د مخابراتو او معلوماتي ټکنالوجۍ وزارت اړوند د افغانستان د مخابراتي خدمتونو د تنظیم ادارې (اترا) له لوري د ۱۴۹ مخابراتي سایټونو تړون لاسلیک شو.

 د ټي ډي اف لسمې پروژې د درېیم لاټ قرارداد د مخابراتو او معلوماتي ټکنالوجۍ وزارت، افغان ټیلیکام او اتصالات مخابراتي شرکتونو ترمنځ د مخابراتو او معلوماتي ټکنالوجۍ وزیر مولوي نجیب الله حیات حقاني، مالي او اداري مرستیال مولوي محمد حنیف حمزه، اترا ادارې رییس مولوي سید برات شاه اغا ندیم، افغان ټلیکام او اتصالات مخاتراتي شرکتونو مسولینو او د رسنیو د استازو په شتون کې د یوه مطبوعاتي کنفرانس په ترڅ کې لاسلیک شو.

 د کنفرانس په پیل کې د مخابراتو او معلوماتي ټکنالوجۍ وزیر د یاد کنفرانس ګډونوالو ته د ښه راغلاست ویلو ترڅنګ په تېرو درېیو کلونو کې د مخابراتو او معلوماتي ټکنالوجۍ وزارت د لاسته راوړنو او پرمختګونو په اړه خبرې وکړې او د مخابراتو او معلوماتي ټکنالوجۍ وزارت د ټي ډي اف پروژې په اړه یې هر اړخیز معلومات وړاندې کړل.

مولوي نجیب الله حیات حقاني وویل؛ اوسنی عصر د ټکنالوژۍ عصر دی، د ټکنالوژۍ د حیاتي اهمیت په پام کې نیولو سره د مخابراتو او معلوماتي ټکنالوجۍ وزارت هڅه کوي چې د هېواد هغو برخو ته چې لا هم مخابراتي خدمتونو ته لاسرسی نه لري مخابراتي اسانتیاوې ور ورسوي.

نوموړي زیاته کړه؛ د مخابراتو او معلوماتي ټکنالوجۍ وزارت توانېدلی، چې په تېرو درېیو کلونو کې د هېواد ډېرې محرومې سیمې له مخابراتي او انټرنیټي خدمتونو برخمنې کړي.

 ښاغلي حقاني دې مطبوعاتي کنفرانس کې وویل؛ د ټولیز لاسرسی لسمه پروژه چې د افغانستان اسلامي امارت د ریاست الوزرا عالي مقام څخه منظور شوې او اوس مهال د هېواد په ګوټ ګوټ کې د یادو مخابراتي سایټونو پر جوړېدو او همدا راز د ځینو مخابراتي سایټونو پر فعالیدو کار روان دی او له بشپړېدو سره به یې د هېواد ډېر شمېر سیمې او هېوادوال مخابراتي اسانتیاو ته لاسرسی پیدا کړي.

د ټي ډي اېف لسمه پروژه چې په درېیو مشخصو لاټونو وېشل شوې، د یادې پروژې د دوه لاټونو قرارداد د ۳۲ میلیونه، ۸۱۴ زره او ۱۳۶ ډالرو په ارزښت لاسلیک شوي دي او د جوړیدو چارې یې هم پیل شوي، چې ډېر ژر به فعال او ګټې اخیستنې ته وسپارل شي.

همداراز درېیم لاټ کې چې د هېواد ۱۵ ولایتونه ۱۰۴ ولسوالۍ شاملې دي ۱۴۹ مخابراتي سایټوڼه ورته پلان شوي چې د ۱۳ میلیونه، ۸۵۷ زره او ۶۸۱ ډالرو په ارزښت د ګټونکو شرکتونو سره د رسینو پر وړاندې د یادو سایټونو د جوړولو قرارداد د مخابراتو او معلوماتي ټکنالوجۍ وزارت مسولینو او اړونده شرکتونو سره لاسلیک شول.

