د افغانستان اسلامي امارت د ریاست الوزرا اداري مرستیال مولوي عبدالسلام حنفي، د ښار او کور جوړولو وزیر مولوي حمدالله نعماني، د سرپل مرستیال والي مولوي خال محمد حقانی او د یاد ولایت نورو علماوو، مشایخو، متنفذینو او سیمه ییزو مسولینو په شتون کې د سرپل ولایت په سیداباد ولسوالۍ کې راستنېدونکو کډوالو ته چې په اجباري توګه را اېستل شوي، یو زر ۲۴۷ جریبه مساحت لرونکی ښارګوټی پرانیست.
په دې ښارګوټي کې ټول ښاري امکانات په پام کې نیول شوي دي.
د ریاست الوزرا اداري مرستیال د دې ښارګوټی د پرانیستې په مراسمو کې ویلي؛ د اسلامي امارت مشران او مسولین له ځنډ پرته کوښښ کوي، چې راستنېدونکو هېوادوالو ته د هوساینې او ارامي زمینه برابره او لازمې اسانتیاوې ورته چمتو کړي.
مولوي عبدالسلام حنفي زیاته کړې؛ اسلامي امارت راستنېدونکو کډوالو ته د غوره خدماتو وړاندې کولو لپاره بېلابېلو کمېټو ته دنده سپارلې چې د اړتیا وړ خدمات لکه د څښاک اوبه، خواړه، په مېشت غالو کې موقت مسکن، اصلي ځایونو ته د کډوالو لېږد په ښه توګه ترسره کړي.