د افغانستان برېښنا شرکت عمومي اجراییوي رییس ډاکټر عبدالباري عمر خپل کاري دفتر کې افغانستان کې د ملګرو ملتونو د سرمنشي ځانګړې استازې روزا اوتونبایوا سره لیدنه کړې.
په دې لیدنه کې د برېښنا اړوند لویو پراختیايي پروژو په اړه خبرې شوې دي.
د افغانستان برېښنا شرکت عمومي اجراییوي رییس ویلي؛ ټولنیز، اقتصادي، پوهنیز، روغتیايي، کرنې او صنعتي برخو کې برېښنا یوه مهمه بشري اړتیا ده او نړیوال باید دې برخو کې خپلو ژمنو ته ژمن پاتې شي او د برېښنا اړوند برخو کې خپلې نېمګړې پروژې د کړو ژمنو له مخې بشپړې کړي.
د ډاکټر عبدالباري عمر په وینا، دا چې برېښنا د ټولنیز اقتصاد ودې او فقر مخنېوي کې لویه ونډه لري، نو نړیوال تمویلوونکي سازمانونه باید د خپلو نېمګړو پروژو بشپړونې سربېره نوې پروژې هم خپلو پلانونو کې شاملې کړي او د تخنیکي اړتیاوو بشپړونې په ګډون د کارکوونکو ظرفیتونو لوړولو کې همکاري وکړي.
ناسته کې افغانستان کې د ملګرو ملتونو د سرمنشي ځانګړې استازې د افغانستان برېښنا شرکت رهبرۍ څخه مننه کړې او د برېښنا اړوند پروژو بشپړولو لپاره یې د نړیوالو تمویلوونکو سازمانونو هڅونې په ګډون ګڼو برخو کې د همکارۍ ډاډ ورکړی دی.