنیو اشخاصو او ادرسونو د غمرازۍ څخه د خپلې کورنۍ او اسلامي امارت په استازیتوب مننه وکړه.