د عامې روغتیا سرپرست وزیر ډاکټر قلندر عباد خوست ولایت ته د سفر په ترڅ کې د دې ولایت له روغتیايي مرکزونو څخه لیدنه کړې.

نوموړي د دې سفر په لړ کې د وینا پر مهال ویلي، چې د هېواد روغتیايي سیستم اصلاحاتو او بدلونونو ته اړتیا لري او دی روغتیايي سیستم کې اصلاحاتو ته ژمن دی.

 ښاغلي عباد زیاته کړې، چې  یو ضعیف روغتیايي سیستم له پخواني رژیم څخه په میراث پاتې دی او د دوۍ هڅه دا ده ترڅو د خپلو همکارانو په مرسته روغتیايي سیستم ته وده ورکړي او روغتیايي خدمات پراخه کړي.

ښاغلي عباد ویلي؛ خوست کې د عامې روغتيا وزارت سره ګڼ شمېر روغتيايي پروګرامونه پلان شوي او په نږدې راتلونکي کې به دغه پروګرامونه پلي شي او د خلکو روغتيايي ستونزې به هوارې شي.

د نيمروز د کرنې او مالدارۍ ریيس مولوي عبدالخالق “حکيم الله” وايي، چې د یاد ولایت مرکز او د کنګ، چهاربرجکي او خاشرود  په ولسوالیو کې پينځه زره و بزګرانو ته د FGA موسسې له خوا د غنمو اصلاح شوي تخمونه او کيمياوي سرې د وېش لړۍ پیل شوه.

نوموړی وايي، د اصلاح شویو تخمونو په ویشلو سره به په دې ولایت کې د غنمو حاصلات ښه شي.

یاد ریاست زیاتوي، چې په نږدې راتلونکې کې به د دې ولایت نورو ولسوالیو کې هم د اصلاح شویو تخمونو د وېش لړۍ پيل شي.

د ریاست الوزرا سیاسي مرستیال محترم مولوي عبدالکبیر د شهیدانو او معلولینو چارو وزارت له مسلکي مرستیال مولوي عبدالرزاق اخند سره په دفتر سپېدار ماڼۍ کې ولیدل.

په دې لیدنه کې د شهیدانو او معلولینو چارو وزارت مرستیال مولوي عبدالرزاق اخند د ریاست الوزرا سیاسي مرستیال ته د یاد وزارت له لورې د معلولینو د بایومیټریک او تشخیص په هکله د معلوماتو ترڅنګ له بې سرپرسته کورنیو او معلولیت لرونکو وګړو سره د دغه وزارت د مرستو په اړه خپلې لاسته راوړنې او فعالیتونه شریک کړل.

د ریاست الوزرا سیاسي مرستیال مولوي عبدالکبیر د شهیدانو او معلولینو چارو وزارت د رهبرۍ له هڅو مننه وکړه وې ویل، چې افغانستان یو له هغو هېوادونو دی چې د معلولیت لرونکو وګړو، کونډو او یتیمانو کچه په کې لوړه ده او اسلامي امارت مسولیت لري، چې په ټولو شفقت وکړي او ستونزې یې ورحل کړي.نوموړي د یاد وزارت مسولینو ته د لازمو لارښوونو ترڅنګ، ټولو اړونده ادارو ته هم لارښوونه وکړه چې د شهیدانو او معلولینو چارو وزارت سره په همغږۍ او ملاتړ دې په راتلونکي ژمي کې د شهیدانو له کورنیو او معلولیت لرونکیو وګړو سره مرستې وکړي.

د سرخرود ولسوالۍ اړوند د سیاسنګ روغتیايي مرکز لپاره نوې ودانۍ، چې د ملګرو ملتونو د کډوالو ادار(UNHCR)په مالي همکارۍ د ۲ کالو په موده کې جوړه شوې، نن د ننګرهار د عامې روغتیا ريیس ډاکټر امیر محمد افتاب، د سرخرود ولسوالۍ د روغتیا مسول قاري جعفر روحاني، د شکایاتو د اوریدنې مسول قاري غلام حبیب جواد، ختیځ کې د UNHCR مسولینو، د سیمې اوسېدونکو او مشرانو په ګډون د یو لړ ځانګړو مراسمو او پټۍ پريکولو په ترڅ کې رسماً افتتاح او ګټې اخیستنې ته وسپارل شوه.

د ننګرهار عامې روغتیا رییس افتاب د UNHCR ادارې څخه مننه وکړه، چې د روغتیايي مرکز لپاره یې یوه مجهزه او معیاري ودانۍ جوړه کړه او له دې اداې څخه یې وغوښتل چې د روغتیا په برخه کې هم له خلکو سره مرسته وکړي.

دغه راز د سیمې اوسېدونکو د عامې روغتیا رییس او د UNHCR ادارې مشر د دستار ور پسر کولو سره وستایل او د هغوی د خدمتونو قدرداني یې وکړه.

د ریاست‌الوزرا مطبوعاتي دفتر وايي، چې مولوي عبدالسلام حنفي د هرات ولایت له یو شمېر علماوو او مشرانو سره لیدنه او خبرې کړې دي.

په دې لیدنه کې د هرات علماوو د یاد ولایت د ټولنیز او امنیتي وضعیت راپور وړاندې کړی او ویلي یې دي، چې د افغانستان اسلامي امارت له راتګ سره سم په دې ولایت کې ټولنیز او امنیتي وضعیت ښه شوی او خلک له اوسني وضعیت څخه بشپړ راضي دي.

