اطلاعاتو او کلتور وزارت وايي، چې د قطر هېواد لهخوا د نړیوال نندارتون لپاره د تاریخي اثارو د متخصصینو او ارزونکی پلاوی غزني ته رسېدلی، ترڅو د دغه ولایت له موزیم څخه د نندارتون لپاره تاریخي اثار وټاکي.
د غزني ولایت د اطلاعاتو او کلتور رییس ملا حمیدالله نثار د یاد پلاوي د هرکلي پر مهال د اړینې همکارۍ ژمنه کړې او څرګنده کړې یې ده، چې غزني د تاریخي اثارو کور دی، او د دغو اثارو نړیوال نندارتون ته وړاندې کول د فرهنګي همکاریو یوه غوره نښه بلل کېږي.
ملا حمیدالله نثار ویلي: “چمتو یو، چې د غزني تاریخي اثار نړیوال نندارتون ته وړاندې کړو، څو د افغانستان تاریخي هویت ته لا نوره وده ورکړل شي او د غزني تمدني عظمت نړۍ ته وښودل شي.”
همداراز، له قطر څخه راغلي د تاریخي اثارو متخصصینو ډاډ ورکړی، چې د غزني له موزیم څخه به اثار په بشپړ خوندیتوب او درناوي قطر ته ولېږدول شي، ترڅو د نړیوال نندارتون له لارې نړیوالو ته وړاندې شي.
د یادونې وړ ده، چې د غزني له تاریخي موزیم څخه د نندارتون لپاره د اثارو غوره کول یوه مهمه فرهنګي لاسته راوړنه ده، چې کولی شي د دغه ولایت لرغوني تمدن ته د نړیوالو پام راواړوي.