د اوبو او انرژي وزیر ملا عبداللطیف منصور د “ایران ترانسفو” په نوم د الماني/ ایراني شرکتونو د یوې ټولګې له مسولینو سره لیدنه کړې.
په دغه لیدنه کې د یادو شرکتونو د ټولګې مسولینو د خپلو کړنو په اړه معلومات وړاندې کړي او ویلي یې دي؛ لېواله دي چې په افغانستان کې د انرژي د تولید پروژو، د انرژي شبکو د پراختیا او د برېښنا شبکو د اړتیا وړ تجهیزاتو د چمتو کولو په برخه کې پانګونه وکړي.
ملا عبداللطیف منصور د نوموړو شرکتونو د ټولګې د لېوالتیا هرکلی کړی او یادونه یې کړې، غوره ده چې د دواړو لورو د تخنیکي مسولینو ترمنځ تخنیکي ناستې ترسره شي؛ ترڅو د پروژې د تشخیصولو، د پانګونې د څرنګوالي او نورو اړینو همغږیو په هکله هوکړې ته ورسي او تر هغه وروسته، وروستې کړنې د یو بل سره په هوکړه تر لاس لاندې ونیول شي.