د ریاست الوزراء سیاسي مرستیال مولوي عبدالکبیر د افغانستان لپاره د سره صلیب نړیوالې کمېټې د پروګرامونو له رییسې مېرمن مارتین دې بور سره لیدنه کړې.
د ریاست الوزرا سیاسي مرستیال په تېره ۲۰ کلنه دوره کې د سره صلیب بین المللي کمېټې د مرستو په ځانګړي ډول بندیانو ته یې د مرستو او رسېدنې قدرداني کړې.
د افغانستان لپاره د سره صلیب بین المللي کمېټې د پروګرامونو رییسې د اسلامي امارت له همکاریو په مننې په راتلونکي کال کې د خپلو پروګرامونو او کاري لومړیتوبونو په اړه معلومات ورکړي او ویلي يي دي؛ له افغانستان سره د یاد بنسټ همکاري اوږه مخینه لري او زموږ ډېری فعالیتونه د روغتیا، انرژۍ او اوبو او بندیانو ته د رسېدنې په برخو پورې متمرکز دي.
اغلې ډاډ ورکړی؛ چې د سره صلیب بین المللي کمېټه به په بېلابېلو برخو له هغې ډلې بزګرانو او هغو کورنیو سره، چې د نفقې پیدا کولو سړي یي په جنګونو کې له لاسه ورکړي دي، خپلو همکاریو او مرستو ته دوام ورکړي.
نوموړې زیاته کړې، د سره صلیب بین المللي کمېټه په افغانستان کې معلولینو ته د خدمتونو وړاندې کولو اووه مرکزونه لري، چې هره میاشت تر لسو زرو زیاتو خلکو خدمتونه وړاندې کوي.
د ریاست الوزرا سیاسي مرستیال د روغتیا، ماین پاکولو او بندیانو ته د رسېدنې په برخو کې د سره صلیب بین المللي کمېټې د خدمتونو په قدردانۍ هیله څرګنده کړې، چې له افغانانو سره د دې کمېټې مرستې دوام ومومي.
مولوي عبدالکبیر د مرسته کوونکو بنسټونو قدرداني کړی او ویلي يي دي؛ افغانستان د طبیعي پېښو لکه زلزلې، وچکالۍ او اجباري بېرته راستنېدونکو کډوالو څخه د رامنځته شویو زیانونو له امله زیاتو مرستو ته اړتیا لري.
سیاسي مرستیال څرګنده کړې؛ د اسلامي امارت ترڅنګ د سره صلیب بین المللي کمېټې او نورو بین المللي بنسټونو همکاري په بېلابېلو برخو په ځانګړي ډول لېرې پرتو سیمو کې د روغتیایي خدمتونو وړاندې کولو په برخه کې مهم دي.
مولوي عبد الکبیر زیاته کړې؛ د اسلامي امارت ځواکونه هڅه کوي هیڅوک بېګناه یا هم د ژبې او قومیت پربنسټ زنداني نکړي، دغه راز د اسلامي امارت تر حاکمیت لاندې بندیان له خپلو انساني حقونو برخمن دي.