د داوطلبۍ په پروسه کې د افغان ټلیکام مخابراتي شرکت د درېیم لاټ ۱۱۹ او د واحدې منبعې ۲۵ مخابراتي سایټونه ګټلي او همدا راز د اتصالات مخابراتي شرکت د واحدې منبعې له طریقه د پینځه مخابراتي سایټونو د جوړولو او فعالولو ګټونکي اعلان شوي وو، چې د دواړو مخابراتي شرکتونو سره د سایټونو د جوړېدو قرارداد لاسلیک او د سایټونو عملي چارې به هم ورسره پیل شي.

د یادونې وړ ده، چې دغې مطبوعاتي کنفرانس کې د مخابراتو او معلوماتي ټکنالوجۍ وزیر مولوي نجیب الله حیات حقاني د مخابراتي شرکتونو مسولینو ته په کلکه لارښوونه وکړه، چې د تړون له اصولو او شرایطو سره سم خپلې چارې ترسره کړي او له قوانینو سرغړونه د منلو وړ نه ده او د غیر قانوني مواردو په لیدو سره به قانوني چلند سره مخ شي.

د مخابراتو او معلوماتي ټکنالوجۍ وزارت هېواد کې د محرومو سیمو تر پوښښ لاندې راوستل او همدا راز مخابراتي مارکېټ کې دخدمتونو اوکیفیت ارزونه خپل مسولیت ګڼي او وخت په وخت له مخابراتي مارکېټ څخه څارنه ترسره کوي.

همداراز یاد وزارت د هېواد ټولې هغه محرومې سیمې چې تر دې دمه ورته هیڅ راز مخابراتي اسانتیاوې نه وې مهیا شوې لومړی په نښه او بیا یې ورته ۵۱۰ مخابراتي سایټونه د ټي ډي اېف لسمې پروژې او همدا راز د واحدې منبع له لوري منظور کړي، چې اوسمهال په یادو سایټونو عملي کار روان او له بشپړېدو سره به یې د هېواد اکثریت محرومې سیمې له مخابراتي او انټرنټي خدمتونو برخمنې شي.

د رياست الوزرا د دفتر لوی رییس ډاکټر ملا عبدالواسع نن له غرمې مخکې د کابل ولایت پغمان ولسوالۍ له یو شمېر قومي مشرانو او مخورو سره لیدنه وکړه.

 د دې لیدنې په پیل کې د ریاست الوزرا د دفتر عمومي ریاست د سیاسي او ولسي چارو رییس مولوي ګلزار احمد حقاني یادو مشرانو او مخورو ته د ښه راغلاست پر مهال وویل؛ د اسلامي امارت مسولین هڅه کوي ولسونو ته خدمت او پر وخت یې ستونزو ته رسېدنه وکړي، ځکه د اسلامي امارت دروازې د ټولو پر مخ پرانیستې دي.

قومي مشرانو په خپلو خبرو کې وویل، د پغمان ولسوالۍ خلک اسلامي امارت ته اخلاص لري او د اسلامي نظام پر حاکمیت خوښ دي.

دوی دغه راز د پغمان سړک د پخولو، د کرنیزو ځمکو د اوبو د کمښت د حل ترڅنګ په بېلابېلو برخو کې خپلې غوښتنې او ستونزې د ریاست الوزرا د دفتر لوی رییس سره شریکې کړې.

ډاکټر ملا عبدالواسع د پغمان ولسوالۍ قومي مشرانو او مخورو ته د ښه راغلاست پر مهال وویل، اسلامي امارت په خپلو هڅو او د ملت په همکارۍ چارې مخته وړي.

نوموړي زیاته کړه، دا مهال د کابل ښار په بېلابېلو برخو کې عمراني کارونه دوام لري او اسلامي امارت د ولسونو د ستونزو حل ته پام کوي.

د رياست الوزرا د دفتر لوی رییس وویل؛ په هېواد کې اسلامي نظام حاکم شوی، چې پیاوړتیا او بقا یې د ټولو ګډ مسولیت دی او ټول باید په اتفاق او اتحاد د هېواد د ابادۍ لپاره نه ستړې کېدونکي هلې ځلې وکړو.

