د فلسطین وفا خبري اژانس د راپور له مخې، د غزې ښار په نصیرات کمپ او د بېځایه شویو پر شجاعیه ښوونځي د اسرائیلي یرغلګرو د بریدونو له امله لږ تر لږه ۱۹ فلسطینیان شهیدان او ګڼ نور ټپیان شوي.
د یاد راپور پر بنسټ، په نصیرات کمپ کې دوه کورونه په نښه او ۱۲ فلسطینیان پکې شهیدان شوي، چې ۷ ماشومان او ۵ ښځې دي.
د دې تر څنګ اسرائیلي اشغالګرو د فلسطیني کډوالو پر شجاعیه ښوونځي هوايي برید کړی، چې ۷ فلسطینیان پکې شهیدان او نور ټپیان شوي دي.
وفا خبري اژانس وايي، چې د غزې په زاړه ښار کې هم یوه ودانۍ په نښه شوې، چې د ماشومانو په ګډون یو شمېر فلسطینیان پکې شهیدان شوي دی.
د یادونې وړ ده، چې پر غزه د صهیونیستي رژیم د بریدونو له پیل راهیسې ۴۱ زره او ۶۱۵ فلسطینیان شهیدان شوي، چې ډېری یې ښځې او ماشومان دي.
د دې تر څنګ ۹۶ زره او ۳۵۹ نور ټپيان شوي او زرګونه نور د ویجاړو شویو ودانیو تر خاورو لاندې دي.