د ټولګټو وزارت د اوسپنې پټلۍ مرستيال مولوي محمد اسحاق صاحبزاده او مل پلاوي اوزبيکستان هېواد ته د سفر پرمهال د حيرتان بندر د ګټې اخیستنې، څارنې او ساتنې تړون او د ياد بندر د ريلي ترميماتو تړون د غځولو په تړاو هوکړه وکړه.
د دغه سفر په جريان کې د ټولګټو وزارت د اوسپنې پټلۍ د مرستيال او د اوزبيکستان هېواد د سوګديانا ټرانس کمپنۍ د ریيس جمشيد اقا ترمنځ د حيرتان بندر اړوند د ګټې اخیستنې، څارنې او ساتنې چارو د غځولو تړون د ۲۰۲۵ او ۲۰۲۶ کال لپاره وغځول شو.
په ياد سفر کې د افغانستان د اوسپنې پټلۍ د مرستيال او اوزبيکستان هېواد د اوسپنې پټلۍ د ریيس ترمنځ د افغان-ټرانس پروژې د امکان سنجۍ د (Feasibility Study) د پیل او د مزارشريف-هرات اوسپنې پټلۍ د سروې او ډيزاين چارو پر مخ وړلو هوکړه وشوه.
دا په داسې حال کې ده، چې په دغه سفر کې د افغانستان، اوزبيکستان او پاکستان هېوادونو ترمنځ د افغان-ټرانس پروژې د عملي چارو د پيل کېدو په تړاو هم خبرې اترې کړي دي، چې اوزبيکستان هېواد د افغان-ټرانس پروژې د امکان سنجۍ (Feasibility Study) چارو مالي تمويل په غاړه اخيستی او په نږدې راتلونکې کې به يې چارې پيل شي.
د يادونې وړ ده، چې اوسمهال د مزارشريف-هرات د اوسپنې پټلۍ مسير د سروې او ډيزاين چارې هم د اوزبيکستان هېواد لخوا عملا جريان لري.