د افغانستان اسلامي امارت د یوشمېر هېوادونو په ځانګړي ډول د امریکايي چارواکو د څرګندونو په غبرګون کې ویلي، چې بهرني هېوادونه دې د افغانستان په کورنیو چارو کې له لاسوهنې ډډه وکړي.
د اسلامي امارت ویاند مولوي ذبیح الله مجاهد په دې اړه په یوه ټویټ کې ویلي؛ ټولې بهرنۍ موسسې چې په افغانستان کې فعالیت لري؛ د افغانستان د قوانینو پر پلي کولو مکلفې دي.
بل لوری د چارو یوشمېر شنونکي د بهرنیو هېوادونو له لوري په افغانستان کې د چارو ځنډول ناسم بولي او زیاتوي چې بشري چارې او مرستې دې له سیاست څخه جلا وساتل شي.
په غیرې دولتي بهرنیو او کورنیو بنسټونو او ادارو کې د ښځینه وو کارکوونکو د کار ځنډولو په اړه د امیرالمومنین وروستي فرمان په تړاو ګڼو هېوادونو څرګندونې کړې، چې له ډلې یې افغانستان کې د امریکا سفارت چارسمبالې کرن دیکر په یوه ټویټ کې ویلي، چې اسلامي امارت څنګه د ښځو او ماشومانو د لوږې مخنیوی کولای شي.
د اسلامي امارت ویاند ذبیح الله مجاهد د نوموړې په غبرګون کې ویلي، چې امریکایي مسولین دې د افغانستان په کورنیو چارو کې له مداخلې ډډه وکړي.
“امریکايي چارواکي باید زموږ په کورنیو چارو کې مداخله ونه کړي. کومې مؤسسې چې په افغانستان کې فعالیت لري زموږ د هېواد د قوانینو او فرمانونو په رعایت مکلفې دي. موږ چاته اجازه نه ورکوو چې د بشري مرستو تر عنوان لاندې د اسلامي امارت د پریکړو او مشرانو په اړه بې مسؤلیته خبرې یا تهدید وکړي.”
د چارو شنونکي د یوشمېر هېوادنو له لوري د اعتراض په ډول افغانستان کې د خپلو انجیو ګانو د کارونو ځنډول د نړېوالو اصولو خلاف بولي او وايي سیاست او بشري کړه وړه دې جلا وساتل شي.
د یادولو وړ ده چې له دې وړاندې هم د افغانستان اسلامي امارت د رهبرۍ یوشمېر غړو په نړېوالو سټیجونو ویلي، چې افغانستان له ټولې نړۍ سره د متوازن تعامل غوښتونکی دی او په همدې تړاو د افغانستان د بهرنیو چارو سرپرست وزیر مولوي امیر خان متقي تېره ورځ ګاونډیو هېوادونو ته په اشارې وویل چې له افغانستان سره دې له متقابل چلنده کار واخلي.
