افغانستان سره د نړیوالې ټولنې د بشر پاله مرستو پر دوام د ۴۰ میلیون ډالرو بله کڅوړه هم کابل ته راورسېده.
روانه اونۍ کې دا دویمه کڅوړه ده،چې هېواد ته راځي.
د افغانستان بانک پر اصولي لارو هېواد ته د اسعارو د راتګ هرکلی کړی او دبانکي سکتور له لارې یې د دې مرستو د لګولو غوښتنه کړې ده.

د ملي دفاع سرپرست وزير مولوي محمد یعقوب مجاهد د متحده عربي اماراتو د دولت له رییس شیخ محمد بن زاید آل نهیان سره لیدلي.

ملي دفاع وزارت وايي، چې په دې لیدنه کې د افغانستان او متحده عربي اماراتو ترمنځ د دوه اړخیزو همکاریو په پراختیا او یو شمېر نورو مهمو موضوعاتو خبرې شوې دي.

تر دې وړاندې د ملي دفاع سرپرست وزیر مولوي محمد یعقوب مجاهد متحده عربي امارتو کې له مېشت افغانانو سره هم لیدنه کړې وه. د دوی ستونزې یې اورېدلې او د حل ډاډ یې ورکړی وو.

ښاغلي مجاهد له دوی سره په لیدنه کې ټینګار کړی، چې افغانستان د ټولو افغانانو ګډ کور دی او د هېواد په رغونه او پرمختګ کې باید ټول ونډه واخلي.

د اوبو او انرژي سرپرست وزیر ملا عبداللطیف منصور پخپل کاري دفتر کې د ترکیې د صنعت کارانو او خپلواکو سوداګرو د ټولنې له یو شمېر غړو سره په لیدنه کې له بېلا بېلو سرچینو څخه د انرژۍ د تولید په پروژو باندې د پانګونې په هکله بحث او خبرې کړې دي.

د اوبو او انرژي وزارت پر خپله ټویټر پاڼه لیکلي، چې د ترکیې د صنعت کارانو او خپلواکو سوداګرو ټولنې غړو په دې لیدنه کې د ډبرو سکرو، باد او لمریزو سرچینو څخه د انرژي د تولید په برخه کې پانګونې ته لېوالتیا ښودلې.

ښاغلي منصور د یادې ټولنې د لېوالتیا هرکلی کړی او ډاډ یې ورکړی، چې د افغانستان اسلامي امارت له لوري د پانګونې په پروسه کې اړینې اسانتیاوې رامنځته شوې او په افغانستان کې له هره اړخه پانګونې ته زمینه برابره شوې ده.

د حکومت د رسنیو په مرکز کې د افغانستان د اوسپنې پټلۍ ادارې او منصور فاتح شرکت تر منځ د حیرتان-مزارشریف اوسپنې پټلۍ د تخنیکي ملاتړ تړون لاسلیک شو.

په دې تړاو جوړو شویو مراسمو کې د چارو ادارې لوی رییس شیخ نورالحق انور ویلي، چې د ریاست الوزرا له ۶۴ او ۶۴۷ شمېرو احکامو د تعمیل له مخې د یادې پروسې لپاره د ادارو ګډ هیئت وټاکل شو، چې دا پروسه بریالی او نن یې قرارداد لاسلیک کېږي.

د اوسپنې پټلۍ ادارې رییس ملا بخت الرحمن شرافت ویلي، چې پخوانی قرارداد د هېواد په زیان وو، ځکه چې قراردادي شرکت ته په کلني ډول د ۱۵ میلیونه ډالرو شاوخوا پیسې ورکول کېدې او د اوسني قرارداد له مخې به نوي قراردادي ته د کال ۴ میلیونه شاوخوا امریکایي ډالر ورکول کیږي او په ۲ کالو کې به خپل ټول ظرفیت افغاني انجنیرانو ته لېږدوي.