 ډاکټر ملا عبدالواسع د خپلو خبرو په پای کې یادو قومي مشرانو او مخورو ته ډاډ ورکړ، چې وړاندیزونه او ستونزې به یې له اړوندو ادارو سره شریکې او د حل لپاره به یې اقدام وشي.

د سرحدونو، قومونو او قبايلو چارو وزارت په مشرۍ سمنګان ولايت کې لويه ولسي غونډه وشوه.

په دغه ولسي غونډه کې د جرګو او قبايلي چارو د همغږۍ مرستیال مولوي محمد علي جان احمد، د جرګو او قبایلي چارو د همغږۍ رییس شيخ حضرت ولي حقاني، د شخړو د حل سلاکار مولوي محمد اجان رهبر، د اطلاعاتو اوعامه اړيکو رییس مفتي تسليم الله حقاني او د سمنګان ولايت د والي ترڅنګ د ولسواليو استازو، قومي مخورو، ځوانان او علماوو برخه اخيستې وه.

د غونډې په پیل کې مفتي تسليم الله حقاني وويل؛ د سمنګان ولسونه دې نن مخامخ خپلې ستونزې د وزارت له پلاوي سره شريکې کړې، ځکه موږ نه غواړو چې ولسونه تکليف شي، وزارت په وزارت وګرځي، بلکې موږ ولايت په ولايت ګرځو ستونزې اورو او د حل په موخه يې له لوړ رتبه مسولينو سره شريکوو.

 ورپسې د جرګو او قبايلي چارو د همغږۍ مرستیال مولوي محمد علي جان احمد وويل؛ د اميرالمؤمين حفظه الله له لوري د عمومي عفوې له مخې په بهر ميشتو افغانانو غږ کوو، چې را ستانه شي د ترحم دروازې يې پرمخ خلاصې دې.

ښاغلي احمد زياته کړه؛ تېره ۲۰ کلنه دوره کې فساد او زورواکي وه، سيستم د نورو په اشاره چليده د خلکو سر، مال او عزت خوندي نه وو، مګر نن اسلامي امارت دا هر څه په نظر کي نيولي.

شيخ حضرت ولي حقاني د خبرو پر مهال وويل؛ نن په هېواد کې د خوشحالۍ او خپلواکۍ رڼا ده، امن دی او هر څوک کولي شي په ډاډه زړه د هېواد په ګوټ ګوټ کې وګرځي.

ښاغلي حقاني زياته کړه، قومونه دې د رب شکر ادا کړي او د دې نظام د لا پياوړتيا لپاره دې له موږ سره تل همکار و اوسي.

د شخړو د حل سلاکار مولوي محمد اجان رهبر ولسونه اتفاق او يووالي ته را وبلل او ويي ویل؛ افغانان چې کله متحد شول نو د دښمن درې لويې امپراطورۍ يې ړنګې کړې او دا د یووالي او اتفاق قوت و چې کاميابي ور په برخه شوه، نو مه پريږدۍ چې بيا د بې اتفاقي په لمبو وسوځو.

قومي مشرانو په خپلو ويناوو کې د اسلامي امارت د ملاتړ سربېره یې کړنې وستايلې او ويي ويل؛ نن له هغه خلکو سره ناسته لرو چې د الله ^(ج) په نصرت او زموږ د دعاوو په برکت حاکم شوي دا داسې حاکمان دي، چې مونږ د خپل زړه خبره په جرت ورته  کولی شو او دوی يې په پراخه سینه اوري.

دوي په خپلو خبرو کې له نړیوالو د تعامل غوښتونکي شو.

د فلسطین وفا خبري اژانس د راپور له مخې، د غزې ښار په نصیرات کمپ او د بې‌ځایه شویو پر شجاعیه ښوونځي د اسرائیلي یرغلګرو د بریدونو له امله لږ تر لږه ۱۹ فلسطینیان شهیدان او ګڼ نور ټپیان شوي.

د یاد راپور پر بنسټ، په نصیرات کمپ کې دوه کورونه په نښه او ۱۲ فلسطینیان پکې شهیدان شوي، چې ۷ ماشومان او ۵ ښځې دي.

