مولوی عبدالکبیر، معاون سیاسی ریاست‌الوزرا با خانم مارتین دی‌بور رئیس برنامه‌های کمیته بین‌المللی صلیب سرخ برای افغانستان، دیدار و گفت‌وگو نمود.
در این دیدار، معاون سیاسی ریاست‌الوزرا ضمن خوش‌آمدید به خانم دی‌بور و تیم کاری‌اش، ازکمک‌های کمیته بین‌المللی صلیب سرخ در دوره جهاد ۲۰ساله به خصوص کمک و رسیدگی به زندانیان قدردانی نمود.
رئیس برنامه های کمیته بین المللی صلیب سرخ برای افغانستان ضمن تشکر از همکاری امارت‌اسلامی، پیرامون برنامه‌ها و اولؤیت‌های کاری خویش در سال آینده معلومات داده افزود؛ همکاری این نهاد در عرصه‌های مختلف با افغانستان دیرینه بوده و فعالیت‌های شان بیشتر در عرصه‌های صحت، انرژی، آب آشامیدنی و رسیدگی به زندانیان متمرکز می‌باشد.
خانم دی‌بور اطمینان داد که کمیته بین‌المللی صلیب سرخ به همکاری‌های خویش به دهقانان و خانواده‌های که نان‌آور شان را در جریان جنگ‌ها از دست داده‌اند، ادامه خواهد داد.
به گفته خانم مارتین، کمیته بین‌المللی صلیب سرخ در افغانستان هفت مرکز ارایه خدمت برای معلولان دارد و ماهانه به بیشتر از ۱۰هزار تن خدمات ارایه می‌نماید.
معاون سیاسی ریاست‌الوزرا، از خدمات کمیته بین‌المللی صلیب سرخ قدردانی کرد و ابراز امیدواری نمود که کمک‌های این کمیته به مردم افغانستان ادامه داشته باشد.
مولوی عبدالکبیر، تصریح کرد که افغانستان بخاطر آسیب‌های ناشی از حوادث طبیعی از قبیل زلزله و خشک‌سالی و افزون بر این مهاجرانی که از پاکستان به کشور عودت می‌کنند، بیشتر به کمک‌ها نیاز دارند.
به گفته معاون سیاسی، از این‌که ارایه خدمات برای افغان‌ها مسئولیت نهادهای امارت‌اسلامی افغانستان می‌باشد، در پهلوی آن کمک‌های کمیته بین‌المللی صلیب سرخ و سایر نهادهای بین‌المللی به مناطق دورافتاده کشور مهم می‌باشد.
مولوی عبدالکبیر هم‌چنان افزود؛ نیروهای امارت‌اسلامی کوشش می‌کنند که هیچ‌کسی را برمبنای قومیت و زبان زندانی نسازند و تحت حاکمیت امارت‌اسلامی زندانیان از حقوق شان بهره‌مند می‌باشند.
رئیس برنامه‌های کمیته بین‌المللی صلیب سرخ از اولؤیت‌های کاری خویش در افغانستان به مولوی عبدالکبیر معلومات ارایه کرد