د منصور فاتح شرکت معاون بیسن بای مخانوف ویلي؛ د افغانستان د اوسپنې پټلۍ اداره نوي تاسیس شوې او هڅه کوو چې افغاني انجنیرانو ته په لوړ ظرفیت روزنه ورکړو، تر څو له دوو کلنو وروسته د اوسپنې پټلۍ ټولې چارې خپله ترسره کړي.

په پای کې یاد تړون چې میاشتنی لګښت یې ۳۴۸۹۸۶ امریکایي ډالر دي او موده یې ۲ کاله ده، د افغانستان د اوسپنې پټلۍ ادارې د سرپرست او د منصور فاتح شرکت د معاون له لوري لاسلیک او د چارو ادارې له لوري د تسهیل کوونکي په توګه هم لاسلیک شو.

له دې تړون سره د حیرتان-مزارشریف اوسپنې پټلۍ چارو مدیریت پروسه ټوله افغاني شوه او قراردادي شرکت یوازې په تخنیکي برخه کې چې د لوکوموتیونو او یو شمېر تخنیکي متخصصینو برابرول دي، خدمتونه وړاندې کوي.

دا تړون د افغانستان لپاره ډیرې ګټې لري، چې له ډلې یې د تړون د لګښت خورا ډیر کموالی، د خدمتونو د وړاندې کولو زیاتوالی، افغاني کادرونو ته د ظرفیت لېږد او هغوی ته د عملي کار فرصت برابرول او په ټوله کې د پروسې د مدیریت افغاني کېدل یادولای شو.

د یادولو وړ ده چې له دې وړاندې د حیرتان-مزارشریف د انتقالاتو، ساتنې او مراقبت قرارداد له ۱۱ کلنو راهیسې له یوې ازبکستاني کمپنۍ سره وو، چې د افغانستان د اوسپنې پټلۍ ادارې په دوامدارو هڅو او سخت کار او د اسلامي امارت د رهبري په ځانګړي ملاتړ د یادې پروژې چارې افغاني شوې او نوی قراردادي شرکت یوازې لوکوموتیونه او یو شمېر تخنیکي متخصصین د ادارې په اختیار کې ورکوي.

د میدان وردګو ولایت په نرخ ولسوالۍ کې د ۳.۸ میلیونه افغانیو په ارزښت ۱۳۰ کورنیو ته د څښاک اوبه برابرېږي.

د میدان وردګو ولایت د کلیو بیارغونې او پراختیا ریاست په غوښتنه او تخنیکي همکاري د یونیسف ادارې په مالي ملاتړ د نرخ ولسوالۍ په سرکي بادام سیمه کې د څښاک پاکو اوبو رسولو شبکه جوړېږي.

دغه شبکه د لمريزې بریښنا سیسټم په لرلو سره د څلورو میاشتو په موده کې رغول کیږي، چې د سیمې ډېری خلکو ته به کاري زمینه برابره کړي.

د مسولینو په وینا؛ د یادې شبکې په بشپړېدو سره به ۱۳۰ کورنۍ د څښاک له پاکو اوبو برخمنې شي.

ناصرشاه سرحدی

د تېرو څلور څلویښت کلنو کورنيو جګړو په دوران کې نه یوازي د جګړو او نا امنیو له امله افغانستان د جنګ ډګر ګرځیدلي و، بلکې  دهېواد ښونځي، پوهنتونونه، لارې، پلونه، پلچکونه او په ټوله کې د هېواد ټولې اقتصادي زیربناوي هم تخریب او له منځه تللې دي او له دي درکه دهیواد ملي اقتصاد ته لوي زیان رسیدلي.

له بده مرغه د تېري فاسدې ادارې په دوران کې چې په اداري فساد، اختلاس، رشوت، بډو، اوبیروکراسي کي ډوبه وه نه یوازي دا چې امنیت او ثبات په هېواد کې تامین نه و، بلکې دهېواد اقتصادي زیربناوو ته هم پاملرنه نه کېده او د جنګ او نا امنیو له کبله ورانې او ویجاړې پرتې وې.

