بهرنیو رسنیو راپور ورکړی چې د امریکا ولسمشر ډونالډ ټرمپ د غزې د سولې شورا منشور د سویس د داووس اقتصاد نړیوال مجمع کې د هېوادونو یو شمېر استازو او رهبرانو په حضور کې لاسلیک کړ.
د راپور پراساس، ټرمپ له لاسلیک وړاندې ویلي، چې د ملګرو ملتونو سازمان په همکارۍ به په غزه کې پراخ اقدامات وکړي.
د افغانستان اسلامي امارت د رياست الوزرا اداري مرستيال مولوي عبدالسلام حنفي په مشرۍ اداري کمېسيون غونډه وکړه.
په دې غونډه کې، لومړی ټاکل شويو کمېټو د خپلو ورسپارل شويو فعاليتونو او کړنو په اړه معلومات وړاندې کړل.
وروسته د ماليې او کورنيو چارو وزارتونو اړوند موضوعات په هر اړخيز ډول وارزول شول او په اړه يې لازم تصميمونه ونيول شول.
دغهراز په پای کې، په اجنډا کې د شاملو نورو موضوعاتو د لا زيات تدقيق په موخه جلا کمېټو ته دنده وسپارل شوه.
د کابل ښار د منظمې پراختیا او د مسکن د کمښت د ستونزې د هواري په موخه، د کور او ښار جوړولو وزیر مولوي نجیبالله حیات حقاني د کابل ښار د شلمې ناحیې اړوند د «چهل دختران» سیمې لپاره تفصیلي پراختیایي پلان تایید کړ.
د یاد وزارت په وینا، دغه تفصیلي پراختیایي پلان د کابل ښاروالۍ له لوري د ښاري معیارونو او تخنیکي اصولو پر بنسټ ترتیب شوی و، چې د تاییدې په موخه د کور او ښار جوړولو وزارت ته وړاندې شو.
سرچینه زیاتوي، پلان د وزارت د مسلکي او تخنیکي ټیم لهخوا له هر اړخیزې ارزونې وروسته، د اووه اصلاحاتو په راوستلو سره منظور او د تطبیق لپاره کابل ښاروالۍ ته وسپارل شو.
د یاد پلان د تطبیق په پایله کې به شاوخوا ۴۵ زره کورنیو ته د منظمې او معیاري استوګنې زمینه برابره شي، چې دا به په کابل ښار کې د مسکن د کمښت ستونزه تر ډېره بریده راکمه کړي.
دغه پراختیایي پلان د نږدې شپږ زره جریبه ځمکې لپاره ترتیب شوی، چې په عملي کېدو سره به یې د ښاري زېربناوو پراختیا، د سړکونو تنظیم، عامه خدمتونو ته اسانه لاسرسی، د شنو ساحو پراختیا او د ښاریانو د ژوند د کیفیت لوړولو په برخه کې مهم بدلونونه رامنځته شي.
د کور او ښار جوړولو وزارت وزیر مولوي نجیبالله حیات حقاني د متوازنې ښاري پراختیا او د خلکو د اساسي اړتیاوو د پوره کولو په برخه کې د ورته پراختیایي پلانونو پلي کېدل مهم وبلل او ډاډ یې ورکړ، چې د یاد پلان د تطبیق بهیر به د اړوندو ادارو په همغږۍ په جدي توګه وڅارل شي.
په مسکو کې د افغانستان لوی سفیر مولوي ګل حسن حسن د روسیې د سوداګرۍ خونې د ريیس له ځانګړي استازي الکساندر شکیراندو او د افغان ـ روسي سوداګرۍ شورا له ريیس دیمیتري انتونوف سره لیدنه کړې.
مسکو کې د افغانستان سفارت وایي، چې په دې دې لیدنه کې روسي لوري په افغانستان کې پانګونې او سوداګرۍ ته لېوالتیا څرګنده کړه او زياته يې کړه، چې اوس مهال په افغانستان کې د پانګونې لپاره وړ شرایط برابر شوي دي.
دغه راز دې لیدنه کې ښاغلي حسن د افغانستان د امنیتي او اقتصادي وضعیت په اړه معلومات شریک کړي او د افغاني محصولاتو د وارداتو او بازارموندنې د پراخولو غوښتنه یې کړې ده.
هېواد ته د اوزبیکستان ۲۲۰ کیلوولټ وارداتي برېښنا مزي یو سرکټ د پلخمري او کابل ترمنځ ساحه کې د سختو اورښتونو او طوفانونو له امله تخنیکي عارضه کړې او پرچاو دی، چې له امله یې پروان، کاپیسا، پنجشېر، کابل، ننګرهار، لغمان، میدان وردګ، غزني، لوګر، پکتیا، خوست ولایتونه او د بغلان ځینې سیمې د برېښنا له کمبود او پرلهپسې پرچاویو سره مخامخ شوي دي.
د افغانستان برېښنا شرکت وايي، تخنیکي ټیمونه یې کوښښ کوي، چې د وضعیت له نورمالېدو سره د عارضې ځای پیدا او ژر تر ژره ستونزه حل کړي.
د افغانستان اسلامي امارت د صنعت او سوداګرۍ وزارت مرستیال مولوي احمدالله زاهد او مل پلاوي د بنګلهدېش هېواد په پلازمېنه ډاکه کې د درملو له دوو سترو او پېژندل شویو تولیدي کارخونو BEXIMCO Pharmaceuticals Ltd او RENATA PLC څخه لیدنه وکړه.
