د افغانستان د وسلهوال پوځ لوی درستیز قاري محمد فصیحالدین فطرت، د قطر دولت د وسلهوال پوځ له لوی درستیز جاسم بن محمد المناعي سره لیدنه کړې.
د ملي دفاع وزارت وايي، چې دې ناسته کې د دواړو هېوادونو ترمنځ د دوه اړخیزو اړیکو پر پراختیا، د متقابلو همکاریو پر دوام او یو شمېر نورو اړوندو موضوعاتو خبرې شوې دي.
د ریاست الوزرا اداري مرستیال مولوي عبدالسلام حنفي د تخار ولایت چاه آب ولسوالۍ له یو شمېر علماوو او مخورو سره لیدنه کړې.
د دې لیدنې په پیل کې یادو علماوو او مخورو د دې ولسوالۍ د امنیتي او اجتماعي وضعیت په اړه معلومات ورکړي او ویلي یې دي، د اسلامي امارت د مجاهدینو او مسولینو په هڅو امنیت تامین دی، چې له امله یې د دې ولایت په ځانګړي ډول د چاه آب ولسوالۍ اوسېدونکي په ډاډه زړه خپلو ورځنیو چارو ته دوام ورکوي.
د چاه اب ولسوالۍ علماوو او مشرانو دغه راز د یادې ولسوالۍ د خلکو ځینې ستونزې او وړاندیزونه د ریاست الوزرا اداري مرستیال سره شریکې کړې او یادې برخې ته یې د اسلامي امارت د مسولینو ځانګړې پاملرنې غوښته کړې ده.
دغهراز مولوي عبدالسلام حنفي یادو علماوو او مشرانو ته د ښه راغلاست ترڅنګ ویلي، د امنیت ټینګښت او هېوادوالو ته خدمات وړاندې کول د اسلامي امارت له مسولیتونو څخه دي او په دې برخه کې مسولین شپه او ورځ هڅې کوي.
ورته مهال، نوموړي د دوی غوښتنو او وړاندیزونو ته په اشارې زیاته کړې، چې اسلامي امارت به یې ستونزو ته رسېدنه وکړي او په دې اړه به لازم اقدامات ترسره کړي.
د «مهارت او مسلک» تر سرلیک لاندې یو ورځنی کنفرانس چې د تخنیکي او مسلکي زده کړو ادارې د پلان او ستراتېژیکې همغږۍ ریاست له خوا جوړ شوی و په بریالیتوب سره پای ته ورسېد.
په دې کنفرانس کې د تخنیکي او مسلکي زده کړو ادارې رییس مولوي غلام حیدر شهامت د لوړو زدهکړو وزیر شیخ ندا محمد ندیم، د اسلامي امارت یو شمېر مسولینو او همدارنګه د بېلابېلو بنسټونو، نړیوالو سازمانونو او همکارو موسسو استازو ګډون درلود.
په دې کنفرانس کې مولوي غلام حیدر شهامت وویل، چې تخنیکي او مسلکي زدهکړې د کارموندنې، تشبث او اقتصادي ځان بسیاینې لپاره بنسټیزې زدهکړې دي.
نوموړي زیاته کړه، یاده اداره د بازارمحوره سیستم په رامنځته کولو، د زده کړو د کیفیت لوړولو، له کورنیو او نړیوالو معیارونو سره د برابرۍ پر بنسټ ولاړه ده.
ښاغلي شهامت همدارنګه وویل، چې په دې وروستیو کلونو کې هڅې شوې دي، څو د تخنیکي او مسلکي زده کړو پروګرامونه د کار بازار له واقعي اړتیاوو سره لا ډېر همغږي شي.
نوموړي ټینګار وکړ، چې مهارت باید د ټولنې د هر وګړي لپاره د لاسرسي وړ وي، څو هر څوک وکولای شي مهارت زدهکړي او د خپل ژوند چارې په ښه ډول مدیریت کړي.
ښاغلي شهامت د خپلې وینا په یوه برخه کې دا هم وویل، چې د تخنیکي او مسلکي زدهکړو پیاوړتیا یو ګډ مسولیت دی؛ داسې مسولیت چې اسلامي امارت، نړیوال بنسټونه، نادولتي سازمانونه او خصوصي سکتور مهم رول پکې لري.
