ایراني رسنیو راپور ورکړی، چې د دې هېواد د بندر عباس په رجايي بندر کې زوروره چاودنه شوې ده.
دا چاودنه د سونتوکو په یوه زېرمه کې شوې، چې علت یې معلوم نه دی او وروسته اور هم لګېدلی دی.
ځايي مسولینو ویلي، چې ټپیان یې نږدې روغتیايي مرکزونو ته لېږدولي، خو د نورو تلفاتو په تړاو یې څه نه دي ویلي.
د ایراني رسنیو د راپورونو له مخې، تر اوسه ۱۱۵ ټپیان روغتونونو ته لېږدول شوي. ژغورونکې ډلې د پېښې ځای ته رسېدلې او د پلټنې او ژغورنې چارې لا هم جریان لري.
د ټولنیزو رسنیو په خپرو شویو ویډیوګانو کې ښکاري، چې د پېښې له ځایه غټ تور لوګي پورته کېږي. دغهراز زیانمنې ودانۍ او موټرونه هم لیدل کېږي.