د صنعت او سوداګرۍ وزارت وایي، چې په دې لیدنه کې مولوي احمدالله زاهد د بنګلهدېش د درملو صنعت کارانو ته بلنه ورکړه تر څو په افغانستان کې د درملو د تولید په برخه کې پانګونه وکړي.
دغهراز نوموړي ډاډ ورکړ، چې په افغانستان کې بشپړ امنیت ټینګ شوی، اسلامي امارت د صنعت او تولید ملاتړ کوي او د پانګونې لپاره هر ډول اړینې اسانتیاوې برابرې شوې دي.
ورته مهال د اسلامي امارت د عامې روغتیا وزارت د درملو او روغتیايي محصولاتو د تنظیم لوی رییس ډاکټر نعیمالله ایوبي، د بنګلهدېش د درملو صنعت کارانو ته دې وزارت د نافذه قوانینو له مخې د هر اړخیزې همکارۍ ډاډ ورکړ.
د دې لیدنې په ترڅ کې افغان سوداګرو د بنګلهدېش د درملو له تولیدي کارخونو سره د مستقیمو قراردادونو پر لاسلیک او افغانستان ته د بنګلهدېش څخه د درملو د واردولو پر موضوعاتو هوکړه وشوه.
د یادونې وړ ده، چې یادې کارخونې د بنګلهدېش د پرمختللو تولیدي شرکتونو له ډلې څخه دي، چې خپل درمل شاوخوا ۵۰ هېوادونو ته صادروي.
له پېښو سره د مبارزې او چمتوالي ملي ادارې رییس ملا نورالدین ترابي، په افغانستان کې د اوچا سیمهییز دفتر مسول کینیت راجرز سره په لیدنه کې اړمنو ته د رسېدنې او د پېښو را منځته کېدو څخه وړاندې د اساسي خدماتو برابرولو په اړه خبرې کړي.
په دې لیدنه کې، له پېښو سره د مبارزې او چمتوالي ملي ادارې رییس له اوچا وغوښتل تر څو ټولې موسسې خلکو ته اساسي خدمات وړاندې کړي او د پېښو له رامنځته کېدو وړاندې اقداماتو پر اهمیت یې ټینګار کړی.
ورته مهال د اوچا د دفتر سیمهییز مسول اړمنو کورنیو ته د رسېدنې ډاډ ورکړی.
د رياست الوزرا مقام د دفتر عمومي رییس ډاکټر ملا عبدالواسع د هېواد له یو شمېر ملي سوداګرو سره په ارګ کې لیدنه کړې.
په پیل کې د رياست الوزرا مقام د دفتر عمومي ریاست د سیاسي او ولسي چارو رییس شیخ محمود ذاکري د هېواد ملي سوداګرو ته د ښه راغلاست ترڅنګ ویلي، د عالیقدر امیرالمؤمنین حفظه الله تعالی په وینا تاسو د افغانستان اقتصادي مجاهدین یاست، چې د هېواد د ثبات او اقتصادي پایښت لپاره هڅې کوئ او قرباني ورکوئ.
دغهراز په دې لیدنه کې ملي سوداګرو په هېواد کې د سراسري امنیت په تامین خوښي څرګنده کړې او د لا زیات ملاتړ په موخه یې خپلې غوښتنې شریکې کړې دي.
د رياست الوزرا مقام د دفتر عمومي رییس محترم ډاکټر ملا عبدالواسع هغوی ته د ښه راغلاست پرمهال د قران عظیم الشان د ایتونو په رڼا کې د تعاون او همکاري په اړه خبرې کړي او ویلي یې دي، هیله ده دا ناسته د الله تعالی د رضا او د هېوادوالو د هوساینې او سوکالي لامل شي.
ډاکټر ملا عبدالواسع ویلي، چې د اسلامي امارت مسولین او اړوند ادارې د سوداګرو ستونزې درک کوي او د حل لپاره یې تر بل هر وخت ډېرې هڅې کوي.
نوموړي زیاته کړې، چې ستاسو غوښتنې او وړاندیزونه به، د اړوندو مسوولینو سره د شفاهي او لیکلې مطرح کېدو تر څنګ، د لا زیات بحث او د مناسبو حل لارو د موندلو په موخه د اقتصادي کمېسیون اونیزې غونډې ته هم وړاندې شي.
په اندونیزیا کې د اسلامي امارت سرپرست سفیر مولوي سعدالله بلوچ، په یاد هېواد کې د سوډان له سفیر محمد علي محمد سره کتلي.
په اندونیزیا کې د افغانستان سفارت وايي، په دې لیدنه کې د اسلامي همکاریو سازمان په چوکاټ کې د همکاریو، دوه اړخیزو همکاریو او له افغانستان سره د سوډان د علمي تجربو شریکولو په اړه خبرې شوي.
افغانستان لپاره د برېټانیا ځانګړي استازي ریچارد لندزي، په اسلام اباد کې د اسلامي امارت له سفیر مولوي سرداراحمد شکېب سره لیدنه کړې.
په اسلام اباد کې د افغانستان سفارت وايي، چې په دې لیدنه کې دواړو لوریو د افغانستان او برېټانیا ترمنځ د دوه اړخیزو همکاریو، د سیمې وضعیت او افغان کډوالو په اړه خبرې کړي او د یوې متقابلې هوکړې پر بنسټ د همکاریو پر پیاوړتیا یې ټینګار کړی.