نوموړي د تخنیکي او مسلکي زده کړو د ارزښت په یادولو سره له نړیوالو شریکانو، د سفاتونو له استازو او د ملګرو ملتونو له سازمان څخه وغوښتل، چې په افغانستان کې د تخنیکي او مسلکي زدهکړو د پیاوړتیا لپاره خپلې مرستې دوامدارې او پراخې کړي.
د تخنیکي او مسلکي زده کړو ادارې رییس د خپلې وینا په پای کې وویل؛ که نن پر مهارت او مسلک پانګوونه وکړو، نو نه یوازې دا چې د ځوانانو لپاره بهه د کار زمینه برابره کړو، بلکې ټولنې ته عزت او هېواد ته روښانه راتلونکی به هم تضمین شي.
ورته مهال، د لوړو زده کړو وزیر شیخ نداء محمد ندیم ویلي، د لوړو زده کړو وزارت په ټولو برخو کې له تخنیکي او مسلکي زده کړو له ادارې سره همکار دی.
همدارنګه د یاد کنفرانس په پای کې د تخنیکي او مسلکي زده کړو ادارې له لوري له بېلابېلو بنسټونو او ادارو سره ۸ هوکړهلیکونه لاسلیک شول.
د امربالمعروف، نهې عنالمنکر او شکایتونو اورېدلو وزیر شیخ محمد خالد حنفي د عبدالجلیل رضایي او رکنالدین عرفاني په مشرۍ د اسماعیلیه شیعهګانو له پلاوي سره ناسته وکړه.
د امربالمعروف، نهې عنالمنکر او شکایتونو اورېدلو وزارت وایي، دغه ناسته د همغږۍ رامنځته کولو، د اسماعیلیه شیعهګانو د ستونزو اورېدلو او په دعوتي چارو کې د ګډو همکاریو په تړاو جوړه شوې وه.
په دې ناسته کې شیخ محمد خالد حنفي د ټولو اقشارو ترمنځ د یووالي، همغږۍ او ګډې همکارۍ پر ارزښت ټینګار وکړ او زیاته یې کړه، په اسلامي نظام کې د ټولو افغانانو حقونه خوندي دي او ستونزو ته یې رسېدنه د دولت شرعي مسولیت دی.
د امربالمعروف وزیر د ټولنې په اصلاح کې د علماوو او قومي مشرانو رول مهم وباله او زیاته یې کړه، هېواد کې د شته ناخوالو او ناوړه دودونو له منځه وړل ګډ کار او همغږۍ ته اړتیا لري.
ورته مهال، د اسماعیلیه شیعهګانو یاد پلاوي د امنیت او ټولنیز ثابت په ټینګښت کې د اسلامی امارت هڅې وستایلې او له اسلامي نظام څخه یې خپل ملاتړ اعلان کړ او ډاډ یې ورکړ، چې د اسلامي ارزښتونو د پلي کېدو او ټولنې د اصلاح په برخه کې به له دې وزارت سره بشپړه همکاري کوي.
د کور او ښار جوړولو وزیر مولوي نجیب الله حیات حقاني، د نوي کابل ښار اړوند پراختیا ورکوونکو شرکتونو له ځینو مسولینو سره لیدنه وکړه.
په دې لیدنه کې مولوي نجیب الله حیات حقاني د نوي کابل ښار اړوند د یوه پراختیا ورکوونکي شرکت تفصیلي پلان منظور کړ.
د کور او ښار جوړولو وزارت وایي، چې دغه پلان، له هر اړخیزو تخنیکي او مسلکي ارزونو وروسته منظور شو او په عملي ډول ورته د کار پیلولو رسمي اجازه هم ورکړل شوه.
مولوي نجیب الله حیات حقاني، په دې اړه وویل، چې د یاد پلان تطبیق به د نوي کابل ښار د ابادۍ او پراختیا بهیر ته د پام وړ چټکتیا ورکړي.
نوموړي زیاته کړه، چې دا پروژه به نه یوازې د ښاري زیربناوو د پیاوړتیا لامل وګرځي، بلکې د سلګونو کسانو لپاره به د کار زمینه هم برابره کړي، چې دا چاره به د بېکارۍ د کچې په راټیټولو کې مهم رول ولري.
د ښاغلي حقاني په وینا، د دا ډول پراختیایي پروژو پلي کېدل به د معیاري استوګنځایونو د جوړېدو لامل شي او په هېواد، په ځانګړي ډول کابل کې به د مسکن او سرپناه شته ستونزه تر ډېره بریده راکمه کړي.