د دې تر څنګ اسرائیلي اشغالګرو د فلسطیني کډوالو پر شجاعیه ښوونځي هوايي برید کړی، چې ۷ فلسطینیان پکې شهیدان او نور ټپیان شوي دي.

وفا خبري اژانس وايي، چې د غزې په زاړه ښار کې هم یوه ودانۍ په نښه شوې، چې د ماشومانو په ګډون یو شمېر فلسطینیان پکې شهیدان شوي دی.

د یادونې وړ ده، چې پر غزه د صهیونیستي رژیم د بریدونو له پیل راهیسې ۴۱ زره او ۶۱۵ فلسطینیان شهیدان شوي، چې ډېری یې ښځې او ماشومان دي.

د دې تر څنګ ۹۶ زره او ۳۵۹ نور ټپيان شوي او زرګونه نور د ویجاړو شویو ودانیو تر خاورو لاندې دي.

د چاپېریال ساتنې ملي ادارې عمومي رییس مولوي مطیع الحق خالص ننګرهار ولایت ته د خپل سفر په ترڅ کې دره نور ولسوالۍ ته سفر کړی او د یادې ولسوالۍ له مسولینو او ولسونو سره یې د دره نور ولسوالۍ د چاپېریالي ارزښت، ساتل شوو سیمو، طبیعي ځنګلونو، وحشي ژوو او الوتونکو د ارزښت، ساتنې او ښکار د مخنيوي په اړه هر اړخیزې خبرې کړې دي.

د دره نور ولسوالۍ مسولینو او قومي مشرانو د چاپېریال ساتنې ملي ادارې عمومي رییس هر کلی کړی او خپلې ستونزې او غوښتنې یې ورسره شریکی کړې.

مولوي مطیع الحق خالص یادو قومي مشرانو ته د دوی د ستونزو او غوښتنو د حل او رسېدنې په موخه په خپله برخه کې د اجرااتو ترسره کولو او نورو برخو کې يې له اړوندو مسولینو ته د رسولو ډاډ څرګند کړی دی.

د دوشنبي ورځ، د ۱۴۴۶/۳/۲۷ هـ ق نېټه چې۱۴۰۳/۷/۹ هـ ل نېټې سره، سمون خوري.

د هېواد له مختلفو لارو څخه افغان کډوال راستانه شوي او په بېلابېلو برخو کې ورته اړین خدمتونه وړاندې شوي.

بشپړ راپور یې په لاندې ډول وړاندې کیږي:

ننـــــــــګرهــــــار

تورخم ډیورنډ فرضي کرښه

د ثبت، تثبیت او استقبال کمېټه:

د تورخم له لارې ۱۷ کورنۍ هېواد ته راستنې او د نوموړو کورنیو ۸۳ تنه غړي، ثبت او بایمیټریک شوي دي.

د ټرانسپورټ او لېږد کمېټه:

له تورخم څخه ۱۲ کورنۍ چې د غړو شمېر یې ۵۸ تنه و، کابل او ننګرهار ولایتونو ته په خوندي توګه لېږدول شوې دي او یادو کورنیو ته ۴۶ زره افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له ۱۶ کورنیو سره ټولې ۱۲۸ زره افغانۍ کیږي.

د لنډمهاله مېشتېدنې کمېټه:

۱۵ کورنۍ د تورخم په عمري کمپ کې مېشتې کړل شوي دي.

د خدماتو او روغتیايي چارو کمېټه:

د تورخم په عمري کمپ کې  راستنېدونکو کډوالو  ته د روغتیا په شمول لاندې بېلابېل خدمات وړاندې شوي:

خواړه: په تورخم کې ۲۹۰ خوراکه ډوډۍ او اوبه ویشل شوي دي.

روغتیا: په تورخم کې ۲۱۷ تنه راستانه شوي کډوال  تداوي شوي دي.

مخابرات: راستنو شویو کډوالو  ته ۸۸ عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، وېشل شوي دي.

په تورخم کې کډوالو  ته ځینې البسه لکه توشکې بړستنې او داسې نور شیان هم وېشل شوې دي.