دوی د اسلامي امارت له رهبري او مسولینو غوښتي، چې د شهیدانو او معلولینو کورنیو، د هېواد په سطحه د مجاهدینو استخدام او د بیت‌المال له ضایع کېدو څخه مخنیوي ته ځانګړې پاملرنه وکړي.

د رییس‌الوزرا اداري مرستیال هېواد کې د اسلامي نظام د حاکمیت په لاره کې د هرات د خلکو هڅې او قربانۍ ستایلې او ویلي یې دي، چې د خلکو روحي او ټولنیزه ارامي د اسلامي امارت د مشرانو مسولیت دی.

نوموړي زیاته کړې؛ د خوښۍ ځای دی چې خلک د اسلامي نظام تر سیوري لاندې له بشپړ امنیت برخمن دي.

مولوي عبدالسلام حنفي ډاډ ورکړی، چې د اسلامي امارت مسولین د خلکو د ستونزو حل او د بیت‌المال د ضایع کېدو مخنیوي په موخه جدي هڅې کوي.

د شهید سردار محمد داود خان په روغتون کې د ډاکټر همایون سعیدي د “طبي او حیاتي احصایوي څېړنو اساسات” چاپ شوی کتاب کتنې تهوړاندې شو.

دا کتاب چې ۲۷ فصلونه لري، د څېړنیزو میتودونو او طبي احصایو په اړه له ډېرو بېلګو او انځورونو سره تشریح شوی دی.

د نوموړي کتاب په کتنه کې چې مسولینو، کارپوهانو او ډاکټرانو ګډون کړی و، د طبي علومو اکاډمۍ قوماندان برید جنرال دوکتور محمد اسماعیل وردګ د دغه کتاب چاپ د افغانستان د طبي علومو اکاډمي لپاره یوه ستره لاسته راوړنه بللې ده.

دا کتاب به د ځوانو ډاکټرانو، روزونکو، دوکتورا زده کونکو، متخصصینو، پروفیسرانو، ساینسي او څیړنیزو کارمندانو، او منځنیو طبي پرسونل لپاره اغیزمن وي.

د ریاست‌الوزرا اقتصادي مرستیال ملا عبدالغني برادر اخوند په مشرۍ ټاکل  شوې کمېټې ته دنده سپارل شوې وه چې د را روان ژمي پر مهال په کابل ښار کې د سون توکو بیو د کنټرول په موخه لازم اقدامات وکړي.

د دې کمیټې د پرېکړې له مخې د کابل ښار په څلورو سیمو کې به ۴۰۰زره  ټنه د ډبرو سکاره ځای پر ځای شي. چې یو ټن به هېوادوالو ته په ۹ زره افغانۍ ورکول کیږي.

همدا راز د مایع ګازو د بیو د کنټرول او احتیاطي زېرمې درلودلو په موخه د خصوصي سکتور او د ګازو او تیلو دولتي شرکت سره په همغږۍ د ټاکل شوې کمیټې له لوري ځانګړي احتیاطي تدابیر هم نیول شوي دي.

د روغتیا نړیوال سازمان د ګوزڼ نړیوالې ورځې په مناسبت اعلان کړی، چې افغانستان د پخوا په پرتله د دې ناروغۍ محوه کېدو ته نږدې شوی.

افغانستان او پاکستان یوازیني هېوادونه دي چې تر اوسه د ګوزڼ ناروغیو په له منځه وړلو نه دي بریالي شوي.

په روان میلادي کال کې د ګوزڼ دوې مثبتې پېښې په افغانستان کې ثبت شوې دي.

د روغتیا نړیوال سازمان د شمېرنې په اساس په ۲۰۲۰ میلادي کال کې افغانستان کې د پولیو ۵۶ پېښې ثبت شوې وې، خو په ۲۰۲۱ کې دا پېښې څلورو ته راټیټې شوې.

د روغتیا نړیوال سازمان ټینګار کړی، چې افغانستان د ګوزڼ محوه کولو ته ښه فرصت لري.

رویټرز خبري اژانس د سومالیې ولسمشر په حواله خبر ورکړی چې د هېواد پلازمېنه موګادیشو کې  په دوو موټرونو کې د ځای پر ځای شویو بمونو د چاودنې له امله لږ تر لږه ۱۰۰ کسان وژل شوي او شاوخوا ۳۰۰ نور ټپیان دي.

د رویټرز د راپور پر بنسټ، لومړۍ چاودنه د سومالیا پوهنې وزارت ته نیږدې  شوې او دویمه چاودنه هغه مهال رامنځته شوې، چې خلک د پېښې له قربانیانو سره د مرستې په موخه راټول شوي وو.

د راپورونو پر بنسټ د جنوبي کوریا په پلازمینه ” سیول ” کې د هالووین جشن کې د ډیرې ګڼې ګوڼې له امله پر مهال ۱۴۹ کسان وژل شوي او شاوخوا ۱۵۰ نور ټپیان دي.

د جنوبي کوریا ولسمشر یون سوک یول مسولینو ته امر کړی، چې سیمې ته د لومړنیو مرستو ټیمونه واستوي او ژر تر ژره د قربانیانو لپاره د په روغتونونو کې بسترونه برابر کړي.