له نېکه مرغه داسلامي امارت په راتګ سره نه یوازې دا چې د هېواد په ټوله خاوره اوقلمرو کې سراسري سوله اوثبات تامین شو، بلکې دهېواد ټولې زیربناوې ورځ تربلې جوړې او دجوړېدو په حال کې دي. ښه مثال ېې د شمالي ولایتونو د قوش تیپي کانال جوړېدل دي، چې له نیکه مرغه ډېرې چارې به ېې بشپړ شوې او په دې نږدې وختونو کې به ګټې اخیستنې ته وسپارل شي.

دا داسې لویه لاسته راوړنه ده چي د ملي اقتصاد په پیاوړتیا کې به رغنده اوټاکونکی رول ولوبوي او دهېواد ډېرو ځوانانو اوبې روزګارو خلکو ته به هم د کار کولو زمینه برابره کړي.

د افغانستان د اسلامي امارت ویاند ذبیح الله مجاهد په دې وروستیو کې د دې ستر اقتصادي کانال له چارو لیدنه کړې او ویلي یې دي، چې په تېرو اتو میاشتو کې ېې دلومړي فاز ۱۰۸ کیلو متره زیاتره چارې بشپړې شوې دي.

په دې ستر تاریخي اقدام به نه یوازې ملي اقتصاد لا وغوړېږي، بلکې په هېواد کې به د بې کارۍ په له منځه وړلو کې هم مهم اوټاکونکی رول ولوبوي.

د ایران قضایه قوې اعلان کړی؛ څلور هغه وګړي یې اعدام کړي، چې د روان میلادي کال په جون میاشت کې له اسراییلو سره د همکاري په تور نیول شوي وو.

د ایران د قضایه قوې د خبر په اساس “یاده ډله د اسراییلي استخباراتو په لارښوونه د عامه شتمنیو په غلا او ویجاړولو، د دروغو اعترافونو ترلاسه کولو او انسان تښتونه کې ښکېل وه، چې د استخباراتو له لوري ونیول شول.”

د ایران حکومت د تورنو کسانو اعترافونه له اعدام وړاندې په تلویزیون خپاره کړي وو.

د یاد خبر له مخې درې نور تورن کسان هم د بېلا بېلو جرمونو له امله له پینځو تر لسو کلونو په بند محکوم شوي دي.

له دې سره هممهاله د بشري حقونو سازمانونو ایران کې د اعدامونو د شمېر زیاتوالي خبرداری ورکړی دی.

سوریه کې د بد او خرابېدونکي اقتصادي وضعیت له امله قهرجنو لاریون کوونکو د دې هېواد په جنوب کې د سویدا ښار د والي په دفتر هجوم ور وړی او اور یې ورکړی دی.

د سوریې چارواکو او عیني شاهدانو ویلي، چې لاریون کوونکو دفتر لوټ او له پولیسو سره یې هم اخ او ډب کړی دی.

له بل لوري په یادو لاریونونو کې د دوو کسانو د وژل کېدو خبر ورکړل شوی دی.

د بلخ چاپېریال ساتنې ریاست وايي، چې د سویډن کمېټې په مالي مرسته یې د دې ولایت د حیرتان په بندري ښارګوټي کې د ۲۰ کیلو متره شنه کمر بند جوړولو چارې پیل کړې.
د یاد ریاست په وینا؛د شنې ساحې پراخوالي او طوفانونو مخنیوي په موخه به په یاده سیمه کې غیر مېوه لرونکي نیالګي کښېنول شي.

د نړیوال ډیجیټل اقتصادي فورم بنسټ اېښودونکي او مشر کریم شن چین کې د افغانستان د لوی سفارت له سرپرست سید محی الدین سادات سره لیدنه کړې او افغانستان کې یې د ډیجیټل اقتصاد په برخه کې همکارۍ ته لېوالتیا او د ادارو د کارکوونکو روزنې ته چمتوالی ښودلی.

د افغان سفیر له لوري د ډیجیټل اقتصاد تر څنګ افغانستان کې د بېلا بېلو اقتصادي فرصتونه یادونه شوې او د هر ډول همکارۍ ډاډ ورکړل شوی دی.