همدارنګه، د وزارت مسوولینو ټینګار وکړ، چې ټولې چارې به د ښاري پلان، ساختماني معیارونو او چاپېریالي اصولو ته په بشپړ پام سره مخته یوړل شي، تر څو یو منظم، خوندي او د اوسېدو وړ ښاري چاپېریال رامنځته شي.
د یادونې وړ ده، چې دا پروژه د نوي کابل ښار د دوامدارې پراختیا په لور یو مهم او اغېزمن ګام ګڼل کېږي.
د اطلاعاتو او کلتور وزیر شیخ شیراحمد حقاني د یو پلاوي په ملتیا د عامه کتابتونونو له ریاست څخه د کارونو د ارزونې په موخه لیدنه وکړه.
د اطلاعاتو او کلتور وزارت وایي، چې د لیدنې پر مهال د عامه کتابتونونو ریاست مسولینو ښاغلي وزير ته په عامه کتابتونونو کې د روانو رغنیزو چارو او د عامه کتابتونونو په اړه هر اړخیز معلومات وړاندې کړل او شته ستونزې يې شريکې کړې.
ورته مهال د اطلاعاتو او کلتور وزیر شیخ شیر احمد حقاني په عامه کتابتونونو کې د روانو رغنيزو چارو د لیدنې تر څنګ د مطالعې تالارونه او د کتابونو د سکن کولو له پروسې هم څارنه وکړه.
نوموړي د عامه کتابتون ریاست مهم ریاست وباله او د لیکوالانو د هڅونې او مطالعې کلتور د پیاوړتیا په برخو کې يې د دغه ریاست د ترسره کړیو پروګرامونو څخه یې خوښی څرګنده کړه.
په پای کې همدا راز د ښاغلي وزیر له لوري د عامه کتابتونونو مسولینو ته اړینې سپارښتنې وشوې او د یاد کتابتون اړوند ستونزو او وړاندیزونو ته د رسېدو ډاډ يې ورکړ.
د کرنې، اوبولګولو او مالدارۍ وزارت وایي، چې د خوست ولایت د کرنې، اوبو لګولو او مالدارۍ ریاست اړوند د کرنیزو چارو امریت د تحقیقاتو عمومي مدیریت له لوري، د جوارسل په تحقیقاتي فارم کې د ادرک (Ginger) د محلي ورایټۍ ازمایښتي کښت چارې په بریالیتوب سره ترسره شوې دي.
د یاد ریاست د مسوولینو په وینا، د دې ازمایښتي کښت اساسي موخه دا ده، چې د سیمې له اقلیمي شرایطو سره سم مناسبې، حاصلورې او د کرنې له پلوه اغېزمنې ورایټۍ وازمویل شي، څو د حاصلاتو کچه لوړه او د تولید کیفیت ښه شي.
د معلوماتو له مخې، دغه ازمایښتي کښت به د ادرک نبات د ودې، حاصلورکولو، له اقلیم سره د تطابق او اقتصادي ارزښت له پلوه په دوامداره توګه تر څارنې لاندې وي او د دغو څېړنو پایلې به د راتلونکو کرنیزو پرېکړو لپاره به یو باوري بنسټ برابر کړي.
مسوولین زیاتوي، چې د یادو څېړنو له پایلو سره سم به په راتلونکي کې بزګرانو ته د کرنې په برخه کې متنوع، باکیفیته او اقتصادي بدیلونه ور وپېژندل شي، چې دا به د کرنې د پراختیا، د بزګرانو د عوایدو د لوړولو او د بدیلو کښتونو د ترویج لامل وګرځي.
د افغانستان برېښنا شرکت عمومي اجراییوي رییس ملا عبدالحق همکار د تاجېکستان پانګوال شرکت له مسول سره د برېښنا اړوند برخو کې په پانګونې خبرې کړې دي.
د افغانستان برېښنا شرکت وايي، چې یاد پانګوال د نوې کېدونکې برېښنا او برېښنا وېش تاسیساتو جوړونې برخو کې پانګونې ته لیوالتیا ښودلې ده.
دغهراز ملا عبدالحق همکار د پانګونو او پانګوالو د بشپړ ملاتړ ډاډ ورکړی او د یاد پانګوال د لیوالتیا ستاینه یې کړې ده.
د یادونې وړ ده، چې هېواد کې د برېښنا تولید او تاسیساتو جوړونې برخو کې تېرو شاوخوا څلورو کلونو کې د ملي او نړیوالو پانګوالو پانګونې زیاتې شوي او مخ پر زیاتیدو دي.
