له ګاونډیو هېوادونو او په ځانګړې توګه له پاکستان څخه په جبري ډول د افغان کډوالو د ایستلو لړۍ له پيلېدو سره سم اسلامي امارت د بېرته راستنېدونکو لپاره زیاتې اسانتیاوې برابرې کړې او په ډېری ولایتونو کې یې ښارګوټي ورته جوړ کړي دي.
د کور او ښار جوړولو وزارت وايي، چې اسلامي امارت په تېرو شاوخوا ۱۸ میاشتو کې د بېرته راستنېدونکو لپاره ۳۵ نوي ښارګوټي جوړ کړي.
یاد وزارت زیاتوي، چې دا ښارګوټي د اسلامي امارت د کورنیو عوایدو او شته امکاناتو پر مټ جوړ شوي.
د اقتصاد وزارت مسولین بیا وايي، چې د بېرته راستنېدونکو لپاره د مرستو د جلب او جذب کمېټه هڅه کوي، تر څو ملي او نړیوال بنسټونه هم د بېرته راستنېدونکو اړمنو لپاره د کورونو، ټولګټو تاسسیاتو او اساسي اړتیاوو په جوړولو کې وهڅوي.
د کډوالو او بېرته راستنېدونکو چارو وزارت د معلوماتو له مخې، اسلامي امارت د بېرته راستنېدونکو لپاره د هېواد په ۳۱ ولایتونو کې ۵۸ ښارګوټي لري، چې له جملې یې ۲۲ فعال او بېرته راستانه شوي افغانان ژوند پکې کوي.