کنــــــــــــــدهار

سپین بولدک ډیورنډ فرضي کرښه

د ثبت، تثبیت او استقبال کمېټه:

د سپین بولدک له لارې ۲۵ کورنۍ چې د غړو شمېر یې ۸۸ تنه و، هېواد ته راستنې او ثبت شوي دي.

د ټرانسپورټ او لېږد کمېټه:

له سپین بولدک څخه دوه کورنۍ چې د غړو شمېر یې ۱۲ تنه و، کندهار او پکتیکا ولایتونو ته په خوندي توګه لېږدول شوې دي او یادو کورنیو ته درې زره او ۵۰۰ افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له ۲۶ کورنیو سره ټولې ۱۹۸ زره افغانۍ کیږي.

د لنډمهاله مېشتېدنې کمېټه:

۲۴ کورنۍ د تخته پل په کمپ کې مېشتې کړل شوي دي.

د خدماتو او روغتیايي چارو کمېټه:

په سپین بولدک کې  راستنېدونکو کډوالو  ته د روغتیا په شمول لاندې بېلابېل خدمات وړاندې شوي:

خواړه: په سپین بولدک کې ۲۶۴ خوراکه ډوډۍ او اوبه ویشل شوي دي.

روغتیا: په سپین بولدک کې ۶۸ تنه راستانه شوي کډوال  تداوي شوي دي.

همدارنګه ۱۴۸ تنه کډوالو  ته د روغتیا په بېلا بېلو برخو کې عامه پوهاوی ورکړل شوی دی.

البسه: په لنډ مهاله کمپونو کې د اړتیا سره سم خیمې او کمپلې کډوالو  ته وېشل شوي دي.

نیمروز

ورېښمو لار

د تثبیت، ثبت او استقبال کمېټه:

د نیمروز ولایت د ورېښمو  له لارې ۱۰۶ کورنۍ چې د غړو شمېر یې ۴۶۶ تنه و، هېواد ته راستنې او  ثبت شوي دي او همدا راز یو زر او ۲۹۵ مسافر هېواد ته راستانه شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له ۹۸ کورنیو سره ټولې ۷۶۷ زره افغانۍ مرسته شوې ده.

د لنډمهاله مېشتېدنې کمېټه:

۱۰۶ کورنۍ د نیمروز په موقت کمپ کې مېشتې کړل شوي دي.

د خدماتو او روغتیايي چارو کمېټه:

د نیمروز د ورېښمو په لار کې  راستنه شویو کډوالو  ته د روغتیا په شمول لاندې بیلابیل خدمات وړاندې شوي:

مخابرات: د مخابراتو او معلوماتي ټکنالوژۍ د مسئولینو له لوري ۱۰۶ عدده سیم کارتونه کډوالو  ته په وړیا توګه چې وړیا دقیقې او د انټرنټي بستې هم پکې فعاله وې، وېشل شوي دي.

د اطلاعاتو او عامه پوهاوي کمېټه:

د نیمروز ولایت د ورېښمو په لار کې کډوالو  ته عامه پوهاوی ورکړل شوی. یادو کډوالو  ته د دوی د ثبت، لیږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شوی.

هرات

اسلام کلا

د تثبیت، ثبت او استقبال کمېټه:

د اسلام کلا له لارې ۱۹۸ کورنۍ چې د غړو شمېر یې ۷۸۱ تنه و، هېواد ته راستنې او  ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له ۱۹۷ کورنیو سره ټولې یو میلیون او ۴۶۸ زره افغانۍ مرسته شوې ده.

د لنډمهاله مېشتېدنې کمېټه:

۲۷ کورنۍ د اسلام کلا کمپ کې مېشتې کړل شوي دي.

کابل

مرکز

د ټراسپورټ او لیږد کمېټه:

له کابل څخه ۱۱ کورنۍ چې د غړو شمېر یې ۶۸ تنه و، کندز، بلخ، تخار، جوزجان او بغلان ولایتونو ته په خوندي توګه لېږدول شوې دي او یادو کورنیو ته ۳۴ زره او ۹۰۰ افغانۍ کرایه هم ورکړل شوې ده.

د ټولو کمېټو د بېلا بېلو کړنو ټولیز ارقام په لاندې توګه دي:

ثبت شوي کډوال :    ۳۴۶ کورنۍ او یو زر او ۴۱۸ وګړي

لېږدول شوي کډوال :  ۲۵ کورنۍ او ۱۳۸ وګړي

مرسته شوي کډوال :   ۳۳۷ کورنۍ

موقت ميشت شوي کډوال :   ۱۷۲ کورنۍ

وېشل شوي سیمکارتونه:  ۱۹۴ عدده

د کورنیو چارو وزارت د یوې خبرتیا په خپرولو سره ویلي؛ د رهبرۍ د پرېکړې او د کورنیو چارو وزیر خلیفه ‌سراج الدین حقاني په لارښوونه، یوه کمېټه جوړه او وه ټاکل شوه تر څو د وزارت د رهبرۍ د هغه حکم پلي کېدل په جدي توګه وڅاري چې له مخې یې د هر ډول کېندل شویو څاه ګانو مالکين باید د خطراتو او پېښو د مخنیوي لپاره د څاه ګانو سرونه په محفوظه توګه بند کړي.

له بده مرغه چې لا هم په هېواد کې، په ځانګړې توګه سوېل کې څاګانو ته د ماشومانو لوېدنې زړه بوږنونکي پېښې رامنځته کېږي، چې مخنېوی یې اړین دی.

یاده کمېټه به ټولو ولایاتو ته د یادې موضوع د عملي څارنې لپاره سفر کوي او د سرغړونکو سره به جدي قانوني چلند کیږي.

کورنیو چارو وزارت یو ځل بیا ټولو هغه هېوادوالو ته چې د څاه ګانو مالکیت لري؛ خبر ورکړی،  ترڅو ژر تر ژر د څاه ګانو سرونه په محفوظه توګه بند کړي.

د یاد وزارت په وینا له سرغړوونکو سره به جدي او قانوني چلند وشي.

دا خبرتیا په داسې مهال نشریږي، چې وړاندې د هېواد په بېلابېلو سیمو کې د څاه ګانو مالکینو د نه پاملرنې په صورت کې زموږ ګڼ شمېر هېوادوال ماشومان څاه ګانو ته د لویدو له امله ژوبل او شهیدان شوي دي.

د اقتصادي کمېسیون د تخنیکي کمېټې نوبتي غونډه په مرمرینه ماڼۍ کې ترسره او له اجنډا سره سم د اوبلن ګاز د تاسیساتو جوړولو پر کړنلارې، د کانونو سکټور د عوایدو پالیسۍ پر مسودې او همدا راز یوشمېر نورو موضوعاتو خبرې وشوې.

په غونډه کې تر هر اړخیزې ارزونې وروسته د اقتصادي کمېسیون د تخنیکي کمېټې له لوري د راغلو بدلونونو په نظر کې نیولو سره د اوبلن ګاز د تاسیساتو جوړولو کړنلارې ته د تایید نظر ورکړل شو او د منظورۍ په موخه اقتصادي کمېسیون ته راجع شوه.

د دې کړنلارې له مخې به د اوبلن ګاز توزیع کوونکي ټول امارتي او خصوصي شرکتونه د ګازو ذخیرې له ښارونو او د ګڼې ګوڼې له ځایونو وباسي او د دغه کړنلارې اړوند به په ټولو معیارونو برابر نوي تاسیسات جوړوي.

همدارنګه په غونډه کې د کانونو او پټرولیم وزارت له لوري د کانونو سکټور د عوایدو پالیسۍ د مسودې په اړه هم بحث وشو.

له تفصیلي بحث وروسته د یادې پالیسۍ په اړه د تایید نظر ورکړل شو او د منظورۍ په موخه اقتصادي کمېسیون ته راجع شوه.

ټاکل شوې، چې د روان لمریز کال د تلې میاشتې په ۱۵مه پلازمېنه کابل کې د امام ابوحنیفه درېیم ملي او نړیوال نندارتون پرانیستل شي.

د سوداګرۍ او پانګونې خونه وايي، چې په دې نندارتون کې به پر کورنیو شرکتونو سربیره د منځنۍ او جنوبی اسیا ۳۰۰ شرکتونه ګډون وکړي.

له بل لوري د افغانستان د کسبګرو او هټیوالو خونه وايي، چې د یاد نندارتون له لارې به هېواد کې تولید شوي بېلابېل توکي نړیوالو ته په ښه بڼه ور وپېژندل شي او مارکیټ به ورته پیدا شي.

ټاکل شوې د روانې «تلې» میاشتې په پینځلسمه نېټه کابل کې د امام ابو حنیفه درې ورځنی نړیوال نندارتون پرانېستل شي. #ملي‌تلویزیون

نور حال راپور کې 👇 pic.twitter.com/7EgOb3hbP7

— RTA Pashto (@rtapashto) October 1, 2024

د امام ابوحنیفه په درېیم ملي او نړیوال نندارتون کې به ۵۰ ایراني شرکتونه هم ګډون وکړي.

ایراني چارواکي وايي، چې د خپلو محصولاتو د نندارې ترڅنګ به د صنعت او کانونو په برخه کې پر پانګونه او له افغان لوري سره د تړونونو پر لاسلیکولو ډېر تمرکز وکړي.

له دې وړاندې هم د کورنیو تولیداتو د ملاتړ او له نړۍ سره د سوداګرۍ د پراختیا په موخه دوه ځلې د امام ابوحنیفه ملي او نړیوال نندارتون جوړ شوی، چې زرګونه خلکو لیدنه ترې کړې ده.

د عامې روغتیا وزارت له لوري د زړه نړیواله ورځ د یوې غونډې په ترڅ کې ونمانځل شوه.

په دې اړه جوړو شویو مراسمو کې د عامې روغتیا وزارت د روغتیايي خدمتونو وړاندې کولو مرستیال مولوي عبدالولي حقاني، د وزارت مرکزي رییسانو، د روغتیا نړیوالو سازمان استازو او روغتیايي کارکوونکو ګډون کړی و.

د عامې روغتیا وزارت د روغتیايي خدمتونو وړاندې کولو مرستیال د دې ورځې څخه د نمانځنې موخه د ستر وژونکي سبب مخنیوی یاد کړی او د دې ناروغۍ څخه د مخنیوي لپاره یې د حیواني او نباتي غوړو، مالګې او ګاز لرونکو مشروباتو له زیاتې کارونې په ډډه کولو ټینګار کړی.

مولوي عبدالولي حقاني ویلي، د عامې روغتیا وزارت ژمن دی چې د خپلو کاري شریکانو په همکارۍ د هېواد ټولو وګړو ته په مساویانه توګه معیاري روغتیايي خدمات وړاندې او غوره درملنه یې وکړي.

د یادې غونډې په دوام د عامې روغتیا وزارت د غیر ساري ناروغیو د کنټرول مسول ډاکټر سمیع الله کریمي د زړه ناروغۍ عمده لاملونه د دځُنیاتو کارول، د وینې لوړ فشار او شکر ناروغۍ درلودل، د فزیکي فعالیت نه شتون او د مالګې او غیر معیاري غوړیو زیات کارول یاد کړي او د دغه ناروغۍ د کنټرول او مخنیوي په موخه یې د ټولنې وګړو ته عامه پوهاوی اړین بللی دی.

بل لور د افغانستان د زړه او وعایوي ناروغیو د ټولنې مشر ډاکټر عبدالواحد صدیقي ګډونوالو ته ویلي؛ زړه د بدن یوه حیاتي برخه ده او یو نارمل انسان چې ۷۰ کیلو وزن ولري زړه یې په ۲۴ ساعتونو کې لس زره لیتره وینه پمپ کوي او ۱۰۰ زره ضربان ترسره کوي، نو د دې لپاره چې یوه سالمه ټولنه، خوشحاله او اوږد مهاله ژوند ولرو اړتیا ده، چې زړه ته ځانګړې پاملرنه وکړو.

په یاده غونډه کې همداراز د روغتیا نړیوال سازمان استازي دلارا مینول او د صدري ابن سینا روغتون رییس ډاکټر فریدون رحماني هم د زړه نړیوالې ورځې اړوند ګډونوالو ته خپلې ویناوې کړې دي.